Kwɛshilagbe 20 septembre
Nɔ mívlɛ yí wɛ nɔ nɔvinyɛ hwɛhwɛtɔ cɛwo ɖeɔ, enyɛ yí míwɛ nɔ.—Mt. 25:40, nwt.
Le labalu ci yí kuso lɛngbɔ koɖo gbɔgbɔɛwo nu mɛɔ, Yesu nu mɔ lé amɛwo nɔ godu nɔ ye nɔviye amɛshiaminɔwo nu yí yeakpɔ do yí aɖo kojo nɔ amɛwo. (Mt. 25:31-46) Le “efunkpekpe gangan lɔ” mɛɔ, áɖo kojo jɔjɔɛ nɔ amɛwo, nɔ ekpɔtɔ hwɛɖeka yí Armagedɔn atɔ ji. (Mt. 24:21, nwt) Shigbe lé lɛngbɔkplɔtɔ ɖe manɔ lɛngbɔ koɖo gbɔgbɔɛwo mɛ nɛɔ, Yesu aɖe mɛ ciwo yí nɔ godu nɔ yi dokplɔtɔ amɛshiaminɔwo le mɛ ciwo yí denɔ godu nɔ wo mɛ. Bibla nyɔnuɖɛwo dasɛ mɔ Yehowa sɔ Yesu nɔ anyi Kojoɖotɔ yí aɖo kojo jɔjɔɛ nɔ amɛwo. (Ezai 11:3, 4) Álé ŋkuvi do lé amɛwo wanɔ nu do, lé wobunɔ tamɛ do koɖo enyɔ ci wonunɔ nu, koɖo lé wowakɔ nu ɖaɖa Kristotɔ amɛshiamɛnɔwo gbɔ do. (Mat. 12:36, 37; 25:40) Yesu avado jeshi mɛ ciwo yí kpedo nɔviɛ amɛshiaminɔwo nu yí wa edɔ koɖo wo. Emɔ ŋkɔtɔ ci ji woato yí ale shigbe lɛngbɔwo nɛ yí akpedo Kristo nɔviɛwo nu yí nyi kunuɖeɖedɔ lɔ. w24.09 20-21 ¶3-4
Tɛnigbe 21 septembre
Mí do enushanu kpɔ.—1 Tɛs. 5:21.
Mìatɛnŋ asɔ enu ciwo ji mìxɔ se sɔ sɔ koɖo enyɔ ciwo Bibla nu yí akpɔ mɔ wonyi nyɔnɔnwi ma. Le kpɔwɛ mɛ, bu tamɛ kpɔ so jajɛ ci yí xokɔ nu kpɔ mɔ yele veviɖe nɔ Mawu ma. Éɖo axɔ enyɔ ŋtɔ́ ji se kpoŋ ahan a? Oo, éɖo“ [ado] enushanu kpɔ” yí aji Yehowa susu so nyɔ lɔ nu. Nɔ mìhlɛnhlɛn Mawu Nyɔ lɔɔ, anyi “mìɖokɔ to” Yehowa yí exokɔ nuxu nɔ mì. Vɔ gbɔxwe mìatɛnŋ ajeshi yi susu so nyɔ ɖe koŋ nuɔ, eʒan agblajeje sugbɔ so mì gbɔ. Eʒan mɔ mìasɔ susu ɖo nyɔta ciwo yí kan mì le mìwo Bibla hlɛnhlɛn mɛ ji. Mìatɛnŋ azan dɔwanu ciwo yí habɔbɔ lɔ wa nɔ mì keŋ aji nugɔnmɛ kpɔ so nyɔ lɔ nu. (Elo. 2:3-6) Mìatɛnŋ ado gbe ɖaɖa nɔ Yehowa mɔ le dasɛ emɔ nɔ mì le enumɛkuku mìwotɔ mɛ yí akpedo mì nu nɔ mìakpɔ yi susuwo kudo enu ci yí xa mì lɔ nu. Le yi goduɔ, mìatɛnŋ aji Bibla gɔnmɛɖosewo koɖo enuŋtɔŋtɔ ɖewo ciwo yí akpedo mì nu le mìwo nɔnɔmɛ lɔ mɛ. w24.10 25 ¶4-5
Tanatagbe 22 septembre
[Lɔnlɔn] dejinɔ yiɖekɛ tɔ o.—1 Kor. 13:5.
Amɛ ci yí sɔ egoyiyi koɖo texwe gangan jiji sɔ kplɔkplɔ yiɖekiɔ, Yehowa dacu shi do yi gblajejewo ji o. (1 Kor. 10:24, 33; 13:4) Hweɖewonuɔ, Yesu xlɔ veviwo ŋtɔkpuwo can ji texwe ganganwo, ɖo susu dɔndɔnwo yí le tamɛ nɔ wo. Bu tamɛ kpɔ so enu ci yí jɔ do apotru Yesu tɔ amɛve ji, Ʒaki koɖo Ʒan. Wobiɔ Yesu mɔ yi le na texwe vevi gangan yewo le yi Fyɔɖuxu lɔ mɛ. Yesu dekanfu wo do enu ciwo wodrɔdrɔ lɔ ŋci o. Ewaɖeɔ, éɖe mɛ nɔ apotru 12 lɔwo pleŋ mɔ: “Nɔ míwo domɛtɔ ɖé jí mɔ́ ye a nyí mɛgan ɔ, lé nyí edɔwavi nɔ́ amɛ kpɛtɛwo pleŋ. Eyi nɔ́ amɛɖe jí mɔ́ ye a nyí ŋkɔnɔtɔ le mí mɛ ɔ, é ɖó a nyí hwashi nɔ́ amɛshamɛ.” (Maki 10:35-37, 43, 44, Ezoɖuɖu Yoyu Wema) Nɔ susu nywi ci yí nyi mɔ yeasumɔ mɛbuwo yí nɔviŋsu ɖe ɖoɔ, anyi shicu nɔ hamɛ lɔ.—1 Tɛs. 2:8. w24.11 15-16 ¶7-8