Who Be the Chief Angel Michael?

Michael, wey some religions de call “Saint Michael,” na name wey they give Jesus before e come this earth and after e finish e work for this earth.a Michael argue with Satan after Moses die and e help one angel so that the angel fit give the message of God to prophet Daniel. (Daniel 10:13, 21; Jude 9) Michael de do wetin e name mean, the name mean, “Who Be Like God?” E do this one as e de defend the right wey God get to rule and as e de fight the enemies of God.—Daniel 12:1; Revelation 12:7.

Make we see why e make sense to believe say Jesus na the chief angel Michael.

• Michael na the chief angel. (Jude 9) The title “chief angel” (archangel), dey for only two places for Bible. For this two places, the way they write the word show say them de talk about one person. This one mean say na only one angel get that title. One of this verses wey talk about Jesus wey come back to life talk say, e “go come from heaven and e go call with command, with the voice of archangel.” (1 Thessalonians 4:16) Jesus get the voice of chief angel because, na e be Michael the chief angel.

• Michael de lead the army of angels. “Michael and e angel them fight with the dragon,” Satan. (Revelation 12:7) Michael get plenty power among the angels, na e make they call Michael “one of the prince with high position” and “the great prince.” (Daniel 10:13, 21; 12:1) As David E. Aune wey de study New Testament talk, the titles wey Michael get show say na Michael be “the leader of the angels.”

  Bible mention only one name of person wey get great power over the angels. Bible explain how e “go show e self from heaven with e powerful angels and with strong fire, as e de come punish people.” (2 Thessalonians 1:7, 8; Matthew 16:27) Jesus “go heaven . . . and they put angels and authorities and powers for e hand.” (1 Peter 3:21, 22) E no go make sense say God go put Jesus and Michael as two leaders with the same position over the angels. Instead, e go make sense to believe say na one person get the two names, Jesus and Michael.

• Michael “go stand up” for “time of serious suffer” wey never happen. (Daniel 12:1) For the book of Daniel, they use the word “stand up” to talk about king wey stand up to take special action. (Daniel 11:2-4, 21) Jesus Christ wey Bible call “The Word of God,” go take special action as “King of kings” to destroy enemies of God and protect servants of God. (Revelation 19:11-16) E go do this one for time of “great tribulation . . . this kind one never happen since the world start.”—Matthew 24:21, 42.