Isaiah nih thlaraulei paradis chung kan um caah kan hmuhmi ‘lawmhnak le nuamhnak’ kong zong kha a langhter. Mah thlaraulei paradis cu Jehovah nih a sermi a si. (Isa. 65:18, 19) Cucaah Jehovah nih Pathian kong hmaan tein a cawnpiak lomi bu hna in mi pawl an chuah nakhnga le aa dawh tukmi thlaraulei paradis ah an luh nakhnga bawmh ding in a kan hman. Biatak chung kan um caah kan hmuhmi thluachuah nih kan lung a cawlcanghter i mah kong kha midang sinah chim a kan duhter. (Jer. 31:12) Thlaraulei paradis ah kan um caah kan ngeihmi ruahchannak cung zong ah kan i lawm tuk. ‘Inn nan sak lai i nan umnak hna lai,’ ‘mitsur dum nan i ser lai i a mitsur hang kha nan din hna lai’ tiah Baibal nih bia a kan kamh. Jehovah nih “thluachuah” a kan pek lai caah ‘vanchiatnak kan tong lai lo.’ A him i sullam a ngeimi nunnak kaan pek hna lai tiah bia a kan kamh. Pakhat cio i kan herhmi kha a hngalh i ‘kan dihlak in kan herhmi kha tling tein kan hmuh [lai].’—Isa. 65:20-24; Salm 145:16. w24.04 22 ¶11-12

Jehovah kha tling tein kan i bochan tikah kan lungpi kan sitermi a si. Harnak caan hmanh ah amah nawl kan ngaih ahcun ṭhathnemhnak kan hmu lai ti kha kan zumh. (Isa. 48:17, 18) A kan bawmhmi kha kan hmuh tikah amah kan zumhnak cu a fek chin lai. Kan tonmi hneksaknak cu zeitluk in a har hmanh ah inkhawhnak ngeih awkah Jehovah lawng nih a kan bawmh khawh ti kha kan hun zumh lai. Lung nganpi bantuk in Jehovah cu a fek i aa thleng lo. Pumpak a sining le aa tinhnak hna cu a hmun i aa thleng bal lo. (Mal. 3:6) Adam le Evi nih an ralchanh tikah Jehovah nih minung ca i aa tinhnak kha a thleng lo. Lamkaltu Paul nih a ṭial bantuk in Jehovah nih “amahle amah cu aa hleng kho lo.” (2 Tim. 2:13) Mah cu zei thil a can asiloah midang nih zei thil an tuah hmanh ah Jehovah nih a sining, aa tinhnak le a phunglam hna cu a thleng bal lai lo tinak a si. Jehovah cu aa thleng lomi a si caah harnak caan ah a kan bawmh lai i hmailei ca a biakam ning in a tuah lai ti kha kan hngalh.—Salm 62:6, 7. w24.06 27-28 ¶7-8

Nungak tlangval a ngeimi nan si ahcun ṭhit awk asiloah vat awkah aa tlak maw, tlak lo timi biakhiahnak tuah awkah zeinihdah aan bawmh hna lai? Pakhat le pakhat kong ṭha tein i hngalh awkah nan i zuamnak thawng in a si. Nan i duh hlan in a kong cheukhat kha na hngalh cang men lai. Asinain atu cu “nan chung muru” i hngalh awkah i zuam ding in caanṭha nan ngei cang. Mah ah thlaraulei, pumpak kong le a ruahnak kong hna tam deuh in hngalhnak zong aa tel. Caan a hun rauh deuh tikah mah biahalnak hna zong hi nan leh a hau lai: ‘Anih cu ka caah a ṭhami innchunghawi a si lai maw?’ (Ptb. 31:26, 27, 30; Efe. 5:33; 1 Tim. 5:8) ‘Pakhat le pakhat lungthinlei kan herhbaunak tah kan i bawm kho lai maw? Kan derthawmnak tah kan i ngaithiam kho lai maw?’ (Rom 3:23) Pakhat le pakhat nan i hngalh deuh tikah a biapi bikmi cu zeitluk in dah nan i lawh timi si loin nan i lawh lonak zeitluk in dah nan i cohlanpiak timi a si ti kha philh hlah. w24.05 27 ¶5