Ndi imenyene eti ntak ndinen̄ede nnịm ke se ededi emi Jehovah ebierede ọnọ owo ọyọfọn, ndudue idụhe? Ih, imenyene! Jehovah ọfọn ama, enye enyene ọniọn̄ akan, enye onyụn̄ edi “Ebiereikpe ofụri ererimbot” emi esituade owo mbọm. Abraham ama enen̄ede ọdiọn̄ọ se itịn̄de oro. Jehovah ekpep Eyen esie se akpanamde onyụn̄ ayak enye ebiere se iditịbede inọ kpukpru owo. (John 5:22) Jehovah ye Jesus Eyen esie ẹdiọn̄ọ se idude kpukpru owo ke esịt. (Matt. 9:4) Mmọ idinamke ndudue ke se mmọ ẹdibierede inọ owo kiet kiet, mmọ ẹdinam “se inende”! Ẹyak inen̄ede ibiere ndinịm ke Jehovah ọdiọn̄ọ se ifọnde ikan. Imokụt ke nnyịn idotke ndibiere ikpe nnọ owo ndomokiet, edi Jehovah odot. (Isa. 55:8, 9) Oro anam isana kpukpru se ẹkpebebiere ẹban̄a owo isịn enye ye Eyen esie ke ubọk. Eyen esie edi Edidem emi uwem esie owụtde ke enye enen̄ede enyene esịt mbọm nte Ete esie, onyụn̄ esibiere nnennen n̄kpọ ukem nte Ete esie.​—Isa. 11:3, 4. w24.05 7 ¶18-19

Se iketịbede akpa ini emi Jesus okosobode ye Nathanael ekpep nnyịn ntak emi ọfọnde inyene eti esịt. Ini Philip ekemende Nathanael ufan esie yak edisobo Jesus, n̄kpọ n̄kpaidem ama etịbe. Kpa ye edide akananam Jesus ikosoboke ye Nathanael, Jesus ama ọdọhọ ete: “Sese, ata eyen Israel, emi abian̄a mîdụhe enye ke esịt.” (John 1:47) Esịt akpanikọ emi Nathanael ekenyenede emi Jesus okokụtde, utọ oro ikodụhe kan̄a. Ukem nte nnyịn, Nathanael ikọfọnke ima. Edi enye ikedịghe mbubịk; ama esinam akpanikọ ke kpukpru n̄kpọ tutu esịm akpatre mben̄e n̄kpọ ntem. Jesus ama ama ido esie oro onyụn̄ otoro enye ke oro. Ata ediwak se idude ke Psalm 15 emi aban̄ade nte ikemede ndinem Jehovah esịt asan̄a n̄kpọ ye nte inamde n̄kpọ ye mbon en̄wen. Psalm 15:3 ọdọhọ ke owo emi edide esenowo ke tent Jehovah “idọkke edidọk ke edeme esie. Inamke nsan̄a esie baba idiọk kiet, inyụn̄ itịn̄ke ikọ esuene idian owo emi enye etịmde emehe.” Ikpọdọk mbon en̄wen edidọk mîdịghe itịn̄ ikọ esuene idian mmọ, imekeme ndinen̄ede mbiat mmọ enyịn̄.​—Jas. 1:26. w24.06 10 ¶7, 9; 11 ¶10

Ekpetịm idem ọfọn mbemiso akade ukwọrọikọ, idem idinen̄ekede inyek fi ndineme Ikọ Abasi ye mbon en̄wen. Jesus ama an̄wam mme mbet esie ẹtịm idem mbemiso enye osiode mmọ ọdọn̄ ẹkekwọrọ ikọ. (Luke 10:1-11) Mme mbet oro ndikanam se Jesus ekekpepde mmọ ama anam mmọ ẹkeme ndinam ediwak nti n̄kpọ, oro ama onyụn̄ anam mmọ ẹnen̄ede ẹkop inemesịt. Didie ke ikeme nditịm idem mbemiso ikade ukwọrọikọ? Ọfọn ikere nte iditịn̄de se iyomde ndikwọrọ ke ikọ idem nnyịn, inyụn̄ itịn̄ enye nte owo eneme nneme ye owo. N̄kpọ en̄wen emi edin̄wamde nnyịn edi ndikere n̄kpọ iba m̀mê ita emi mme owo ẹsitịn̄de mmọ mîyomke ndikop ukwọrọikọ ye se ikpọbọrọde. Ekem ima isobo mme owo, yak ikûnam nte ẹkama ikpa ẹda nnyịn ke edem, yak inam n̄kpọ ufan ufan, mbre mbre, iso imam imam. w24.04 15-16 ¶6-7