Lè Jéova di kè sèwten wa a Israèl té fidèl, sé té pas sé wa-lasa té ka adoré-y kon i té ka mandé. Lamajorité a sé wa-la ki pa té fidèl arété suiv Lwa a Jéova é yo mété-yo ka adoré fo-dyé (1 Wa 21:25, 26 ; 2 Kron. 12:1) Poukwa sa té enpòwtan pou Jéova kè sé wa-la té adoré-y jan-la i té ka mandé la ? Dabò pou yonn, sé pas Jéova té mandé sé wa-la gidonné pèp-la pou i té adoré-y kon i ka mandé. Men osi sé pas lèwvwè pèp-la té ka adoré fo-dyé, yo té ka fè onlo péché ki grav é yonn té ka malmenné lòt (Ozé 4:1, 2). Anplisdisa, vi a sé wa-la é vi a tout sé moun-la ki té adan pèp-la sé té ta Jéova. Sé pousa Labib ka di kè lèwvwè yo pa té ka rété fidèl a Jéova é kè yo té ka mèt-yo ka adoré fo-dyé, sé konsi yo té ka fè on adiltè (Jér. 3:8, 9). Lèwvwè on moun ka fè on adiltè, i ka péché kont moun-la i mayé èvè-y la é i ka fann tchè a-y. Menmjan-la, lèwvwè on moun ki ba Jéova vi a-y pa ka rété fidèl, sa ka fè Jéova lapenn toubònman (Dét. 4:23). w24.07 22-23 § 12-15.

Sé ansyen-la ka fè éfò pou yo aji èvè konpasyon épi moun yo woté adan lasanblé-la kon Jéova ka fè-y. An tan lontan, Jéova pa atann kè pèp a Israèl viré an 2 bra a-y pou i pé sa édé-yo. Okontrè, sé-y ki pran douvan. I voyé pwofèt owa a yo avan menm yo té rèpanti-yo. Jéova di Ozé padonné madanm a-y é mandé-y si i vé viré èvè-y alòskè madanm-la té adan péché a-y toujou. Jéova montré pèp a-y jan i té ni konpasyon (Ozé 3:1 ; Mal. 3:7). Kon Jéova, sé ansyen-la anvi kè moun-la ki péché la viré an 2 bra a Bondyé é yo pa’a mèt baton an wou a-y pou anpéché-y fè sa. Jézi pran ègzanp a on gason ki té pèd chimen. Pap’a-y « kouri jwenn-li, i pran-y an dé bra a-y é i bo-y èvè tandrès » (Lik 15:20). Papa-la pa atann kè gason a-y mandé-y padon, i pran douvan pou i ay jwenn-li, kon nenpòt papa ki enmé timoun a-y té’é fè. w24.08 28 § 7-8.

Kon nou ka vwè-y adan tèks-di-jou-la, Jéova pa ka gadé sajès a-y pou-y tousèl. I donan é i ka pawtajé-y èvè dòt moun. Jak ka di osi kè lè Jéova ka ba moun sajès, « i pa ka babyé ». I vé pa nou santi-nou jenné lèwvwè nou bizwen mandé-y dirèksyon a-y. Okontrè i ka ankourajé-nou mandé-y sajès (Pwov. 2:1-6). É nou, ès nou pé imité Jéova ki ka pawtajé tibwen adan sajès a-y èvè lézòt ? (Sòm 32:8). Sèwvitè a Jéova ni onpakèt lokazyon pou yo pawtajé sa yo ka aprann èvè lézòt. Pa ègzanp, souvantfwa yo ka fòwmé moun ki toufré adan lavérité. Lè sé ansyen-la ka ba sé asistan-la é dòt frè ankò fè on travay adan lasanblé-la, yo ka montré-yo kijan pou yo fè travay-lasa byen. Yo ka aji èvè onlo pasyans èvè sé frè-la lèwvwè yo ka montré-yo fè sa. É sé frè é sè la ki ni èkspéryans adan lakonstriksyon oben ki abityé pran swen a batiman nou ka adoré Jéova adan pé montré dòt moun ki pa ni èkspéryans kijan pou yo fè travay-lasa. w24.09 28-29 § 11-12.