Kita kerina perlu penampat guna erban keputusen si penting bas geluhta. Banci sidat penampat e arah pertua bage pe arah turang senina si erpengalamen. Adi ndauh kalak e tuan asangken kita, ula min sianggap nasehatna e enggo ketadingen jaman. Ate Jahwe erlajar min kita arah kalak si enggo metua. Enggo dekahen kalak e nggeluh asangken kita, emaka buen pengalemenna, pengertinna, ras kepentarenna. Bas jaman Pustaka, igunaken Jahwe kalak si enggo metua si setia guna mpegegehi ras negu-negu umatNa. Contohna, igunakenNa Musa, Daud, ras Rasul Johanes. Teluna kalak e nggeluh bas jaman si berbeda janah situasi kalak e pe beda. Bas akhir kegeluhen kalak e, ibereken kalak e nasehat si pentar man kalak si terngudan. Ikataken kalak e maka penting kel patuh man Dibata. La soal asa kai umurta, banci sidat manpaat adi sipelajari nasehat e.— Rom. 15:4; 2 Tim. 3:16. w24.11 8 par. 1-2

Bas jaman Nuah, ilarang Jahwe manusia man dareh. (Kej. 9:​3, 4) UlihiNa ka larangen e bas undang-undang si berekenNa man bangsa Israel: “Ise pe si man dareh arus ibunuh.” (Im. 7:27) Jesus pe patuh man undang-undang e. (Mat. 5:​17-19) Emaka la mungkin isuruhna kalak Jahudi tuhu-tuhu man dagingna ras minem darehna. Sanga ikataken Jesus kerna daging ras darehna, si e gambaren ngenca. Pernah igunaken Jesus gambaren si bage guna ngajari sekalak diberu Samaria. Nina Jesus, “Lau si kubereken e . . . mereken kegeluhen si rasa lalap.” (Joh. 4:​7, 14) Labo ikataken Jesus maka arus tuhu-tuhu inem diberu arah Samaria e lau arah sumur tertentu gelah banci ia nggeluh seh rasa lalap. Bage ka pe, labo tuhu-tuhu isuruh Jesus gelah ipan jelma si enterem e daging Jesus ras inem kalak e darehna gelah banci kalak e ndatken kegeluhen si rasa lalap. w24.12 9 par. 4-6

Perbulangen si Saksi Jahwe arus hati-hati gelah la terpengaruh nandangi perukuren kalak si lit bas doni enda kerna diberu. Engkai? Salah sada alasenna perban perukuren sekalak jelma biasana mpengaruhi perbahanenna. Ipersingeti Rasul Paulus kalak Kristen i Roma, nina, “Ula nai kena ipengaruhi doni enda.” (Rom. 12:​1, 2) Sanga itulis Paulus surat e man kalak Roma, runggun e enggom ndekah lit. Arah kata-kata Paulus e banci siteh maka lit denga turang senina si terpengaruh budaya ras perukuren kalak si lit bas doni enda. Emaka inasehatina kalak e gelah ngubah perukuren ras perbahanenna. Nasehat e pe erguna ka man perbulangen si Saksi Jahwe. Sayangna, piga-piga arah kalak e pe ipengaruhi perukuren kalak si lit bas doni enda, janah kejam perbahanenna man ndeharana. w25.01 9 par. 4