I ngéda di nkon Yéhôva woñi, di mpam i gwés nye ngandak kayéle di mboñ bé jam jo ki jo li li mbébél nye. Di nyamnda ni ngôñ i nigil maselna ma yé ipôla loñge ni béba, ipôla maliga ni bitembee, inyu pam i lémél Yéhôva. (Bingéngén 2:​3-6; Lôk Héber 5:14). Ibale di nkon bôt ba binam woñi iloo Nyambe, di nla ke haa ni maliga. Di yoñ hihéga hi 12 baane ba ba bi ke i pôôbe nkoñ Yéhôva a bi bôn bon ba Israel. Inyu jôm li bôt ba mbep mu ikété yap, i woñi ba bé kon bon ba Kanaan, u bé loo i woñi ba bééna inyu Yéhôva. Ba bi kal bana bon ba Israel bape le: “Di nla bé jôs bôt ba loñ i, inyule ba gwé ngui iloo bés.” (Ñañga bôt 13:​27-31) I litehge li bôt ba binam, bôt ba Kanaan ba bééna ngui. hala a bé maliga Ndi i mut a bé hoñol le bon ba Israel ba bé bé le ba yémbél baoo bap, a bé yi toi bé njee a yé Yéhôva. w24.07 9 § 5-6

Baa di gwé manjom malam i bôdôl bikééhene bi Yéhôva gwobisôna ñem? Ñ! Kiki Abraham a bi tibil nok,Yéhôva “Nkéés nu hisi hiosôna” a yé peles, a gwé pék yosôna, a yôni ki ni konangoo. A bi niiga Man wé, a ti ki nye kunde i kéés mam momasôna. (Yôhanes 5:22) Bo iba, Isañ ni Man ba nla añ miñem mi bôt bobasôna inyu yi ibale mut a nlembe. (Matéô 9:4) Hiki mut ba ga kéés, ba ga kéés nye i nya “i téé”! Di bôdôl makidik momasôna Yéhôva a nyoñ ñem. Di neebe le di kôli bé i kéés ndi nye a kôli! (Yésaya 55:​8, 9) Jon di nwas bikééhene gwobisôna i moo mé ni ma Man wé, Kiñe i i nkôna telepsép ni konangoo i Isañ i nya i yôni.​—Yésaya 11:​3, 4. w24.05 7 § 18-19

Di nla nigil ngandak inyu nseñ i bana ñem maliga, i ngéda di mbigda ngélé bisu Yésu a bi boma Natanael. I ngéda Filipô a bi kena liwanda jé Natanael i boma Yésu, jam li hélha li bi bôña i kel i. Tolakii Yésu a bé ngi tehe Natanael, a kal le: “Nuna-ki! Bañga man Israel nu a gwé bé mandon.” (Yôhanes 1:47) A bé tehe jam li tôbôtôbô yak Natanael. Natanael a bé kwéha mut kiki bés, ndi a bé bé mut mandon, a bé maliga ikété mam momasôna. Hala a bé lémél Yésu ngandak, a bégés ki nye. Libim li mam ba mbat bés le di boñ i kaat Tjémbi 15 li nlémél Yéhôva li ntihba ki maada més ni bôt bape. Tjémbi 15:3 a nkal le i mut Yéhôva a nleege i ndap yé libadô “a ñôbôs bé mut jôl ni hilémb hié, a mboñ bé to mut wé libôk béba, a ñôm bé ki to mawanda mé nsohi.” Ibale di mbep gwélél hilémb hiés kiki ba nkal munu nlôñ unu, di yé le di bep nôgha bôt bape njôghe.​—Yakôbô 1:26. w24.06 10 § 7, 9; 11 § 10