Ku mwono wenyi, Ndawichi kapalikile mu kapinda munji yoze wamulilishile. Iye kapwile ni akwa-kole anji. Chipwe lume amwe a kuli masepa ni asoko jenyi, kakashishikile kuli iye, nawa kamulingile yuma yipi. (1 Samue. 19:10, 11; 2 Samue. 15:10-14, 30) Ha amwe mashimbu akalu chinji ku mwono wenyi, Ndawichi yasoneka ngwenyi: “Yikatalo ngunevu ya mikuma yami. Ufuku weswe nakuulisa muhela wami ni masoji. Nakuhinjila muu wami ni masoji jami.” (Samu 6:6) Chipwe ngwe Ndawichi kapalikile mu yipikalo yinji, nihindu kapwile ni shindakenyo ngwenyi, Yehova kakumuzanga. Iye yasoneka ngwenyi: “Yehova hanevu liji lia kulila chami.” (Samu 6:8) Yehova kakutuzanga chinji nawa kakulihulumba ha chize twakulivwa. Ndawichi kambile ngwenyi, chapwile ngwe Yehova kanakungu masoji jenyi mu umwe mulangi, hanji kwasoneka mu umwe mukanda. Ndawichi kapwile ni shindakenyo ngwenyi, Yehova kamwene lamba lienyi ni kuliewuluka. Iye kapwile nawa ni shindakenyo ngwenyi, Yehova kakanyingikine wika yize apwile ni kupalika, alioze ni chize yuma yacho yakwachile ku mwono wenyi. w24.12 22 ¶11-12

Yetu kutwatambile wika kusa tachi hanga tujame ku ufulielo, alioze twatamba nawa kulikolweza hanga tufunge ufulielo wacho. Maliji wano kanalumbunuka ngwo, twatamba kwehuka kulijikijila chinji yetwene. (1 Kori. 10:12) Twatamba nawa ‘kulihengwola yetwene’ hanga tunyingike nyi tunase tachi tujame ku ufulielo nyi ka. Ha mukanda uze asonekenene A-Kolosu, postolo Paulu yahanjika nawa ha ulemu wa kununga ni kujama ku ufulielo. Ha mashimbu jacho, A-Kolosu kapwile Akwa-Kristu waze te ajama ku ufulielo, alioze Paulu yaatoweza ha ponde ya kunyonga ngwe akwa-hashi. (Kolo. 2:6-10) Epafwa, yoze kota wanyingikine kanawa mandumbu mu chikungulwila chacho te kakwalembela chinji hanga “ajame,” hanji ngwetu, akole ku ufulielo. (Kolo. 4:12) Yika mutuhasa kulilongesa ha chikuma chino? Paulu ni Epafwa kanyingikine ngwo, mba tununge ni kukola ku ufulielo, twatamba kusa tachi ni kufupa ukwaso wa Zambi. Ayo kazangile hanga mandumbu mu Kolosu anunge ni kujama ku ufulielo chipwe ngwe mapalika mu kapinda mweswawo. w24.04 6-7 ¶16-17

Kwivwila Yehova woma chinalumbunuka kumuzanga, kashika kutwazangile kulinga chuma chize muchimuvwisa yikola ku mbunge. Mba tupwe ni utayizo wa Yehova, twatamba kunyingika kanawa kalisa watwama hakachi ka chipi ni chipema ni kalisa yoze watwama ha umwenemwene ni mahuza. (Yishi. 2:3-6; Hepre. 5:14) Nyi mutuvwila chinji atu woma kuhiana Yehova, chino muchihasa kututwala hanga twehuke umwenemwene. Tutalenu chilweza cha ngendeshi 12 A-Izalele waze atumine hanga anehe sango mu chifuchi chize Yehova alakenyene kuli atu jenyi. Kumi a kuli ayo, yecha woma uze apwile ni kuvwila A-Kanana uhiane zango lize o apwile nalio hali Yehova. Ayo yalweza A-Izalele eswe ngwo: “Kutuchi kuhasa kulimika ni atu a mu chifuchi chacho, mumu kali ni tachi jinji kuhiana yetu.” (Kwa. 13:27-31) Chochene, kulita ni kunyonga cha atu, A-Kanana kapwile ni tachi jinji. Alioze kwamba ngwo, A-Izalele te kechi kuhasa kukumba akwa-kole jo, chapwile ngwe kanavulama ndundo jize Yehova apwile najo. w24.07 9 ¶5-6