Continue to Dey Patient

 1. Why you like people wey dey patient?

WE DE like-am when people dey patient. Why e be like that? We de respect people wey no de tire when them de wait for something. We de happy when people dey patient with us when we make mistake. E de make us happy when we remember how the person wey conduct our Bible study dey patient with us as we de try our best to learn Bible and do wetin we learn. But the one wey de sweet us pass na the way Jehovah dey patient with us.—Rom. 2:4.

 2. Give example of some things wey fit make-am hard for us to dey patient.

² Even though say we like-am when other people dey patient with us, sometimes e fit no easy for us to dey patient. For example, e fit no easy for us to dey patient when we de drive for go-slow, especially when we don late for where we de go. Or, when people do us wetin we no like, e fit make us vex. And sometimes, e fit hard us to continue to wait for wetin Jehovah promise us for paradise. You go like-am if you dey more patient? For this article, we go talk about some ways wey we fit show say we dey patient and why this character really dey important. We go still see wetin fit help us to dey patient more-more.

 3. Wetin person wey dey patient go do when them do-am something wey im no like?

³ Make we see four ways wey we fit show say we dey patient. Number one, person wey dey patient no de quick vex. When other people do-am something wey e no like, e no de quick vex or do them back. E no de treat other people for bad way when e de face problem. Bible tell us say Jehovah na “God wey get pity, e get soft-heart, e no de vex quick-quick, na only truth e de talk and e de show love wey no de fail for plenty way.”—Ex. 34:6.

 4. Wetin person wey dey patient go do when e de wait for something?

⁴ Number two, person wey dey patient de sofri wait. Person wey dey patient no go start to de over worry or vex if e de wait for something and e de take long time to come. (Eccl. 7:8) We get many situations wey we need to sofri wait. For example, we need to sofri wait when other people de talk instead to jump enter. (Job 36:2) And when we de help our Bible student to understand something for Bible or to stop some bad character wey e get, we need to dey patient.

 5. Which other way person fit show say e dey patient?

⁵ Number three, person wey dey patient de think and plan well before e do something. Na true say when somethings happen, we need to handle-am quick-quick. But when person wey dey patient get important thing to do, e no de rush start-am and do-am hurry-hurry. Instead, e de take some time plan how e go do-am and take im time do-am well.

 6. How person wey dey patient de behave when e de face problem?

⁶ Number four, person wey dey patient no de complain when e de endure problem. We fit talk say we no go fit endure problem if we no dey patient. Na true say no be bad thing to tell our friend about our problem and how we de feel about-am. Even with this one, person wey dey patient go do im best to de see good things for im life and de happy as e de worship Jehovah, even though say e de face problem. (Col. 1:11) As servants of Jehovah, we need to dey patient for this four ways wey we don talk about. Make we talk about why e dey important.

 7. With wetin James 5:7, 8 talk, why e dey important make we dey patient? (Still check the picture.)

⁷ We need to dey patient to fit get life wey no go end. Just like servant of Jehovah for Bible, we need to dey patient as we de wait for Jehovah to do the things wey e promise. (Heb. 6:11, 12) Bible compare us to farmer. (Read James 5:7, 8.) Farmer de work hard to plant and put water for wetin e plant, but e no know the time wey e go grow. So the farmer go dey patient as e de wait because e dey sure say e go harvest wetin e plant. Na so e still be with us, we go continue to work hard as we de worship Jehovah even though say we “no know the day wey [our] Lord de come.” (Matt. 24:42) We go continue to dey patient as we de wait because we dey sure say Jehovah go do all the things wey e promise, for the correct time. If we no dey patient, we fit tire as we de wait and start to leave Jehovah small-small. We fit begin look for things wey go make us happy only for this Satan world. But if we dey patient, we go fit endure to the end and get life wey no go end.—Mic. 7:7; Matt. 24:13.

 8. If we dey patient with people, how e fit help us? (Colossians 3:12, 13)

⁸ When we dey patient, e de help us be better friend to people. E de help us listen well when other people de talk. (Jas. 1:19) When we dey patient, e go help us dey in peace with people. E de help us make we no quick talk or do wetin we go later regret when something happen. If we dey patient, we no go quick vex when person do wetin pain us. Instead to do the person back, we go “continue to bear wetin [we] de do each other, and de forgive each other from [our] heart.”—Read Colossians 3:12, 13.

 9. When we dey patient, how e de help us make better decision? (Proverbs 21:5)

⁹ When we dey patient, e go help us fit make better decision. Instead to rush make decision, we go take time do research about the different-different choice wey we get so that we go fit make better decision. (Read Proverbs 21:5.) For example, if we de look for work, our mind fit tell us say make we take the first one wey we see, even if e go de make us miss meeting and preaching. But if we dey patient, we go take time check-am well and think about things like, ‘from my house to the work place, how e far reach? How many hours I go de work? How e go affect my family and our friendship with Jehovah?’ When we dey patient, e go help us make better decision.

