Kwɛshilagbe 18 octobre
Mìwo Da ci yí le jeŋkwi mɛ, ao ŋkɔ le mɛ́.—Mt. 6:9, nwt.
Lɔnlɔn ci mìɖo nɔ Yehowa dɔ yí mìkɔnɔ yi ŋkɔ ŋci. Mìji mɔ mìawɛ nɔ yi ŋkɔ lɔ anɔ mɛmiɖe yí anu nɔ mɛbuwo mɔ enyɔdɔndɔn ciwo Satana nu so Yehowa nu nyi ŋsu. (Gɔnm. 3:1-5; Job 2:4; Ʒan 8:44) Le mìwo kunuɖeɖedɔ lɔ mɛɔ, mìji veviɖe mɔ mìahwlɛn ta nɔ mìwo Mawu yí anu nyɔnɔnwi ciwo yí kudo nu nɔ mɛ ciwo pleŋ yí aɖo eto mì. Mìji mɔ amɛshiamɛ lé nya mɔ lɔnlɔn yí nyi yi nɔnɔmɛ gangantɔ yí lé ekpanɔ acɛ do, le jɔjɔɛɖe yí gbesɔgbe yí sabaɖeyɛɔ, yi Fyɔɖuxu lɔ avaɖe efunkpekpewo pleŋ swi yí ahɛn fafa koɖo jijɔ va nɔ agbetɔ xomu lɔ. (Eha. 37:10, 11, 29; 1 Ʒan 4:8) Nɔ mìxokɔ nuxu nɔ amɛwo so mɛ ciŋmɛ Yehowa nyi nu le kunuɖeɖedɔ lɔ mɛɔ, anyi mìkɔkɔ yi ŋkɔ ŋci. Mìgbekpɔnɔ jijɔ ci mìnya mɔ, mìnɔkɔ agbe esɔkɔ koɖo mìwo ŋkɔ lɔ. w24.05 18 ¶12
Tɛnigbe 19 octobre
Vɔ nɔ èle azan ɖukɔɔ, yɔ wamɛnɔwo, mɛ ciwo yí xo kplɛ, mɛ ciwo shi afɔ dele o koɖo ŋkuvitɔnnɔwo; eyi eji ajɔ eo, ɖo ŋɖe dele wowo shi yí woasɔ ɖo tɔxu nɔ eo o. Vɔ woacu yi fɛn nɔ eo hwenu woafɔn amɛjɔjɔɛwo so ku.—Luiki 14:13, 14, nwt.
Nɔviŋsuwo, mídasɛ mɔ yewonyi “amɛdru xɔtɔ” nɔ míwanɔ nunywi nɔ mɛbuwo yi denyi míwo xlɔ veviwo ɖekɛwo yɔ o, vɔ mɛ ciwo yí trɔdo mí pleŋ. (1 Piɛ 4:9) Bibla gɔnmɛɖeɖe wema ɖeka nu mɔ “mɛ ci yí xɔnɔ amɛ mɛdru wanɔ xomɛvu nɔ amɛ ciwo yí dejeshi ɖɛ o yí egbesɔ jijɔ yí yɔnɔ wo va axo mɛ.” Biɔ eoɖeki se mɔ: ‘Wojeshiŋ ɖɛ mɔ ŋxɔnɔ amɛ mɛdrua?’ (Ebre. 13:2, 16) Mɛ ci yí xɔnɔ amɛ mɛdruɔ, émanɔ enu ciwo èɖo koɖo yi mɛdruwo, mɛ ciwo yí nyi wamɛnɔwo can le mɛ koɖo Yehowa sɛntɔ edɔsɛnsinwatɔwo shigbe ekán lɔ mɛ hamɛwo jikpɔtɔwo koɖo mɛ ciwo yí vanɔ yí nanɔ nuxuwo nɛ.—Gɔnm. 18:2-8; Elo. 3:27; Edɔ. 16:15; Rɔm. 12:13. w24.11 21 ¶6
Tanatagbe 20 octobre
Cugbejɛ ciwo yí le gbesɔsɔ lɔwo yi alɔlelezanɖuxu lɔ koɖi.—Mt. 25:10, nwt.
Le labalu cɛ mɛɔ, Yesu xo nuxu so cugbejɛ lealɔji ciwo yí jikɔ ado go nyɔnuɖetɔ ɖeka nu. (Mt. 25:1-4) Wo pleŋ ji mɔ yewoayi lé alɔ koɖo nyɔnuɖetɔ lɔ yí akpɔ jijɔ koɖi. Yesu dre mɛ mɔ amatɔn nyi “ŋdɛnyatɔwo” yí amatɔn kpɛtɛwo nyi “ŋɖɛmanyatɔwo.” Nɔ nyɔnuɖetɔ lɔ ava kabaa alo aji gamɛ can ɔ, cugbejɛ lealɔji ŋɖɛnyatɔ lɔwo dra wowoɖekiwo do yí anɔ te kpɔɛ nɔ égbenyi zandomɛ yɔ can. Eyi taɖo woje ami do wowo kaɖyigbanwo mɛ keŋ asɔ kpɔ enu zanmɛ. Wogbeje ami bu daɖɛ yí nɔ nyɔnuɖetɔ lɔ avaji gamɛ can ɔ, wowo zowo akpɔtɔ ajejeɛ. (Mt. 25:6-10) Hwenu yí nyɔnuɖetɔ lɔ vaɔ, cugbejɛ lealɔji ŋɖɛnyatɔ lɔwo yi alɔlele zanɖuxu lɔ koɖi. Ahanke Kristotɔ amɛshiaminɔ ciwo yí dasɛ mɔ yewole gbesɔsɔ keŋ le zanŋte yí gbele gbeji keke Kristo vava hwenu avaxɔ shicu ci yí nyi mɔ woabɔ do nyɔnuɖetɔ Yesu nu le jeŋkwi mɛ Fyɔɖuxu lɔ mɛ.—Enyɔ. 7:1-3. w24.09 21 ¶6