7-قازان، سارسەنبى
وزدەرىڭە قۇداي ٴسوزىن ايتقان ٵرى ارالارىڭدا باسشىلىقتى قولعا العانداردى ۇمىتپاڭدار (ەۆر. 13:7).
ەحوبا ٶز حالقىنا قانداي دا ٴبىر تاپسىرما بەرسە، ونىڭ ۇيىمداسقان تۇردە اتقارىلعانىن قالايدى (قور. 1-ح. 14:33). مىسالى، سونداي تاپسىرمالاردىڭ ٴبىرى — ىزگى حاباردىڭ بۇكىل جەر بەتىندە ۋاعىزدالۋى (مات. 24:14). ەحوبا بۇل ىسكە جەتەكشى ەتىپ يسانى قويعان. يسا بۇل ٸستىڭ ۇيىمداسقان تۇردە اتقارىلۋىن قاداعالاپ وتىر. ٴبىرىنشى عاسىردا ٴتۇرلى جەرلەردە قاۋىمدار قۇرىلعاندا، باۋىرلاستارعا جەتەكشىلىك ەتىپ، باسشىلىق بەرەتىن اقساقالدار تاعايىندالعان (ەل. ٸس. 14:23). يەرۋساليمدە ەلشىلەر مەن تاجىريبەلى اقساقالداردان قۇرالعان باسقارۋشى كەڭەس ٴتۇرلى شەشىمدەر شىعارىپ وتىرعان، ال قاۋىمدار سول شەشىمدەردى ۇستانۋ كەرەك بولعان (ەل. ٸس. 15:2؛ 16:4). سول نۇسقاۋلارعا مويىنسۇنعاننىڭ ارقاسىندا «قاۋىمداعىلاردىڭ سەنىمى نىعايىپ، كۇننەن-كۇنگە سانى ارتا بەرگەن» (ەل. ٸس. 16:5). كم24.04 8-ب.، 1-ابز.
8-قازان، بەيسەنبى
ماعدالالىق ٴماريام شاكىرتتەرگە بارىپ: «مەن يەمىزدى كوردىم!»— دەپ حابارلادى (جوح. 20:18).
16-نيسان، تاڭعى ۋاقىت. ٴبىر توپ ادال ايەل يسانىڭ قابىرىنە كەلەدى (لۇقا 24:1، 10). ولاردىڭ اراسىندا ماعدالالىق ٴماريام دا بار ەدى. ٴماريام قابىرگە كەلگەندە، ونىڭ بوس تۇرعانىن كورەدى. سودان ول پەتىر مەن جوحانعا بارىپ، بولعان جايتتى ايتىپ بەرەدى دە، ۇشەۋى قايتادان سول جەرگە كەلەدى. قابىردىڭ بوس ەكەنىنە كوزى جەتكەن پەتىر مەن جوحان ۇيلەرىنە قايتىپ كەتەدى. ال ٴماريام بولسا سوندا قالىپ، جىلاپ تۇرادى. سول كەزدە يسا ٴبارىن كورىپ تۇرعانىن ول قايدان ٴبىلسىن؟! يسا بۇل ادال ايەلدىڭ كوز جاسىن كورىپ، جانى اشىپ كەتەدى. سوندىقتان يسا ٴماريامدى جىگەرلەندىرۋ ٷشىن وعان كورىنىپ، ونىمەن سويلەسەدى. ٴسۇيتىپ، يسا وعان وتە ماڭىزدى تاپسىرما بەرەدى: ٴماريام يسانىڭ قايتا تىرىلگەنىن شاكىرتتەرىنە جەتكىزدى (جوح. 20:17، 18). كم24.10 13-ب.، 7-ابز.
9-قازان، جۇما
مىسىر ەلىندە كوپتەگەن بەلگىلەر مەن كەرەمەتتەر كورسەتەمىن (مۇس. 2-ج. 7:3).
مۇسا پايعامبار، تورەشى، قولباسشى جانە تاريحشى بولعان. ول يسرايل حالقىن مىسىر قۇلدىعىنان الىپ شىقتى، سونداي-اق ەحوبانىڭ كوپ كەرەمەتىن ٶز كوزىمەن كوردى. كيەلى جازبالاردىڭ العاشقى بەس كىتابىن جازدى. سونىمەن قاتار ول ٴزابۇردىڭ 90-تاراۋىن جازدى، 91-تاراۋىن دا جازعان بولۋى مۇمكىن. ٵيۇپ كىتابىن دا مۇسا جازسا كەرەك. جاسى ٴجۇز جيىرماعا كەلگەن مۇسا كوز جۇمار الدىندا بۇكىل يسرايلدىكتەردى جيناپ، ولاردىڭ باسىنان وتكەندەردى ەستەرىنە سالدى. حالىق ەحوبانىڭ كورسەتكەن بەلگىلەرى مەن كەرەمەتتەرىنە، مىسىردى قالاي جازالاعانىنا كۋا بولعان (مۇس. 2-ج. 7:4). ولار قاق جارىلعان قىزىل تەڭىزدىڭ تۇبىمەن ٴجۇرىپ وتكەن جانە پەرعاۋىن مەن اسكەرىنىڭ كۇل-تالقانى شىققانىن كورگەن (مۇس. 2-ج. 14:29—31). ال ٴشول دالا كەزىپ جۇرگەندە، ەحوبا قۇداي ولاردى قاۋىپ-قاتەردەن ساقتاپ، كەرەگىمەن قامداعان. ەندى ولار ۋادە ەتىلگەن جەرگە اياق باسقالى تۇردى (مۇس. 5-ج. 8:3، 4). وسى سوڭعى مۇمكىندىكتى پايدالانىپ، مۇسا ولاردىڭ جىگەرىن قايرادى. كم24.11 8، 9-ب.، 3، 4-ابز.