10. Wetin go help us dey patient?

¹⁰ Pray make Jehovah help you dey patient more-more. To dey patient na one of the character wey holy spirit de help person get. (Gal. 5:22, 23) So we fit pray make Jehovah give us holy spirit so that we go fit get this better character. If something happen wey fit make-am hard for us to dey patient, make we “continue to ask” for holy spirit to help us dey patient. (Luke 11:9, 13) We fit still beg Jehovah make e help us de see things the way e de see-am. Then when we don pray, we need to continue to do our best to dey patient everyday. If we continue to pray make Jehovah help us dey patient and continue to do our best to dey patient, Jehovah go help us dey patient more-more even if e de hard us to dey patient before.

11-12. How Jehovah don show say e dey patient?

¹¹ Think deep about some examples for Bible. Bible get plenty example of people wey dey patient. When we think about them, we fit learn how to dey patient. Before we talk about some of this example, make we first talk about Jehovah wey be number one example of Person wey dey patient.

¹² For garden of Eden, Satan lie and try to spoil Jehovah name, say Jehovah no de rule well. When this one happen, Jehovah no kill Satan, instead, e control imself and dey patient because e go take time to prove say na the way e de rule be the best. And as e de wait, e don endure plenty bad things wey people de talk to spoil im name. Another thing be say Jehovah dey patient because e want make more people get the chance to get life wey no go end. (2 Pet. 3:9, 15) Because of this one, millions of people don come de worship Jehovah. When we put mind for the blessing wey go come because Jehovah dey patient, e go make-am easy for us to fit wait for the time wey Jehovah go end this wicked world.

13. How Jesus show say e really copy im Papa example to dey patient? (Still check the picture.)

¹³ Jesus really copy im Papa example to dey patient and e show-am when e dey this earth. E fit no really easy for-am to dey patient with scribe and Pharisee people because them de pretend well-well. (John 8:25-27) But just like im Papa e no de vex quick-quick. When people do wetin pain-am or talk bad about-am, e no de do them back. (1 Pet. 2:23) Jesus dey patient as e de endure wetin people do-am and e no complain. No wonder Bible tell us say make we “think well about the person wey don endure this kind bad-bad talk from sinners”! (Heb. 12:2, 3) Jehovah go help us fit dey patient like Jesus, as we de endure any problem wey we de face.

14. Wetin we fit learn from Abraham example? (Hebrews 6:15) (Still check the picture.)

¹⁴ What if we don de wait for long time for this wicked world to end and e never happen as we be expect? But now you fit de worry say you fit no dey alive to see the time wey the end go come. Wetin fit help you dey patient and continue to de wait? Make we talk about Abraham example. When Abraham dey 75 years, e no get pikin. But na that time Jehovah promise-am say: “I go make you become big nation.” (Gen. 12:1-4) This promise happen when Abraham dey alive? No be everything about the promise happen when e dey alive. After Abraham cross Euphrates River, e wait for 25 years before e born Isaac. E still wait another 60 years before them born im grand pikin them wey be Esau and Jacob. (Read Hebrews 6:15.) But Abraham no see when im pikin them take become big nation and inherit the Promise Land. Even though say e no see-am, e enjoy better friendship with Jehovah. (Jas. 2:23) And when Jehovah go bring Abraham back to life, e go really happy say people for the whole earth get blessing because e dey patient and put faith for the things wey God promise-am. (Gen. 22:18) Wetin we learn? We fit no see how everything wey Jehovah promise go happen. But if we dey patient like Abraham, we dey sure say Jehovah go bless us now and well-well for paradise.—Mark 10:29, 30.

15. Wetin you fit study for your personal study wey go help you dey patient?

¹⁵ Bible get many other example of people wey show say them dey patient. (Jas. 5:10) You fit take time study about this examples.b For example, even though say na when David dey young Jehovah choose-am say e go be king for Israel, e wait for many years before e become king. Simeon and Anna continue to worship Jehovah well as them de wait for the Messiah wey Jehovah promise. (Luke 2:25, 36-38) As you de study their story, try answer this questions: Wetin fit don help this person dey patient? Wetin e gain as e dey patient? You fit still learn from the example of people wey no dey patient for Bible. (1 Sam. 13:8-14) You fit ask yourself say: ‘Wetin fit don make them no dey patient? Wetin happen because them no dey patient?’

16. Wetin we go gain if we dey patient?

¹⁶ Think about wetin we go gain when we dey patient. The more we dey patient, the more we go de happy and get peace of mind. When we dey patient, e go help us get better health. If we dey patient with people, our friendship with them go better. We go de do things together more-more for congregation. If we no quick vex when person do wetin pain us, the problem no go bad pass as e be. (Ps. 37:8, ftn.; Prov. 14:29) But the one wey dey important pass be say, when we dey patient, we de copy the example of our Papa for heaven and this one go de make us near-am more-more.

17. Wetin all of us need to make up our mind to do?

¹⁷ True-true, to dey patient na really better character wey all of us need to get! Even though say sometimes e no dey easy to dey patient, Jehovah fit help us get this better character. As we dey patient de wait for the new world, we dey sure say “Jehovah de put eye for people wey de fear-am, people wey de expect make e show them love wey no de fail.” (Ps. 33:18) Make all of us make up our mind to continue to do our best to get this better character and de show-am.