Loko hi yendla swiboho, lirhandzu li ta hi pfuna ku rhangisa leswi laviwaka hi van’wani ku tlula leswi hina hi swi lavaka. (1 Ko. 10:23, 24, 32; 1 Tm. 2:9, 10) Ku pimisa hi leswo, swi ta hi pfuna ku yendla xiboho lexi nga ta kombisa swaku ha va rhandza funtshi ha va hlonipha vanhu van’wani. Loko u lava ku yendla xiboho xa lisima hintamu, u fanele u pimisa kahle hi hinkwaswu leswi nga ta laveka ka xiboho lexi u nga ta xi yendla. Hi xikombiso, Yesu a vule leswaku loko munhu a lava ku yaka yindlo a fanele a rhanga hi ‘ku tshama hansi a hamba tikonta.’ (Luk. 14:28) Leswi nge, u fanele u pimisa hi swaku swi ta lava nkama muni, male muni ni swaku swi ta lava u yendla yini leswaku xiboho lexi u nga ta xi yendla xi famba kahle. Minkama yin’wani swi nga ha lava u kombela mavonelo ka ndjangu wa wena hikusa van’wani andjangwini va nga ha va ni mavonelo lawa ma nga ku pfunaka leswaku u yendla xiboho xaxinene. Phela loko u kombela mavonelo ka vandjangu wa wena leswaku u yendla xiboho, swi ta va kahle hikusa swi ta yendla leswaku hinkwenu mi tirhisana kuva swilo swi famba kahle. Murindzi 01/25 mapaj. 18-19 mapar. 14-15

Esaya a hi byela nchumu xin’wani lexi hi yendlaka hi “tsaka” hileswi hi nga ka paradesi la ku fanekisela. Phela paradesi leli li yendliwe hi Yehovha. (Esa. 65:18, 19) Se swa twala ku va Yehovha a hi tirhisa leswaku hi pfuna vanhu va huma ka tinhlengeletanu ta misava leyi, leti kalaka ti nga djondzisi ntiyiso hi Xikwembu hi tlhela hi va pfuna leswaku va nghena ka paradesi leli la ku fanekisela la ku saseka swinene. Phela swa hi tsakisa ku tikhorisa hi minkateko leyi hi nga na yona hi mhaka ya leswi hi tivaka ntiyiso; naswona swi hi yendla hi lava ku pfuna vanhu van’wani swaku na vona va tikhorisa hi minkateko yoleyo. (Yer. 31:12) Hi tsake hintamu hi ntshembo lowu hi nga na wona hileswi hi lumbaka paradesi la ku fanekisela. A Bibele li hi tshembisa swaku hi ‘ta yaka tiyindlo hi tshama ka tona; hi ta rima masimu ya mawuvha hi dla mihandzu ya wona.’ ‘A hi nge he tirhi mahala’. Yehovha a hi tshembisa swaku a ta hi sirhelela naswona a ta hi katekisa. A tlhela a vula swaku a ta hi nyika hinkwaswu leswi hi swi lavaka. Yena wa swi tiva leswi hi swi lavaka naswona a ta “nyika hinkwaswu leswi hanyaka leswi swi swi navelaka.” — Esa. 65:20-24; Ps. 145:16. Murindzi 04/24 mapaj. 22-23 mapar. 11-12

Yehovha a ta va Ribye la hina loko hi mu tshemba hi ku helela. Naswona ha tiyiseka hi ku helela swaku loko hi yingisa Yehovha hambiloko hi kumana ni swikarhatu hi ta pfuneka. (Esa. 48:17, 18) Loko hi ya hi vona Yehovha a hi pfuna, hi ya hi tiyiseka swaku Yehovha hi yena ntsena lweyi a nga hi pfunaka swaku hi tiyisela hi tlhela hi hlula swikarhatu swa hina, ku nga na mhaka swaku i swikulu ku fikela kwini. Ku fana ni ribye lalikulu kumbe ntshava, a wumunhu la Yehovha ni swikongomelo swa yena a swi txintxi. (Mal. 3:6) Nkama lowu Adamu na Evha va nga djikela Yehovha, yena a nga txintxanga xikongomelo xa yena hi vanhu. Mupostolo Pawulo a vule swaku Xikwembu a xi “nge tiyali.” (2 Tm. 2:13) Leswo swi vula swaku hambi ko yendleka yini, Yehovha a nga ta tshuka a txintxa ndlela leyi a yendlaka hi yona swilo, swikongomelo swa yena ni minawu ya yena. Se, hi nga mu tshemba Yehovha Xikwembu xa hina, lexi kalaka xi nga txintxi; hi tlhela hi tiyiseka swaku minkama hinkwayu a ta hi pfuna loko hi kumana ni swikarhatu, a tlhela a hetisisa switshembiso leswi a swi yendlaka swa nkama lowu taka. — Ps. 62:6, 7. Murindzi 06/24 mapaj. 27-28 mapar. 7-8