Yehowa hãa wɔ nibii ni he hiaa wɔ lɛ, ejaakɛ esumɔɔ wɔ. Wɔ hu wɔbaanyɛ wɔhã wɔnyɛmimɛi lɛ nibii ni he hiaa amɛ lɛ, yɛ suɔmɔ ni wɔsumɔɔ amɛ lɛ hewɔ. Akɛ nɔkwɛmɔnɔ lɛ, ani ole nyɛmi ko ni niyenii loo atade he miihia lɛ? Yehowa baanyɛ atsɔ onɔ ni eye ebua nakai mɔ lɛ koni ená nɔ ni he hiaa lɛ lɛ. Kɛ́ oshãra ba nɛkɛ lɛ, Yehowa webii lɛ yeɔ amɛbuaa amɛnyɛmimɛi lɛ waa. Akɛ nɔkwɛmɔnɔ lɛ, be ni COVID-19 lɛ ba lɛ, nyɛmimɛi lɛ hã amɛnyɛmimɛi ni he efi amɛ lɛ, niyenii, atade, kɛ nibii krokomɛi ni he hia amɛ lɛ. Nyɛmimɛi babaoo hu tsu onia kɛfi jeŋ muu fɛɛ nitsumɔ lɛ sɛɛ. Enɛ hã aná shika kɛye abua nyɛmimɛi ni yɔɔ je lɛŋ he fɛɛ he ni he efi amɛ lɛ. Wiemɔi ni yɔɔ Hebribii 13:16 lɛ ni tsirɛ amɛ ni amɛfee nakai. Jɛmɛ kɛɛ: “Nyɛhiɛ akakpaa ekpakpafeemɔ nɔ, ni nyɛhiɛ akakpaa nɔ hu akɛ nyɛkɛ mɛi baaja nii ni nyɛyɔɔ lɛ, ejaakɛ afɔlei ni tamɔ nɛkɛ saa Nyɔŋmɔ hiɛ jogbaŋŋ.” w24.09 27 kk. 6-7

Susumɔ shihilɛ nɛɛ he okwɛ. Ootao nitsumɔ ni baaye abua bo koni onyɛ okwɛ oweku lɛ, ni oyaná nitsumɔi srɔtoi enyɔ. Otao nitsumɔi enyɔ lɛ fɛɛ ahe saji ni ona bɔ ni nitsumɔ lɛ ji, be ni akɛtsuɔ, bei abɔ ni ebaahe bo kɛya kɛba, kɛ ekrokomɛi ni fata he. Ona akɛ nitsumɔ lɛ eko fɛɛ eko eteee shi ewooo Biblia mli shishitoo mla ko. Ekolɛ onyaa ekome he fe ekroko lɛ, ejaakɛ osumɔɔ bɔ ni nitsumɔ lɛ ji lɛ loo no nyɔmɔwoo lɛ fa. Shi dani obaakpɛ yiŋ lɛ, nibii krokomɛi hu yɛ ni esa akɛ osusu he. Akɛ nɔkwɛmɔnɔ lɛ, ani nitsumɔi lɛ ateŋ eko baahã ofolɔ asafoŋ kpeei amli bei komɛi? Ani nitsumɔi lɛ ateŋ eko hãŋ oná be ohã oweku lɛ ni okɛye obua amɛ ni amɛbɛŋkɛ Yehowa, ni agbɛnɛ hu, nyɛkɛfee nibii ni baahã nyɛná miishɛɛ? Saji ni tamɔ nɛkɛ ni obaabi ohe lɛ baaye abua bo ni ohã “nibii ni he hiaa waa lɛ,” ni ji, jamɔ ni okɛhãa Yehowa, kɛ oweku lɛ hiamɔ nii ni obaatsu he nii lɛ, he ahia bo fe shika ni obaaná. Kɛ́ ofee nakai lɛ, no baaye abua bo ni okpɛ yiŋ kpakpa ni baahã Yehowa ajɔɔ bo. w25.01 17 kk. 11-13

Kɛ́ bɔ ni mɛi kɛ bo eye ehã lɛ hewɔ lɛ, onuɔ he akɛ ohe bɛ sɛɛnamɔ po lɛ, ná nɔmimaa akɛ Yehowa sumɔɔ bo ni ohe yɛ sɛɛnamɔ kɛhã lɛ. Kɛ́ bei komɛi lɛ ‘owerɛ ho ohe lɛ,’ kaimɔ akɛ Yehowa na nibii kpakpai yɛ otsui mli, ni no hewɔ egbala bo kɛba emasɛi lɛ. (Yoh. 6:44) Eesumɔ ni eye ebua bo ejaakɛ esumɔɔ bo waa. Kɛ́ wɔsusu bɔ ni Yesu hi shi ehã lɛ he lɛ, no baaye abua wɔ ni wɔnu bɔ ni Yehowa nuɔ he ehãa lɛ shishi jogbaŋŋ. Be ni Yesu yɔɔ shikpɔŋ lɛ nɔ lɛ, emusuŋ tsɔ lɛ yɛ mɛi ni abuuu amɛ ahãaa nɔ ko lɛ ahe, ni ekɛ amɛ ye jogbaŋŋ. (Mat. 9:​9-12) Be ko be ni yoo ko ni miiye hela ko ni naa wa waa ni eetao ená hewalɛ lɛ yata Yesu atade lɛ he lɛ, Yesu ewieee ehiɛ, shi moŋ eshɛje emii ni ejie eyi yɛ ehemɔkɛyeli lɛ hewɔ. (Mar. 5:​25-34) Yesu fee enii tamɔ e-Tsɛ lɛ pɛpɛɛpɛ. (Yoh. 14:9) No hewɔ lɛ, hemɔ oye akɛ Yehowa naa bo akɛ ohe yɛ sɛɛnamɔ ni enaa sui kpakpai tamɔ hemɔkɛyeli kɛ suɔmɔ ni oyɔɔ kɛhã lɛ lɛ. w24.10 7 kk. 4-5