Gundari, pertua-pertua seh kel sibukna. Kalak e eme perberita. (2 Tim. 4:5) Kalak e jadi usihen perban semangat erberita. Iaturken kalak e ka dahin erberita bas daerah runggunna, janah ilatihna turang senina gelah beluh erberita ras ngajar. Selain si e, kalak e pe jadi hakim si perkuah ras adil. Adi lit kalak Kristen si ngelakoken dosa si serius, usahaken pertua kel nampati ia gelah rembak mulihi ras Jahwe. Usahaken kalak e ka njaga runggun tetap bersih. (1 Kor. 5:​12, 13; Gal. 6:1) Dahin pertua si pentingna eme jadi permakan. (1 Pet. 5:​1-3) Peseh kalak e khotbah erpalasken Pustaka si enggo sikapkenna alu mehuli, usahaken kalak e nandai kerina turang senina bas runggun, ras ipermakani kalak e turang senina. Lit ka pertua si nampati bas proyek pembangunen ras ngerawat Bale Kerajan, ngaturken pertemuan regional, ngelayani jadi anggota Panitia Penghubung Rumah Sakit ras Kelompok Pengunjung Pasien, bage pe tugas-tugas si debanna. Jelas me, kerja keras kel pertua guna kita! w24.10 20 par. 9

Bas Pustaka, ikataken maka kita “ibebasken” perban tebusen enggo igalari. Nina Rasul Petrus, “Kena enggo ibebasken [aslina: “itebus”] arah kegeluhen si la erguna, si aloken kena arah nini bulang kena nari. Kena ibebasken labo alu barang si banci masap, bagi emas ntah pirak. Tapi kena ibebasken alu dareh Kristus si merga, bagi dareh anak biri-biri si la lit cacatna ras bersih.” (1 Pet. 1:​18, 19, bage pe cataten i teruh.) Perban dareh Jesus si meherga enggo iamburken guna nebus kita, banci kita ibebasken arah dosa ras kematen si erban melala kesusahen. (Rom. 5:21) Pasti ngata bujur kel kita man Jahwe ras Jesus perban enggo erkorban ia duana. w25.02 5 par. 15-16

Uga carana gelah la silakoken dosa serius? Jawapenna lit bas pengalamen sekalak anak perana si icatat bas Kuan-kuanen pasal 7. Ilakoken anak perana e perbahanen seks si salah ras sekalak diberu penggoda. Bas ayat 22 ikataken maka “mis” ikutkenna diberu e. Tapi, adi sinen ayat-ayat sebelumna, situhuna enggom iban anak perana e piga-piga keputusen si salah, si alu manjar-anjar erban ia ngelakoken dosa. Kai saja nge si ilakoken anak perana e sope ilakokenna dosa? Si pertama, sanga karaben, “lewat ia arah dalan ku rumah diberu e.” Kenca si e, teruskenna erdalan ku arah rumah diberu e. (Kua. 7:​8, 9) Dung e, sanga idahna diberu e, la ia mis lawes. Nggit ia iema diberu e, janah nggit ia megiken ranan diberu e. Ikataken diberu e maka enggo persembahkenna korban persadan, banci saja gelah iakap anak perana e ia kalak si mehuli. (Kua. 7:​13, 14, 21) Situhuna, adi la ilakoken anak perana e si e ndai kerina, reh nukahna kapna nulak godan janah la lakokenna dosa serius. w24.07 16 par. 8-9; 19 par. 19