Mi tsaʼ lac wen chajpa lac bʌ mach wen wocolic mi caj la cubin chaʼan mi lac subeñob wen tʼan jiñi lac piʼʌlob. Jesús tsiʼ chajpa jiñi xcʌntʼañob i chaʼan cheʼ bʌ muʼto caj i majlelob ti subtʼan (Luc. 10:​1-11). Come tsaʼʌch i meleyob cheʼ bajcheʼ tsaʼ cʌntesʌntiyob, tijicña tsiʼ yubiyob chaʼan tsaʼ bʌ i meleyob ti subtʼan. ¿Bajcheʼ miʼ mejlel lac chajpan lac bʌ chaʼan jiñi subtʼan? Laʼ lac wen ñaʼtan bajcheʼ miʼ mejlel lac tsictesan muʼ bʌ i yʌl jiñi Biblia ti lac bajñel tʼan. Laʼ lac wʌn ñaʼtan chuqui miʼ mejlel i subeñoñobla jiñi lac piʼʌlob i bajcheʼ miʼ mejlel lac jacʼ. Cheʼ bajcheʼ jiñi, cheʼ yaʼix añonla ti subtʼan maʼañic mi caj laj cajel ti bʌqʼuen i wen jach mi caj lac chaʼlen tʼan. w24.04 16 párr. 6, 7

Mi lac chaʼlen subtʼan come mi laj cʼuxbin Jehová yicʼot i cʼabaʼ, jiñʌch jiñi ñumen ñuc bʌ i cʼʌjñibal. Chaʼañonla, jiñi subtʼan jiñʌch junchajp bajcheʼ mi la cʌqʼuen i ñuclel Jehová. Cheʼʌch mi la cʌl bajcheʼ muʼ bʌ i yʌlob jiñi añoʼ bʌ ti panchan: «Jatet c Dioset lojon, yom bʌ maʼ wʌqʼuentel cabʌl a ñuclel yicʼot a pʼʌtʌlel». ¿I bajcheʼ mi la cʌqʼuen i ñuclel? Jiñʌch cheʼ mi lac subeñob yambʌ lac piʼʌlob muʼ tac bʌ i pʌs chaʼan Jehová jiñʌch tsaʼ bʌ i mele pejtelel chuqui an yicʼot chaʼan jiñʌch tsaʼ bʌ i meleyonla. ¿I bajcheʼ mi la cʌqʼuen lac pʼʌtʌlel? Jiñʌch cheʼ bʌ mi laj cʼʌn lac tiempo, laj cuxtʌlel, yicʼot an tac bʌ lac chaʼan chaʼan mi lac chaʼlen subtʼan cheʼ bajcheʼ cʼamel mi lac mejlel (Mat. 6:33; Luc. 13:24; Col. 3:23). Ti tsʼitaʼ bʌ tʼan, mi lac mulan la cʌcʼ ti cʌjñel jiñi lac Dios muʼ bʌ lac wen cʼuxbin. I la com la cʌcʼ ti cʌjñel i cʼabaʼ yicʼot baqui bʌ i sujmlel jiñi i cʼabaʼ. w24.05 17 párr. 11

Jehová miʼ yʌqʼueñonla ili ora tijicñʌyel yicʼot ñʌchʼtʌlel, i ti talto bʌ qʼuin mi caj lac chumtʌl tiʼ pejtelel ora. La cujil chaʼan Jehová yomʌch i yʌqʼueñonla lac majtan i an i pʼʌtʌlel chaʼan miʼ mel. Ili miʼ ñijcañonla chaʼan mi lac chaʼlen wersa lac melben i yeʼtel, cheʼʌch bajcheʼ tsiʼ meleyob i wiñicob ti wajali. Laʼ laj qʼuel tiʼ tojlel Timoteo (Heb. 6:​10-12). Timoteo tsiʼ wen ñopo chaʼan Jehová mucʼʌch caj i yʌqʼuen i majtan (1 Tim. 4:10). Jin chaʼan tsiʼ chaʼle tsʌts bʌ eʼtel tiʼ tojlel Jehová yicʼot yambʌlob. ¿Chuqui tsiʼ mele? Jiñi apóstol Pablo tiʼ sube chaʼan yom miʼ chaʼlen wersa chaʼan wem bʌ xcʌntesa yicʼot chaʼan wem bʌ ejemplo tiʼ tojlel jiñi xcolelob yicʼot jiñi añobix bʌ i jabilel. Tsaʼ aqʼuenti eʼtel tac mach bʌ cʼuñic ti melol, tsaʼ subenti chaʼan yom miʼ ticʼob yambʌlob (1 Tim. 4:​11-16; 2 Tim. 4:​1-5). Timoteo yujil chaʼan Jehová wolʌch i qʼuel i mi caj i yʌqʼuen i majtan (Rom. 2:​6, 7). w24.06 22, 23 párr. 10, 11