Wetin Revelation Talk About Enemies of God?

 1. Wetin the book of Revelation talk about servants of God?

THE book of Revelation show us say God’s Kingdom don de rule and say they don throw Satan from heaven. (Rev. 12:1-9) That one mean say peace go dey for heaven, but we go face problems for earth. Why? Na because Satan de vex and e de attack people wey de serve Jehovah well for this earth.—Rev. 12:12, 15, 17.

 2. Wetin go help us continue to serve Jehovah well?

² How we fit continue to serve Jehovah well even though say Satan de attack us? (Rev. 13:10) One thing wey go help us na to know the things wey go happen for future. For example, for the book of Revelation, apostle John talk about some of the blessings wey we go enjoy small time. One of the blessings na say God go destroy e enemies. Now, make we discuss the things wey Revelation talk about this enemies and wetin go happen to them.

 3. Wetin be some of the signs wey the book of Revelation use?

³ The first verse for Revelation tell us say they “use signs” to talk about the things wey we want read about. This one mean say they use one thing take represent another thing. (Rev. 1:1) Bible use some big-wicked animals to represent enemies of God. For example, Bible talk about “one big-wicked animal wey de come out from the sea.” E get “seven head and ten horn.” (Rev. 13:1) After that big-wicked animal, “another big-wicked animal de come out from ground.” That big-wicked animal de talk like dragon and e de make “fire come down from heaven.” (Rev. 13:11-13) Then another different animal come. Bible talk say na “one red big-wicked animal.” And one prostitute dey ontop this animal de ride-am. This three big-wicked animals represent the enemies wey don de fight Jehovah God and e Kingdom for long time. So, e dey important make we know who they be.—Rev. 17:1, 3.

4-5. How the thing wey Daniel 7:15-17 talk, help us understand wetin this signs mean?

⁴ Before we learn who this enemies be, we need to understand who the big-wicked animals and the prostitute represent. The best way to understand-am, na to allow Bible explain e self. Other Bible books don already explain many of the signs for the book of Revelation. For example, prophet Daniel dream about “four big animals [wey] come out from inside sea.” (Dan. 7:1-3) Daniel tell us wetin they mean. This big animals mean four “kings,” or governments. (Read Daniel 7:15-17.) This one help us to understand-am clear say the animals wey the book of Revelation talk about go still represent governments.

⁵ Now, make we talk about some signs wey dey the book of Revelation. When we do this one, we go see how Bible help us understand the thing wey this signs mean. We go start with the big-wicked animals one by one. We go first know who they be. Then we go see wetin happen to this animals. And the last thing wey we go talk about na how this things wey happen concern us.

 6. The big-wicked animal with seven head wey Revelation 13:1-4 talk about, wetin e mean?

⁶ Wetin be the big-wicked animal with seven head? (Read Revelation 13:1-4.) We see say this animal be like leopard, but e foot be like bear own. E mouth be like lion own, and e get ten horn. All this different part for the body wey resemble other animals own, still dey for the four big animals wey Daniel chapter 7 talk about. But for this verse for the book of Revelation, all this part dey for one animal, no be four different animals. This big-wicked animal no be just one government or world ruler. John talk say this animal de rule “all tribe and people and language and nation.” So, e must big pass any other government. (Rev. 13:7) So this big-wicked animal must represent all the governments wey don rule man come reach now.b—Eccl. 8:9.

 7. Wetin each of the seven head for the big-wicked animal mean?

⁷ Wetin each of the seven head mean? Revelation chapter 17 help us know the answer because e talk about image of the animal wey dey Revelation chapter 13. Revelation 17:10 talk say: “And na seven kings dey: Five don fall, one still dey, and the other one never come yet. But when e come, e go dey for short time.” Out of all the governments wey Satan don use, Bible compare seven of them to “head” because they be get plenty power. This governments na governments wey don rule God people or they don suffer them no be small. For time of apostle John, five of this governments don already rule. They be Egypt, Assyria, Babylon, Medo-Persia, and Greece. The number six government wey rule the world wey be Rome, still de rule that time wey John see the vision. Which government go be the number seven and the last world power, or head?

