Devi Jesu tọn lẹ do hudo tulinamẹ tọn. Etẹwutu? Delẹ to yé mẹ ko jo owhé, whẹndo po ajọ́ yetọn lẹ po do nado hodo Jesu na whenu-gigọ́. (Mat. 19:27) Mẹdevo lẹ ko yin gbigbẹdai, na yé lẹzun devi etọn lẹ wutu. (Joh. 9:22) Yé basi avọ́sinsan ehelẹ na yé yise dọ Jesu wẹ Mẹsia dopagbe lọ wutu. (Mat. 16:16) Amọ́ to whenue Jesu yin hùhù, todido yetọn lẹ nù amì bọ yé jẹflumẹ pete. E họnwun dọ Jesu ma yí awubla devi etọn lẹ tọn do mọ ohia madogán gbigbọmẹ tọn de, amọ́ e mọnukunnujẹemẹ dọ, nuhẹnbu sinsinyẹn lọ, enẹ wẹ okú emitọn wẹ zọ́n. Enẹwutu, to azán dopolọ he gbè e yin finfọnsọnku wẹ e jẹ tulina họntọn etọn lẹ ji. Di apajlẹ, e sọawuhia Malia Magdaleni to whenue e to avivi to yọdò etọn tó. (Joh. 20:11, 16) E sọ sọawuhia devi awe he lẹkọ dedo gbétatò Emausi tọn mẹ lọ lẹ. Podọ, e sọawuhia apọsteli Pita. w24.10 13 huk. 5-6

Eyin mẹjitọ de wẹ a yin, nọ plọnazọ́n ovi towe nado yiavùnlọna nuyise etọn to Mẹdatọ lọ mẹ. A gán mọ ẹn di nuyọnẹnnu nado vọ́ dogbapọnna hosọ debọdo-dego lọ lẹ “Les Jeunes S’interrogent—Création ou évolution? he to jw.org ji dopọ hẹ ẹ. Enẹgodo, dọhodo adà hoyijlẹdohogo lọ tọn he ovi towe mọdọ e dutomẹji hugan bọ yè na yí do gọalọna mẹdevo lẹ nado mọnukunnujẹ nugbo lọ gando Mẹdatọ lọ go mẹ ji. Na ẹn tuli nado yí hoyijlẹdohogo he ma gẹdẹ bosọ sọgbe lẹ zan eyin mẹdelẹ yigbe nado dọhodo hosọ lọ ji. Di apajlẹ, wehọmẹvigbẹ́ de gán dọmọ: “Nuhe n’mọ wẹ n’nọ yise, n’ma ka mọ Jiwheyẹwhe pọ́n.” Jọja Klistiani de gán dọmọ: “Mí ni dọ dọ a to zọnlinzin gbọn zungbo de mẹ bo yì tọ́n jẹ owhé dagbedagbe de ji to gblolo mẹ fide. Tadona tẹ kọ̀n wẹ a na wá? Eyin tintin owhé de tọn yin kunnudenu lọ dọ mẹde wẹ gbá ẹ, nẹmunẹmu wẹ tintin wẹkẹ lọ tọn ma na yin kunnudenu lọ dọ mẹde wẹ dá ẹ!” w24.12 18 huk. 16

Mímẹpo wẹ do hudo anademẹ tọn nado basi nudide titengbe lẹ to gbẹ̀mẹ. Mí gán mọ suhugan anademẹ mọnkọ lẹ tọn yí sọn mẹho lẹ po Klistiani he whèwhín devo lẹ po dè. Eyin yé yin mẹho na mí taun, mí ma dona wá tadona kọ̀n hadopo dọ ayinamẹ yetọn lẹ ko dohó. Jehovah nọ jlo dọ mí ni plọnnu sọn mẹhomẹ lẹ dè. Yijlẹdo míwlẹ go, yé ko yí whenu susu zan nado bẹ numimọ, nukunnumọjẹnumẹ po nuyọnẹn po pli. To ojlẹ Biblu tọn lẹ mẹ, Jehovah yí mẹhomẹ nugbonọ lẹ zan nado na tuli omẹ etọn lẹ bosọ deanana yé. Di apajlẹ, lẹnnupọndo Mose, Davidi po apọsteli Johanu po ji. Ojlẹ voovo mẹ wẹ yé nọgbẹ̀ te podọ ninọmẹ yetọn lẹ gbọnvo taun. Jei vivọnu gbẹzan yetọn tọn, yé na ayinamẹ nuyọnẹn tọn jọja lẹ. Dopodopo sunnu mẹhomẹ nugbonọ ehelẹ tọn zinnudo nujọnu-yinyin tonusisena Jiwheyẹwhe tọn ji. Vlavo mí yin jọja kavi mẹho, mí gán mọaleyi sọn ayinamẹ yetọn lẹ mẹ, eyin mí gbadopọnna yé.—Lom. 15:4; 2 Tim. 3:16. w24.11 8 huk. 1-2