Learn From Jesus Junior Brother

 1. How the family wey James grow up be?

JAMES wey be the brother of Jesus grow up for family wey the people de serve Jehovah well.b E papa and mama wey be Joseph and Mary, love Jehovah no be small and they do their best to serve Jehovah. James enjoy another blessing. E senior brother go grow up to be the Messiah wey God don promise. Na really honor for James to dey part of that family!

 2. Which reasons James get to see e senior brother as better example?

² James get plenty reasons to see e senior brother as better example. (Matt. 13:55) For example, Jesus know Bible well sotey when e dey 12 years, the teachers for Jerusalem surprise. (Luke 2:46, 47) James fit don do carpenter work with Jesus. If na so, e go don really know e brother well. Brother Nathan H. Knorr de always talk say, “You go learn plenty things about person, when you work with the person.”c And James fit don notice how “Jesus continue de get sense, and e de strong as e de grow and de get favor from God and people.” (Luke 2:52) Because of this one, we fit de think say James go don dey among the first person wey become disciple of Jesus. But no be so e happen.

 3. Wetin James do when Jesus start e preaching work?

³ When Jesus de do e preaching work for earth, James no be one of e disciples that time. (John 7:3-5) The truth na say, James fit don be one of the family members wey think say Jesus “don de craze.” (Mark 3:21) And nothing for Bible show say James dey with their mama wey be Mary when they kill Jesus ontop the pole.—John 19:25-27.

 4. Which lessons we go talk about?

⁴ After, James put faith for Jesus and e become better elder for Christian congregation. For this article, we go talk about two things wey we fit learn from James: (1) why we must continue to dey humble and (2) how we fit be better teachers.

 5. After Jesus come back to life and appear to James, wetin James do?

⁵ Which time James become follower of Jesus? After Jehovah bring Jesus back to life, “e appear to James, and then e appear to all the apostles.” (1 Cor. 15:7) After that meeting with Jesus, James become one of e disciples. E dey there when the apostles de wait to receive holy spirit for inside one room for Jerusalem. (Acts 1:13, 14) After, James get the honor to serve as governing body member for apostles their time. (Acts 15:6, 13-22; Gal. 2:9) And before 62 C.E., God use holy spirit direct James to write letter to anointed Christians. We de gain from that letter today, whether we get the hope to live for heaven or for this earth. (Jas. 1:1) One man wey e name na Josephus, wey de write about the history of Jew people, write say na one Jewish High Priest wey e name na Ananias and wey be son of Annas, give order make they kill James. James continue to serve Jehovah well until e complete e life for this earth.

 6. How James dey different from the leaders for religion for e time?

⁶ James dey humble. Why we fit talk like that? The way James do after Jesus come back to life dey different from the way many of the leaders for religion do. Think-am: When James see clear proof say Jesus na the Son of God, e humble e self accept-am. But no be so the chief priest them for Jerusalem do. For example, they no fit deny say Jesus no bring Lazarus back to life. But they no accept say na Jehovah send Jesus, instead they try to kill Jesus and Lazarus. (John 11:53; 12:9-11) After when Jesus come back to life, they try to hide the truth from people. (Matt. 28:11-15) Because this leaders for religion dey proud, they reject the Messiah.

 7. Why we no go ever want dey proud?

⁷ Wetin we learn? No dey proud, and allow Jehovah to teach you. Just as disease fit make-am hard for person heart to work well, pride fit make-am hard for us to follow the thing wey Jehovah direct. Pharisee people dey proud sotey they no gree believe the clear proof wey show say Jesus get holy spirit and say na Son of God. (John 12:37-40) As them dey proud, this one really dey bad for them because e affect their everlasting life. (Matt. 23:13, 33) E really dey important say make we continue to allow Bible and holy spirit to change who we be and affect the way we de think and our decisions. (Jas. 3:17) Because James dey humble, e dey ready to learn from Jehovah. And as we go see, James become better teacher because e dey humble.

 8. Wetin go help us to be better teachers?

⁸ James no too go school. The way the leaders for religion de see James for e time, fit be the same way wey they see apostle Peter and John. The leaders for religion see them as “ordinary people wey no go school.” (Acts 4:13) But James learn to be better teacher. We see this one when we read the Bible book wey get e name. Like James, maybe we no too go school. Even with that one, with the help wey Jehovah de use e holy spirit give us and the better training from e organization, we fit be better teachers too. Make we talk about the example wey James show as teacher, and make we see the things wey we fit learn.

 9. Wetin you fit talk about the way James teach?

⁹ James no use big-big word and e no turn-turn e explanation. Because of this one, people wey e de talk to, know wetin they need to do and how to do-am. For example, think about the simple way wey James teach say Christians must dey ready to endure-am when people no treat them for correct way and they no go keep the matter for mind. E write say: “People wey don endure go dey happy. Wuna don hear about how Job endure, and how Jehovah bless-am, [and wuna see] say the love wey Jehovah get really deep and e get pity.” (Jas. 5:11) Notice say the things wey James teach e brothers na from Bible. E use Bible help the people wey e de talk to, make they see say Jehovah de always bless people wey hold-am tight, just like Job. James use simple words and explanation to teach that lesson. As James teach like that, this one no make people put their mind for James, instead they put their mind for Jehovah.