 8. Which government be the number seven head for the big-wicked animal?

⁸ As we go see now, the prophecies for the book of Daniel help us to know the number seven and last head for the big-wicked animal. Which government don de rule the world for this time of the end, or “the Lord’s day”? (Rev. 1:10) They be two powerful government wey come together and de do things together. They be United Kingdom and United States of America. So we go fit talk say together na them be the number seven head of the big-wicked animal wey Revelation 13:1-4 talk about.

 9. Wetin the big-wicked animal with “two horn like small sheep” mean?

⁹ Revelation chapter 13 still tell us say this number seven head, wey be United Kingdom and America together, still de do like big-wicked animal with “two horn like small sheep own, but e de talk like dragon.” This animal de “do powerful signs. E de even make fire to come from heaven to the earth for people to see.” (Rev. 13:11-15) Revelation chapter 16 and 19 talk about this big-wicked animal as “lie-lie prophet.” (Rev. 16:13; 19:20) Daniel still talk something wey be like that, say United Kingdom and America together go “really destroy plenty things.” (Dan. 8:19, 23, 24, ftn.) Na this one really happen for the second world war. Na science people for Britain and America produce the two bombs wey end the war. Because of this bombs wey Britain and America produce, e just be like say they make “fire to come from heaven to the earth.”

10. Wetin the “image of the big-wicked animal” mean? (Revelation 13:14, 15; 17:3, 8, 11)

¹⁰ The next thing wey appear na another big-wicked animal. This one almost resemble the big-wicked animal with seven head. But this one na red color. Bible call-am “the image of the big-wicked animal” and talk about-am as “number eight king.”c (Read Revelation 13:14, 15; 17:3, 8, 11.) John see say this “king” appear, then e disappear, and after, e appear again. This thing wey John see really fit the organization wey the name na United Nations. This organization de support the politics for this world. They first de call-am League of Nations. Then e end, or disappear, for second world war. After, e come back as United Nations.

11. Wetin the big-wicked animals wey be governments for the world go do, and why we no need to fear them?

¹¹ The big-wicked animals wey be the governments for the world, go use their lie-lie to make people dey against Jehovah and e people. E just be like say they gather “the kings for the whole earth” together to the war of Armageddon, wey be the “great day” of the “God wey get power pass.” (Rev. 16:13, 14, 16) But we no go fear anything. Our great God Jehovah go do something quick-quick to save everybody wey support the way e de rule.—Ezek. 38:21-23.

12. Wetin go happen to all the animals?

¹² Wetin happen to all the animals? Revelation 19:20 give us the answer say: “The person wey sitdown ontop the horse catch the big-wicked animal and the lie-lie prophet wey do miracle for the front of the big-wicked animal. And na that miracle e use deceive all the people wey receive the mark of the big-wicked animal and people wey de worship the image of the big-wicked animal. When they still dey alive, e throw them for inside the big fire wey de burn with sulfur.” So when this governments wey be enemies of God still de rule, God go destroy them forever.

13. Which problem some governments de cause for all Christians?

¹³ How this one concern us? Because we be Christians, we must continue to support God and e Kingdom. (John 18:36) To do this one, make we no ever support any side for politics for this world. But this one fit really hard because the governments for this world want make we use the things wey we de talk and do to support them. Anybody wey do wetin they want, de get the mark of the big-wicked animal. (Rev. 13:16, 17) But anybody wey receive this mark, the person no go make Jehovah glad and e no go live forever. (Rev. 14:9, 10; 20:4) So e really dey important say make we no ever support any side for politics no matter how government force us reach!

