David a bi hônba ngandak mandutu makeñi, i i bi boñ le gwiiha bi kuli nye. Ngim bôt i bé oo nye, yak i bet a bé bôdôl ñem ba bi nwéha nye nyuu. (1 Samuel 19:​10, 11; 2 Samuel 15:​10-14, 30) Njôghe i bi nai nye kayéle a tila le: “Manjelel mem ma nwéés me; u wonsôna, me nyôôs boñ yem ni gwiiha; ngandak maéya i mboñ le nañi yem i leñel.” (Tjémbi 6:6) Tolakii David a bé ikété njiiha, a bé nkwoog nkaa le Yéhôva a ngwés nye. A tila le: “Yéhôva a ga nok maéya mem.” (Tjémbi 6:8) Bibuk bi buk kel len bi ñunda le Yéhôva a ngwés bés ngandak, a ntôñ ki inyu i yom di nôgda. David a bé nôgda ndigi wee Yéhôva a bé tééda gwiiha gwé i ngim pôs, tole a bé tila gwo i ngim kaat. David a bé nkwoog nkaa le Yéhôva a bé yimbe mangéda momasôna a bé nok ndutu, a bigdaga i njôghe a bi bana. A bé yi le Tata wé nu gwéha a bé yi ndik bé mandutu mé, ndi yak njôghe ma bé nôgha nye. w24.12 22 § 11-12

Di nlama boñ biliya i nañ i pes mbuu, ni i ke ni bisu i hol. Inyu hala nyen di nlama bé lôôha bôdôl bésbomede ñem. (1 Korintô 10:12) Di nlama “ke ni bisu i wanba” inyu tehe too di nke ni bisu i hol. Mu i kaat ñôma Paul a tilna lôk kéé i Kôlôsé, a bi yigye mahee ma yé i hol i pes mbuu. To hala kiki ba bé ba ma yila minhôôlak mi bikristen, Paul a bi béhe bo le ba yoñ yihe ni mahoñol ma nkoñ ’isi. (Kôlôsé 2:​6-10) Yak Épafras nu a bé yi lôk kéé i likoda li Kôlôsé loñge loñge, a bé soohe hiki ngéda le ba “pam i ba nyonok,” tole nhôôlak. (Kôlôsé 4:12) Bimbe biniigana di nla ôt mu? Paul bo Épafras ba bi nok le i ke ni bisu i ba nhôôlak i mbat biliya bi ngui, ni mahôla ma Nyambe. Ngôñ yap i bé le lôk kéé i Kôlôsé i kee ni bisu i ba minhôôlak mi bikristen to hala kiki ba bé boma mandutu. w24.04 6-7 § 16-17

I ngéda di nkon Yéhôva woñi, di mpam i gwés nye ngandak kayéle di mboñ bé jam jo ki jo li li mbébél nye. Di nyamnda ni ngôñ i nigil maselna ma yé ipôla loñge ni béba, ipôla maliga ni bitembee, inyu pam i lémél Yéhôva. (Bingéngén 2:​3-6; Lôk Héber 5:14). Ibale di nkon bôt ba binam woñi iloo Nyambe, di nla ke haa ni maliga. Di yoñ hihéga hi 12 baane ba ba bi ke i pôôbe nkoñ Yéhôva a bi bôn bon ba Israel. Inyu jôm li bôt ba mbep mu ikété yap, i woñi ba bé kon bon ba Kanaan, u bé loo i woñi ba bééna inyu Yéhôva. Ba bi kal bana bon ba Israel bape le: “Di nla bé jôs bôt ba loñ i, inyule ba gwé ngui iloo bés.” (Ñañga bôt 13:​27-31) I litehge li bôt ba binam, bôt ba Kanaan ba bééna ngui. hala a bé maliga Ndi i mut a bé hoñol le bon ba Israel ba bé bé le ba yémbél baoo bap, a bé yi toi bé njee a yé Yéhôva. w24.07 9 § 5-6