10. Wetin be one way wey we fit do like James when we de teach?

¹⁰ Wetin we learn? Make your message dey simple, and teach from Bible. When we de teach people, make we no try to show them say we know plenty things. Instead, we go show them say Jehovah know plenty things and say e de really care about them. (Rom. 11:33) We fit do that one when we de make sure say wetin we talk na from Bible. For example, instead of us to tell our Bible students wetin we go do if na we dey for their condition, make we help them to think about examples for Bible and to understand how Jehovah de think and de feel. Then their heart go move them to use wetin they learn to make Jehovah glad instead of us.

11. Which problems some Christians for time of James face, and which advice e give them? (James 5:13-15)

¹¹ James talk things as they be. From the letter wey James write, we fit see-am clear say e know the problems wey e brothers and sisters de face, and e give them clear direction about wetin they need to do. For example, some Christians dey slow to do wetin they tell them. (Jas. 1:22) Other people de do partial to favor rich people. (Jas. 2:1-3) And e de hard for some other people to control their tongue. (Jas. 3:8-10) This Christians that time get serious problems, but James believe say they go fit change. E give advice for kind way, but e talk-am as e be. And James encourage people wey get problem with their friendship with Jehovah make they go meet elders to help them.—Read James 5:13-15.

12. Wetin fit help us continue to believe say our Bible students fit change when we de help them?

¹² Wetin we learn? Talk things as they be, but de believe say people fit change. E fit hard for plenty people wey we de study Bible with to do wetin them de learn. (Jas. 4:1-4) E fit hard them to change some bad character to character wey Christians suppose get. Like James, make we no fear to tell our Bible students the things wey they need to change. Make we continue to believe say they fit change, and make we trust say Jehovah go draw humble people come e side and give them the power to change the things wey they need to change for their life.—Jas. 4:10.

13. With wetin dey for James 3:2 and the footnote, wetin James understand?

¹³ James no feel say e better pass other people. James no feel say e dey special or e dey important pass other brothers and sisters, because of the family wey e come from or the work wey e de do for Jehovah. E call other Christians “my dear brothers.” (Jas. 1:16, 19; 2:5) E no try to make other people feel say e no de make mistake. Instead, e add e self when e talk say: “All of us de make mistake many times.”—Read James 3:2 and footnote.

14. Why we must dey ready to accept say we de make mistake?

¹⁴ Wetin we learn? Remember say all of us na sinners. Make we no ever feel say, somehow, we better pass people wey we de teach. Why e no good to feel like that? If we make our student feel say we no de make mistake, this one fit make the student feel say e no go fit ever obey God well. But when we tell our student the truth say no be easy thing for us to follow wetin Bible talk before, and we explain how Jehovah don help us to change some things for our life, we go help our student to see say e fit serve Jehovah too.

15. Wetin you fit talk about the examples wey James use? (James 3:2-6, 10-12)

¹⁵ The examples wey James use, touch people for heart. The truth be say holy spirit help James, but James fit don learn plenty things about how to teach when e de study the example wey Jesus, e senior brother, don use. The examples wey James use for e letter, dey simple and the lessons dey clear.—Read James 3:2-6, 10-12.

16. Why we need to use examples wey de work well?

¹⁶ Wetin we learn? Use examples wey de work well. When you use correct examples, people no go only hear the lesson wey you want make they learn, but they go fit see the lesson too. This one go help people fit think about wetin you de teach, for their mind. This things wey they go think for their mind go help them to remember important Bible truth. Jesus na master for the way e use better examples, and e brother wey be James follow e example. Make we talk about one example wey James use and why the example really work well.

17. Why the example for James 1:22-25 really work well?

¹⁷ Read James 1:22-25. The example about mirror wey James use really work well because of some reasons. The point wey James want teach dey e mind and na say, if we want gain from Bible, we no go only read-am but we must use wetin we read. James choose example wey the people wey e de talk to, go quick understand and na about one man wey de look mirror. Wetin be e point? Na foolish thing if person look mirror, e see something wey e need to correct, and e no do anything about-am. For the same way, e dey foolish if we read Bible, we see something wey we need to change about the kind person wey we be, and we no do anything about-am.

18. Which three things we need to do when we want use example?

¹⁸ When you de use example, you fit do like James when you do this three things: (1) Make sure say the example match wetin you de discuss. (2) Use example wey the people wey you de talk to, go quick understand. (3) Make the lesson of the example wey you use dey clear. If e de hard you to think of example wey match wetin you want, make you check Watch Tower Publications Index. Under the topic wey be “Illustrations,” you go see plenty examples wey you fit use. But remember say, examples be like microphone. This one mean say examples go make the point wey you de teach to come out. So make sure say you use example for only the main points wey you want teach. Na true say, the number one reason why we want make the way we de teach de better, no be to make people feel say we ‘too much.’ But, na to help plenty people as we fit, to be part of Jehovah happy family.

19. How we de show say we love our brothers and sisters?

¹⁹ We no get the honor to grow up with senior brother wey dey perfect, but we get the honor to serve Jehovah with our Christian brothers and sisters for the whole world wey be like our family. We de show say we love them when we de do things with them, de learn from them, and de serve Jehovah well together with them when we de preach and teach. When we de try to do like James, for the way we de think, the things wey we de do, and the way we de teach, we de bring honor to Jehovah. And we de help people wey get good heart to near Jehovah our Papa wey love us.