Ti lac pejtelel i cʼʌjñibal lac chaʼan mi laj coltʌntel chaʼan wen chuqui mi lac yajcan lac mel. Jiñi ancianojob yicʼot yambʌ hermanojob añobix bʌ i ñaʼtʌbal miʼ mejlel i coltañoñobla. I mi ñoxobix jiñi hermanojob muʼ bʌ i yʌqʼueñoñobla ticʼojel mach yomic mi lac ñaʼtan chaʼan maʼañic i cʼʌjñibal jiñi woli bʌ i yʌlob. Jehová yom chaʼan mi laj cʌn tiʼ tojlelob come cabʌlix chuqui ñusʌbilob i chaʼan, ñumen añobix i ñaʼtʌbal yicʼot muqʼuix i ñumen chʼʌmbeñob i sujm. Ti wajali, Jehová tsiʼ cʼʌñʌ xucʼul bʌ wiñicob añobix bʌ i jabilel chaʼan miʼ coltan yicʼot miʼ tojʼesan majlel i tejclum. Laʼcu lac ñaʼtan tiʼ tojlel Moisés, David yicʼot jiñi apóstol Juan. Ili wiñicob mach junlajalic baqui tsaʼ ajñiyob yicʼot chuqui tac tsiʼ ñusayob, i cheʼ bʌ tsʼitaʼ jachix yom chaʼan miʼ chʌmelob tsiʼ yʌqʼueyob ticʼojel jiñi maxto bʌ wen ñoxobic. Tiʼ yuxticlelob tsiʼ yʌlʌyob chaʼan wen ñuc i cʼʌjñibal cheʼ mi lac jacʼben i tʼan Dios, i Jehová tsiʼ yʌcʼʌ chaʼan miʼ tsʼijbuntel ti Biblia jiñi tsaʼ bʌ i yʌlʌyob. Ili ticʼojel tac miʼ mejlel i coltañonla ti lac pejtelel, mach yʌlʌyic mi xcolelontola o ñumen añix lac jabilel (Rom. 15:4; 2 Tim. 3:16). w24.11 8 párr. 1, 2

Cheʼ tiʼ yorajlel Noé, Dios tsaʼix i yʌlʌ chaʼan mach yomic miʼ cʼuxtʌl jiñi chʼichʼ (Gn. 9:​3, 4). I cheʼ bʌ tsiʼ yʌcʼʌ jiñi Mandar, tiʼ sube jiñi israelitajob chaʼan mi an majqui miʼ cʼux chʼichʼ yom miʼ «chojquel loqʼuel tiʼ tojlel i piʼʌlob», yom i yʌl chaʼan miʼ tsʌnsʌntel (Lv. 7:27). Jesús tsiʼ yʌlʌ chaʼan yomʌch miʼ jajqʼuel jiñi Mandar tsaʼ bʌ ajqʼui (Mat. 5:​17-19). Ili miʼ pʌs chaʼan mach jiñic woli i taj ti tʼan chaʼan yom miʼ junyaj cʼuxbentel i bʌcʼtal yicʼot miʼ japbentel i chʼichʼel (Juan 6:54). Tsiquil chaʼan tsaʼ bʌ i yʌlʌ Jesús tsaʼ jach i cʼʌñʌ bajcheʼ lajiya chaʼan miʼ yʌqʼuen i ñaʼtan jiñi woli bʌ i pejcañob. I mach cojaxto tsiʼ mele bajcheʼ jiñi, cheʼ bʌ tsiʼ pejca juntiquil samaritana tiʼ sube: «Jiñi jaʼ muʼ bʌ cʌqʼuen [ . . . ] miʼ yʌcʼ cuxtʌlel mach bʌ añic miʼ jilel» (Juan 4:​7, 14). Jesús maʼañic woliʼ suben jiñi samaritana chaʼan yom miʼ jap jiñi jaʼ loqʼuem bʌ ti jumpʼejl pozo chaʼan miʼ taj i cuxtʌlel. I cheʼ bʌ tsiʼ pejca jaʼel jiñi judíojob maʼañic woliʼ subeñob chaʼan yom miʼ junyaj cʼuxbeñob i bʌcʼtal yicʼot miʼ japbeñob i chʼichʼel chaʼan miʼ tajob i cuxtʌlel. w24.12 9 párr. 4-6

Jiñi hermanojob ili ora yomʌch miʼ cʌntañob i bʌ jaʼel chaʼan mach cheʼic miʼ ñaʼtañob cheʼ bajcheʼ miʼ ñaʼtañob jiñi lac piʼʌlob. ¿Chucoch? Come lʌcʼʌl tiʼ pejtelel ora, jiñi muʼ bʌ lac ñaʼtan cheʼʌch miʼ cʼotel lac mel. Jumpʼejl ejemplo, Pablo tsiʼ yʌqʼue ticʼojel jiñi hermanojob añoʼ bʌ ti Roma, cheʼ ti ñaxam bʌ siglo, jumpʼejl congregación baqui laj ungidojob. Pero Pablo tiʼ subeyob: «Cʌyʌ laʼ tsajcʌben i melbal jiñi quixtañujob ti ili pañimil» (Rom. 12:​1, 2). Ili miʼ pʌs chaʼan an hermanojob cheʼto bʌ miʼ ñaʼtañob yicʼot miʼ melob bajcheʼ jiñi yambʌ lac piʼʌlob. Jin chaʼan, Pablo tiʼ subeyob chaʼan yom miʼ qʼuextañob i pensar yicʼot i melbal. Ili ticʼojel ñucʌch i cʼʌjñibal jaʼel ili ora tiʼ tojlel jiñi hermanojob, come an cheʼ bʌ miʼ cʼotel i ñaʼtañob bajcheʼ jiñi lac piʼʌlob i tajol anto i ticʼlayob i yijñam. w25.01 9 párr. 4