Mga magurang, iandam an saindong aki na idepensa an saiyang pagtubod na igwa nin Kaglalang. Tibaad mahiling mong kapaki-pakinabang kun magkaibanan nindong pag-uulayan an mga artikulo sa jw.org sa seryeng “Tanong ng mga Kabataan—Paglalang o Ebolusyon?” Dangan puwede nindong pag-ulayan an paagi nin pagpaliwanag na sa hiling kan aki mo iyo an pinakanakakakumbinsir na paagi para tabangan an iba na masabutan an katotoohan manungod sa Kaglalang. Dagkahon siyang gumamit nin simpleng lohika asin pangangatanusan kun igwa sa saindang gustong pag-ulayan iyan. Halimbawa, tibaad sabihon kan kaeskuwela mo: “Naniniwala sana ako sa kun ano an nahihiling ko. An Diyos dai ko pa lamang nahiling.” Puwedeng isimbag nin sarong hoben na Kristiyano: “Imahinara na naglalakaw-lakaw ka sa kadlagan na harayo sa ano man na aktibidad nin tawo dangan nakahiling ka nin sarong bubon na puwedeng pagsakduhan. Ano an iisipon mo? Kun an pagkaigwa diyan nin sarong bubon nagpapahiling nin malinaw na ebidensiya na igwa nin intelihenteng persona na naggibo kaiyan, paano pa kaya an uniberso?” w24.12 18 ¶16

Gabos kita nangangaipo nin paggiya pag naggigibo nin mahahalagang desisyon sa buhay. Makakakua kita nin dakul na paggiyang arog kaiyan sa mga elder asin sa iba pang maygurang na mga Kristiyano. Kun mas maedad sindang marhay kisa sa sato, dai ta awtomatikong pag-isipon na lihis na sa panahon an mga sadol ninda. Gusto ni Jehova na makanuod kita sa mga may edad na. Kumpara sa sato, mas halawig na panahon na sindang nabubuhay kaya dakul na sindang eksperyensiya, pakasabot, asin kadunungan. Kan mga panahon kan Bibliya, naggamit si Jehova nin maimbod na mga may edad na para pakusugon asin giyahan an saiyang banwaan. Pag-isipan an halimbawa ni Moises, David, asin apostol Juan. Nabuhay sinda sa magkakalain na panahon, asin magkakaibang marhay an saindang mga kamugtakan. Kan nasa puro na sinda kan saindang buhay, nagtao sinda nin madunong na mga sadol sa mga mas hoben. Kada saro sa maimbod na mga may edad nang ini idinuon an kahalagahan kan pagigin makinuyog sa Diyos. Kita man hoben o may edad na, makikinabang kita sa pagsiyasat sa mga sadol na iyan.—Roma 15:4; 2 Tim. 3:16. w24.11 8 ¶1-2

Kan panahon ni Noe, ipinagbawal nin Diyos sa mga tawo an pagkakan nin dugo. (Gen. 9:3, 4) Inutro ni Jehova an pagbuot na iyan sa saiyang Katugunan para sa Israel. An siisay man na nagkakakan nin dugo “dapat na gadanon.” (Lev. 7:27) Sinunod ni Jesus an Katugunan na iyan. (Mat. 5:17-19) Kaya imposible nanggad na dadagkahon niya an grupong idto nin mga Judio na kakanon an saiyang literal na laman o inumon an saiyang literal na dugo. Nagtataram si Jesus sa piguratibong paagi, arog kan ginibo niya kaidto kan sabihon niya sa sarong Samaritana: “An tubig na itatao ko . . . [matao] nin buhay na daing katapusan.” (Juan 4:7, 14) Dai diyan buot sabihon ni Jesus na magkakaigwa an Samaritana nin buhay na daing katapusan paagi sana sa pag-inom nin partikular na literal na tubig. Kaagid kaiyan, dai niya man buot sabihon na an grupong idto nin mga tawo sa Capernaum mabubuhay nin daing sagkod kun kakakanon ninda an saiyang literal na laman asin iinumon an saiyang literal na dugo. w24.12 9 ¶4-6