Eyin a nọ wleawu ganji na lizọnyizọn lọ, e yọnbasi dọ a ni voawu dogọ whenue a to hodọna mẹdevo lẹ. Whẹpo Jesu do dó devi etọn lẹ hlan lizọnyizọn lọ mẹ, e gọalọna yé nado wleawu. (Luku 10:1-11) Na yé yí nuhe Jesu ko plọn yé lẹ do yizan mẹ wutu, devi lẹ mọ ayajẹ sisosiso na nuhe yé penugo nado wà lẹ. Nawẹ mí gán nọ wleawuna lizọnyizọn lọ gbọn? Mí dona lẹnnupọndo lehe mí gán nọ plọn nugbo lọ mẹlẹ po kọdetọn dagbe po to hogbe mítọn titi lẹ mẹ do ji. E sọ yọ́n nado nọ lẹnnupọn jẹnukọn do aliho awe kavi atọ̀n he mẹ mẹlẹ gán yinuwa te to aigba-denamẹ mítọn ji lẹ ji bo pọ́n lehe mí na na gblọndo to ninọmẹ dopodopo mẹ do. Enẹgodo, whenue mí na dọnsẹpọ mẹlẹ, mí gán tẹnpọn nado voawu, konu bosọ jọmẹ. w24.04 16 huk. 6-7

Whẹwhinwhẹ́n titengbe he wutu mí nọ lá wẹndagbe lọ wẹ owanyi mítọn na Jehovah Jiwheyẹwhe po oyín wiwe etọn po. Mí nọ pọ́n lizọnyizọn mítọn hlan taidi aliho de nado pà Jiwheyẹwhe mítọn he mí yiwanna lọ. Mí nọ yí ahundopo do kọngbedopọ dọ Jehovah Jiwheyẹwhe wẹ jẹ nado mọ gigo, gbégbò po huhlọn po yí sọn sinsẹ̀n-basitọ nugbonọ etọn lẹ dè. Mí nọ na ewọ gigo po gbégbò po whenue mí má kunnudenu he họnwun lọ hẹ mẹdevo lẹ dọ ewọ wẹ “dá nulẹpo,” podọ ewọ wẹ zọ́n bọ mí do togbẹ̀. Mí nọ na ẹn huhlọn, enẹ wẹ nugopipe mítọn whenue mí yí whenu, huhlọn po nutindo mítọn lẹ po zan nado do mahẹ to lizọnyizọn lọ mẹ to gigọ́ mẹ dile ninọmẹ mítọn na mí dotẹnmẹ etọn do. (Mat. 6:33; Luku 13:24; Kol. 3:23) Do glido, mí nọ yiwanna nado dọho gando Jiwheyẹwhe he mí yiwanna lọ go. Mí sọ nọ yin whinwhàn nado dọhona mẹdevo lẹ gando yinkọ etọn, podọ gando omẹ alọpa he e yin go. w24.05 17 huk. 11

Jehovah nọ na mí jijọho po pekọ po todin, bo nasọ na mí ogbẹ̀ madopodo to sọgodo. Mí gán ze todido mítọn do Jehovah mẹ bo kudeji dọ ewọ do ojlo po huhlọn lọ po nado suahọ mí. Podọ, nujikudo enẹ nọ whàn mí nado hẹn alọnu mítọn ján to sinsẹ̀n-bibasi mítọn mẹ kẹdẹdile devizọnwatọ nugbonọ Jiwheyẹwhe tọn hohowhenu tọn lẹ yin whinwhàn nado wà do. Ehe yin nugbo to whẹho Timoti tọn mẹ to owhe kanweko tintan whenu. (Heb. 6:10-12) Timoti ze todido etọn do Jiwheyẹwhe ogbẹ̀nọ lọ mẹ. (1 Tim. 4:10) Enẹwutu wẹ e do wazọ́n sinsinyẹn na Jehovah, podọ do mẹdevo lẹ tamẹ. To aliho tẹlẹ mẹ? Apọsteli Paulu dotuhomẹna ẹn nado hẹn nugopipe mẹpinplọn tọn etọn pọnte to lizọnyizọn lọ mẹ podọ to agun mẹ. Timoti sọ dona ze apajlẹ dagbe dai na yisenọ hatọ etọn lẹ, yèdọ jọja po mẹho po. Podọ azọngban sinsinyẹn delẹ sọ yin didena ẹn, ehe biọ ga dọ e ni yí nujikudo po owanyi po do na ayinamẹ mẹhe do hudo etọn lẹ. (1 Tim. 4:11-16; 2 Tim. 4:1-5) Timoti gán deji dọ Jehovah na suahọ emi.—Lom. 2:6, 7. w24.06 22-23 huk. 10-11