14. As e dey for Revelation 17:3-5, which thing apostle John see again wey surprise-am?

¹⁴ Apostle John talk say e “really surprise” when e see another thing. Wetin be that? E see one woman de ride one of the wicked animals. (Rev. 17:1, 2, 6) This woman na “great prostitute” and they call-am “Babylon the Great.” The woman de do “sex wey no clean” with “the kings for the earth.”—Read Revelation 17:3-5.

15-16. Who be “Babylon the Great,” and how we know this one?

¹⁵ Who be “Babylon the Great”? This woman no go fit be any organization for politics because Revelation talk say e de do sex wey no clean with the leaders for politics. (Rev. 18:9) And as Bible talk say the woman de ride the big-wicked animal, this one show say e de try to control this leaders. Another thing na say, this woman no go fit be the business part for this world wey Satan de control wey get long-throat. The book of Revelation talk about them for another place as “the businessmen for the earth.”—Rev. 18:11, 15, 16.

¹⁶ For Bible, the word “prostitute” fit mean people wey de claim say them de serve God but them de use image for their worship for different-different ways, or they don be friends of the world somehow. (1 Chron. 5:25; Jas. 4:4) But Bible talk say people wey continue to serve God well dey “clean” and they be “virgin.” (2 Cor. 11:2; Rev. 14:4) Babylon for old time na place wey lie-lie worship really plenty. So Babylon the Great na all lie-lie worship together. True-true, Babylon the Great na all the lie-lie religion for this world.—Rev. 17:5, 18; check the article for our jw.org website wey be “What Is Babylon the Great?”

17. Wetin go happen to Babylon the Great?

¹⁷ Wetin go happen to Babylon the Great? Revelation 17:16, 17 answer that question like this say: “The ten horn wey you see and the big-wicked animal go hate the prostitute and they go destroy and naked the prostitute. They go eat e flesh and burn the prostitute finish with fire. Because God put-am inside their heart to do wetin e get for mind.” The truth na say, Jehovah go move the nations make they use the red big-wicked animal wey be United Nations, to attack all lie-lie religion together and destroy them kpatakpata.—Rev. 18:21-24.

18. How we fit make sure say we no get anything to do with Babylon the Great?

¹⁸ How this one concern us? We need to continue “the kind worship wey clean and fine for the eye of our God.” (Jas. 1:27) Babylon the Great de teach lie-lie things, de do celebrations wey Bible no support, they get low idea about wetin good and bad, and them de put hand for things wey concern demons. But make we no ever allow this things to affect us. And we go continue to warn people make they “comot from Babylon the Great,” so that God no go see them as people wey de join for the sins of Babylon the Great.—Rev. 18:4.

19. Who be the “big-red dragon”?

¹⁹ The book of Revelation still talk about “one big-red dragon.” (Rev. 12:3) This dragon fight Jesus and e angels. (Rev. 12:7-9) E attack servants of God and e give power to the big-wicked animals, wey be different-different government for this world. (Rev. 12:17; 13:4) Who be this dragon? Na “the original snake, the one wey them de call Devil and Satan.” (Rev. 12:9; 20:2) E de control all the other enemies of Jehovah.

20. Wetin go happen to the dragon?

²⁰ Wetin go happen to the dragon? Revelation 20:1-3 talk say one angel go throw Satan inside one abyss, and this one represent place like prison for Satan. For the abyss, Satan “no go de deceive the nations again until 1,000 years don end.” Last-last, they go throw Satan and e demons for “the lake of fire and sulfur.” This one mean say they go destroy Satan and e demons forever. (Rev. 20:10) Just think how life go be when Satan and e demons no go dey again. That time go really sweet no be small!

21. Why we fit dey happy about the things wey we don read for the book of Revelation?

²¹ E de really encourage us to understand the meaning of the signs for the book of Revelation! We don learn who the enemies of Jehovah be, and we don still see wetin go happen to them. True-true, ‘the person wey de read loud and people wey de hear the word them for this prophecy go dey happy’! (Rev. 1:3) But when God don destroy e enemies, which better things faithful people go enjoy? We go talk about that one for the next article.