Jehôva aa ye ki borane mengu’u é môr sese a bo mam ya éngung ya dzeng bito bi ne ôyap yôp (1 Becor. 10:24, 33; 13:4) Biyong bizing, amben menvuiñ Yésu, me mbe ñe édedèè bébéñ, baa fe, be mbe bé kômô dzale bisèñ bizing, ve, tam té, se ki mbemba nkôman éwô ô mbe wé tsini be. Ntamane yen é dzam ézing, é mbe dé daghe mintôô mibèñ Yésu, bia dzô vèè, Santiago nge ki Jacques ye Juan. Be nga sili Yésu naa, a kee bo bito bia dang mbeng Édjié dèñ été. Yésu éé dzi ki be dzô naa, é dzam be nga kômô alé, é mbe mbemba dzam. Ndaane de, a nga lere mintôô 12 bèñ besese naa : « É môr ase a kômô bo môra môt, a yiène bo mbo-ésèñ wônan, ye naa éñi sese a kômô tebe ôsu ézizang denan a yiène bo nkôm akal bôr besese » (Marc 10:35-37, 43, 44). É bobedzang be bele mbemba nkôman, da yili naa, a sèhane é bôr bevoo, ba ye vole ékôan abuiñ meval (1 Beth. 2:8). w24.11 Mef. 15-16 Bif. 7-8.

Éyong bia ñong minkighan, édzing da ye bia tsini naa bi ke ôsu ye dzeng mbeng « é bôr bevoo » ye yem meniè mèè (1 Becor. 10:23, 24, 32 ; 1 Tim. 2:9, 10). Aval té bia ye ñong minkighane mia lere naa bia dzing ye kang é bôr bevoo. Nge ô va ñong môra nkighane ézing, simeghan é dzam wa yiène bo naa ô dzale wô. Yésu a nga yeghle bia naa, bi « tare fas abim bi bele » (Luc 14:28). Éde, fasghan abim tam, biôm ye é ngu’u mia ye yi nfa ye naa nkighane wônan ô wulu mbeng. Biyong bizing ô ne kobe ye é nda-bôr duè, nfa ye naa, kada môr ye été a yem é dzam a ne bo naa nkighane té ô wule mbeng. Amu dzé aval mboane té ô ne mvèñ ? Amu dzam té é ne lere naa, wa yiène songhane mam mézing nkighane wiè, nge ki naa, wa yiène ñong nkighane ôfe. Éyong wa ve naa môr asese ye é nda-bôr duè a ve ôtemgha wèñ, ye bèè be, da ye bo ébubu naa be sèñ ngu’u nfa ye naa, nkighane té ô wule mbeng. w25.01 Mef. 18-19 Bif. 14-15.

Esaïe a tsini éé lere bia amu dzé bi bele abuiñ mekalgha ye « a vakh ye san » a paradis ya nsisim été. Étéñ ya nsisim té, da so bia ébe Jehôva (Esaïe 65:18, 19). Éde da yiène naa, Jehôva a belane bia naa, a vole bôr a kôre mbia bikôan bi y’émo di, ébi biaa yeghle ki bôr bebela nfa Nzame, ye vole be naa be bo bôr be y’é mbemba paradis bia ning été ! Bia bira san amu biboran bia ñong naa bi ne a bebela été, dzam té da ve naa bi bele nkômane ô ne ngu’u ya kanghle bôr mbemba bebebela beté (Jér. 31:12). Bia ve fe akiba ye bira san amu bi bele mbemba élat ya Jehôva. Bible a kiagh naa bia ye « long menda ye tobe été [ye] béñ bilé bi vino ye dzi bibuma bi y’été. » Biaa ye « ki sèñ a zeze » amu « Jehôva a ye borane » bia. A kiagh bia éning é ne mvoa, ndzalan, é bele fe ayilgha. A ye yem é dzam kada môr a yi, ye naa a « [ye] dzale mekômgha é dzôm ésese da ning » (Esaïe 65:20-24 ; Bya 145:16). w24.04 Mef. 22-23 Bif. 11-12.