Loko ku ni nchumu lexi hi kalaka hi nga xi twisisi kahle, swi lava leswaku hi li djondza Bibele kuva swi basa ka nhloko ya hina. Hi xikombiso pimisa hi jovhem leli kanakanaka leswaku indjhe i la lisima ka Yehovha? Li nga yendla yini leswaku li lulamisa mimpimiso leyo? Swi lava leswaku li kambela minchumu hinkwayu hi ku va li djondza Bibele kuva li tiva leswaku Yehovha a li vonisa ku yini. Nkama lowu hi lerhaka Bibele, hi va hi twa leswi Yehovha a hi byelaka swona. Kambe leswaku hi twisisa ndlela leyi Yehovha a pimisaka hi yona kumbe leyi a titwaka hi yona hi xiyimu lexi hina hi nga ka xona, hi fanele hi yendla swa ku tlula ku lerha ntsena. Hi fanele hi hamba mapexkiza leswaku hi yi twisisa kahle mhaka yoleyo. Hi nga ha tirhisa mabuku ni swilo swin’wani leswi nhlengeletanu yi hi nyikaka swona leswaku swi hi pfuna ku twisisa Bibele. (Swiv. 2:3-6) Na hi nge se djondza, hi fanele hi khongela hi kombela swaku Yehovha a hi pfuna ku twisisa ndlela leyi a titwaka hi yona ka swilo leswi hi nga ta djondza hi swona. Murindzi 10/24 paj. 25 mapar. 4-5

Yehovha a nga ta yi katekisa minzamu ya vanhu lava va tibyelaka ni lava va tilavelaka leswi pfunaka vona ntsena. (1 Ko. 10:24, 33; 13:4) Mhaka leyi ya ku tibyela kumbe vanhu va tivona na va li va lisima ku tlula van’wani, yi va yendlekelile hambi hi vapostolo va Yesu. Hi xikombiso, siku lin’wani Yakobe na Yohani va kombele Yesu leswaku a va nyika xitshamu xa ku hlawuleka ka Mfumu wa yena. Yesu a tirhise nkama wolowo leswaku a va pfuna vapostolo va yena leswaku va lulamisa mavonelo ya vona. A byele vapostolo va yena hinkwavu va 12 a ku: “Lweyi a navelaka ku va wamukulu xikarhi ka n’wina a fanele a va mutirhi wa n’wina.” (Mar. 10:35-37, 43, 44) Leswi swi hi djondzisa swaku loko makwerhu a lwela ku va mupfunisi wa bandla hileswi a lavaka ku pfuna van’wani, a ta va nkateko wawukulu ka vamakwerhu abandleni. — 1 Tes. 2:8. Murindzi 11/24 mapaj. 15-16 mapar. 7-8

Loko hi yendla swiboho, lirhandzu li ta hi pfuna ku rhangisa leswi laviwaka hi van’wani ku tlula leswi hina hi swi lavaka. (1 Ko. 10:23, 24, 32; 1 Tm. 2:9, 10) Ku pimisa hi leswo, swi ta hi pfuna ku yendla xiboho lexi nga ta kombisa swaku ha va rhandza funtshi ha va hlonipha vanhu van’wani. Loko u lava ku yendla xiboho xa lisima hintamu, u fanele u pimisa kahle hi hinkwaswu leswi nga ta laveka ka xiboho lexi u nga ta xi yendla. Hi xikombiso, Yesu a vule leswaku loko munhu a lava ku yaka yindlo a fanele a rhanga hi ‘ku tshama hansi a hamba tikonta.’ (Luk. 14:28) Leswi nge, u fanele u pimisa hi swaku swi ta lava nkama muni, male muni ni swaku swi ta lava u yendla yini leswaku xiboho lexi u nga ta xi yendla xi famba kahle. Minkama yin’wani swi nga ha lava u kombela mavonelo ka ndjangu wa wena hikusa van’wani andjangwini va nga ha va ni mavonelo lawa ma nga ku pfunaka leswaku u yendla xiboho xaxinene. Phela loko u kombela mavonelo ka vandjangu wa wena leswaku u yendla xiboho, swi ta va kahle hikusa swi ta yendla leswaku hinkwenu mi tirhisana kuva swilo swi famba kahle. Murindzi 01/25 mapaj. 18-19 mapar. 14-15