Iyo notene ninofuna nikamihedho wila nikose dhogana dhamakamaka dha mwigumini. Anddimuwa a mmulogoni vina Akristu oliba mpaddi womuyani anonikamihedha okosa ejuwene. Masiki awene akalaga attu owunuwelavo opitta iyo, kaninfwanyela wubuwela wi malago awa kanttidda mpirha. Yehova onfuna wi iyo nisunze na attu owunuwelavo. Awene ahikalawo mudhidhi mwinjene opitta iyo, ahikana dhotagiha dhinjene vina ahikana eziwelo yinji. Masaka awale, Yehova ohalabihedha alobwana ororomeleya wi apangarhaze vina asogorhele nlogo naye. Alobwana aba àli owunuwelavo, motagiha, Mizé, Davidi vina murumiwi Joau. Awene kakalilewo nsaka nakakene vina àli ottiyana vaddiddi. Afunaga okwa awene ahavaha malago apama azombwe. Muttu-muttu wa awene ahiloga ekalelani yamakamaka omwiwelela Mulugu. Iyo notene, azombwe vina anakala ba ninowodha opurelamo venjene mazu alogile alobwana aba.—Rom. 15:4; 2 Tm. 3:16. w24.11 8 ddima 1-2

Masaka a Nowé, Mulugu wahakoddiha attu oja nikami. (Wi. 9:3, 4) Musogorhomwa Yehova wahakoddiha ana Izrayel oja nikami. Muttu ddi muttu agajile nikami wanfwanyela opiwa. (Ona. 7:27) Yezu wanniwelela Malamulo. (Mt. 5:17-19) Nona iyene txipo kagakumbirhile Ayuda oja maningo aye obe omwa nikami naye. Yezu waloga na mukalelo wa nladdaniho, ninga mulogeliye na muyana w’o Samariya,: Onamwe manje ananvahemi . . . anele . . . omvaha egumi yohimala. (Jo. 4:7, 14) Yezu kafuna ologa wi muyana oddule wa Musamariya agahimwa manje momaguva-mwene bakaana egumi yamukalakala. Na mukalelo wakakene, Yezu kafuna ologa wi muttitti obule w’o Kafarnau ogahikalawo namukalakala koja maningo a Yezu vina komwa nikami naye. w24.12 9 ddima 4-6

Mulobwana oli Mukristu onofwanyela oviyang’anela wila anakaane monelo wabure mwaha wa ayana. Sabwaya jani? Mwaha mmodha bwawi dhubuwelo dhehu dila dhinjidhene dhinopatta merelo ehu. Murumiwi Paulo ohiloga wi Akristu ottikitteliwa o Roma kafwanyela otagiha mweddelo wa elabo ejino. (Rom. 12:1, 2) Mwalebele Paulo Akristu o Roma vahivira vyaka dhing’onovi mmaleli mulogoya witiwa. Masiki dhawene mazu a Paulo anolagiha wi ena a mmulogonimwa ampattiwa na dhilemelelo vina mubuwelo wa mwilaboni. Jijuwene emuttukulele Paulo wavaha malago wi atxinje mukalelo wawa wa wubuwela vina merelo awa. Nlago ntti ninowapatta Akristu ali amamuni masaka abano. Mokubanyiha-mwene amamuni ena anopattiwa na mubuwelo wa mwilaboni, jijuwene enattukulela waweddiha awadhiwa na mukalelo wabure. w25.01 9 ddima 4