To’o bôte be nga tibili wo, ô ne tabe ndi na Yéhôva a nye’e wo a na ô ne mfi mise mé. Nge ô ne ‘nleme ntya’an,’ te vuane na Yéhôva a nga yene mbamba be mame be ne wo nlem été a dutu wo be nye. (Jean 6:44) A ne nkômesane ya volô wo éyoñ ése amu ô ne édima e mise mé. Bi ne yé’é abui mam a lat a avale Yéhôva a wô’ôtan éyoñe bia fombô éve’ela Yésus. Éyoñe Yésus a nga too a bo’ok ésaé nkañete jé si va, a nga yene bôte ba bevo’o be mbe be biasé’é, ane a nga mvamane be. (Matt. 9:9-12) Éyoñe minga éziñ a mbe a konô’ô ngul ôkon a nga nambe biyé bi Yésus, a mbe a yeme’e na a ye bo mvo’é. Yésus a nga volô nye nlem a se’e nye amu mbunane wé. (Marc 5:25-34) Yésus a kôme vu mefulu me Ésa wé. (Jean 14:9) Nde ñhe, ô ne tabe ndi na Yéhôva a yene na ô ne mfi. A yeme fe mbamba mefulu môé, aval ane fulu mbunan a nye’ane wo liti nye. w24.10 af. 7 ab. 4-5

Ényiñe jé ése, David a nga tôban abui minjuk é nga bo na a yôn. Bôte béziñe be nga wosane nye, to’o bôt a mbe a too be ndi be nga koñe nye. (1 Sam. 19:10, 11; 2 Sam. 15:10-14, 30) Éyoñ éziñ a nga tili na: “Me ju’uya a ntate wom; alu ése ma bo énoñe jam é yeebe yôp; ma sôé mili’i mam énoñe jam.” (Bsa. 6:6) Akusa bo minju’u mise David a nga tôbane mie, a mbe a too ndi na Yéhôva a nye’e nye. A nga tili na: “Yéhôva a [ye] wô’ô tyiñe ya du dam.” (Bsa. 6:8) Mejô ya éfuse ya bia fass den ma liti bia abim avé Yéhôva a nyoñe ngap a bia. David a mbe a wô’ôtane ve ane Yéhôva a tôkane mili’i mé ndek nge tili me e kalate éziñ. David a mbe a too ndi na Yéhôva a yene nju’u wé a na a simesane nye. David a mbe fe a too ndi na Ésa wé ya yôp été a yeme ki fo’o ve njuk a nga tôbane wô, ve a yeme fe abim avé njuk ôte ô nga ndeñele nye. w24.12 af. 22 ab. 11-12

Ane ô vaa na bia yiane ve ngule ya yaé nsisim a bo bitôtôlô, ve bia yiane fe jeñe na bi bo bitôtôlô bekristen éyoñ ése. Nalé a tinane na bia yiane sa’ale ôlame ya dañe tabe ndi a biabebien. (1 Cor. 10:12) Bia yiane “ke ôsu a yemelane” nge bia yaé nsisim. E kalate nlômane Paul a nga tili Becolossien, a nga beta ngôné mfi ya bo bitôtôlô nsisim. Akusa bo bekristene bete be mbe be ntoo bitôtôlô, ve Paul a nga kate be na ba yiane tabe ntyele na be bo teke jô’é na asimesane ya émo é wone be. (Col. 2:6-10) Épaphras a mbe a kôme yeme bibu’a bise ya ékôane bekristen, jôme te nje a mbe a ye’elane mban asu na bi “ke ôsu a bo bitôtôlô bekristen.” (Col. 4:12) Ñye’elan ôvé bi ne nyoñ? Paul ba Épaphras be nga kôme wô’ô na asu na môt a bo étôtôlô nsisim, émien a yiane kôme saé ngul, a yiane fe sili Zambe mvolan. Be mbe be yi na Becolossien be ke ôsu a bo étôtôlô nsisim akusa bo minju’u be mbe be tôbane mie. w24.04 af. 6-7 ab. 16-17