Ng’ô tugha kôman akal minkanghle, waa ye ki dang yep a n’nem éyong wa ye kobe ya bôr. Yésu a nga vole beyeghe bèñ naa be yem kôman kaa naa a lôm be ésèñ minkanghle (Luc 10:1-11). Amu be nga dzale é mam Yésu a nga yeghle be, é nga ve be naa be bo abuiñ mbemba bemam minkanghle, ane dzam té é nga likh be naa be tobe édedèè mesan. Aval avé bi ne yem kôman akal minkanghle ? Bia yiène tare tem é dzam bia kômô dzô, éyong té bia dzô de aval bia kobe ye bifiè biè. É ne fe éban naa, bi tare tem meval mebèñ nge ki melal, bôr be ne ñong nlang wèè abeng minkanghle daa, ye baghle ôtemgha aval bia ye yalane be. Akôre ye vèè, éyong bi yirang be bebéñ bi ne kobe a be a mvoa été, a bo nsaza, ye lere mbemba fulu. w24.04 Af. 16 Bif. 6-7.

Akalgha da dang éban bia kanghle de mbemba fuèñ é ne amu bia dzing Jehôva Nzame ye nfufup éyôla déñ. Bia yen ésèñ minkanghle dèè ane aval bia lughu é Nzame bia dzing. Bia yebe ye n’nem ôsese naa besôsôe bebo bisèñ Jehôva Nzame, ba yiène ñe ve duma, ngang ye fe ngu’u. Bia ve ñe duma ye ngang éyong bia kap ye é bôr bevoo, mendem ma ban naa, éñe a « nga vele mam mesese » ye naa, amben éning dèè, da so ébe ñe. Bia ve ñe ngu’u ; é ngu’u dzèè, éyong bia belan é tam, ngu’u ye é biôm bia, naa bi bo ésèñ minkanghle abim asese bi ne de bo, aval étéñ dèè da likh bia de (Mat. 6:33 ; Luc 13:24 ; Becol. 3:23). Naa é bo bia ébubu a wokh, bia dzing bia kobe adzô é Nzame bia dzing. Bia wôrane fe naa, bia yiène kobe ye é bôr bevoo adzô éyôla déñ, ye aval Nzame a ne. w24.05 Af. 17 Éf. 11.

Jehôva a ne é môt a boran é bôt besese ba sèhane ñe. A ve biè mvoa ye mevakh ya tobe ya abim bi bele éndagha, a ye fe biè ve éñing é ne mbèmbèè melu ma zu. Bi ne ve mebun mèè ébe Jehôva, ye bele ndzi-n’nem naa a bele nkôman ye ngu’u ya borane biè. Ndzi-n’nem té da ye biè tsini naa bi bele abuiñ mam me ye abo, nfa ékang bia ve ñe, aval ane besôsôe bebo-bisèñ Nzame be ye melu mvus be nga bo de. Dzam té, éde Timothée a nga bo ntet mimbu ôsua (Behéb. 6:10-12). Timothée a nga ve mebun mèñ ébe é Nzame a ne tetèè (1 Tim. 4:10). Dzam té, éde é nga ve ñe naa a bira sèñ, ye ve mengu’u mèñ mesese. Za dzam a nga bo ? Ntôl Pablo nge ki Paul a nga saghe ñe naa, a vem nfa ye abo mbemba n’yeghle ye ve mbemba mintun. Timothée a nga yiène fe ve mbemba éfônan, nfa bebunu bevoo, abo bitông nge ki min’nôm. Be nga ve ñe meyem me mbe ndzukh a dzale, bia lang été, a ve é bôt be nga yiène de melepgha me ne tetele, ve, ya édzing (1 Tim. 4:11-16 ; 2 Tim. 4:1-5). Timothée a mbe tobe ndzi-n’nem naa Jehôva a ye borane ñe (Bero. 2:6, 7). w24.06 Mef. 22-23 Bif. 10-11.