Mi pakhatkhat kha thazaang le ṭhawnnak taktak kan pe kho hna lo. Midang bawmhnak ah kan thazaang kha kan hman khawh. Tahchunhnak ah, kum upa unau asiloah a dam lomi unau pawl kha inn rian kan ṭuanpiak khawh hna i an herhmi thil zong dawr ah kan cawkpiak khawh hna. Biakinn thianhnak le zohkhenhnak rian ah lungtho tein kan i tel kho. Bia na chimmi nih midang thazaang a ngeihter khawh hna ti kha philh hlah. Lungtak tein thangṭhat a herhmi asiloah hnemhnak a herhmi an um maw? An um ahcun an cung ah zawnruahnak na ngeih kha langhter. Pumpak in na len khawh hna, phone in na chawnh khawh hna i card, email asiloah cakuat zong in ca na kuat khawh hna. Zeidah ka chim lai timi kong ah na lungrethei tuk hlah. Lungtak tein na chimmi bia tlawmpal cu zumtukhat na unau caah bawmtu a si kho. Mah nih nikhat chung zumhawktlak tein um awk le a tonmi thil sining a ṭhatnak in hmuh awkah a bawmh khawh.—Ptb. 12:25; Efe. 4:29. w24.09 28 ¶8-10

Khrihfabu rianṭuantu na si cang ahcun Khrihfa upa nih ngeih a herhmi sining tampi na ngei cang men lai. Khrihfa upa pakhat in “rian ṭha” a simi unau pawl bawmhnak ah tam deuh in i tel na duh maw? Khrihfa upa rian ah zeidah aa tel? Khrihfa upa cu phungchim rianṭuannak ah zohchunh awk ṭha an si. Tuukhal lennak le cawnpiaknak ah fakpi in an i zuam i an bia le an tuahsernak in Khrihfabu kha thazaang an pek hna. Cu bantuk rian aa zuammi Khrihfa upa hna kha Baibal nih “minung laksawng” tiah a auh hna. (Efe. 4:8) Khrihfa upa si awkah zeitindah sining na tlinh khawh? Khrihfa upa rian caah sining tlinh timi cu pawcawmnak rian he aa lo lo. Hi vawlei ah cun rianngeitu nih a duhmi thiamnak kan ngeih ahcun fawi tein rian kan hmu kho. Mah he i ralkah in Khrihfa upa si khawh awkah cun phungchimnak le cawnpiaknak ah thiamnak ngeih lawng in a za lo. 1 Timote 3:1-7 le Titas 1:5-9 ah a langhtermi sining hna zong na ngeih a hau. w24.11 20 ¶1-3

Khrihfa upa, peng zohkhenhtu, zung ṭengnge le Uktu Bu sinin lamhruainak kan hmu. Asinain lamhruainak kan hmuhmi kha ṭha tein kan hngalhthiam lo ah tah zeitin? Mah lamhruainak cu kan caah zulh awk a tlak lo tiah kan ruah men lai. Asiloah lamhruainak a kan petu unaupa hna i an tlinlonak cung tu ah lungthin kan pek khawh men. Zumhnak in kan kal tikah kan sining a hngal dihtu Jehovah nih bupi lam a hruai ti kha kan zumh. Cucaah a hmaanmi lungput he lamhruainak kha kan zulh colh. (Heb. 13:17) Kan nawlngaihnak nih Khrihfabu ah lungrualnak a chuahter ti kha kan hngalh. (Efe. 4:2, 3) Lam a kan hruaitu unaupa pawl cu mitlinglo an si ko nain an nawl kan ngaih hna ahcun Jehovah nih thluachuah a kan pek lai ti kha kan zumh. (1 Sam. 15:22) A caan a phanh tikah Jehovah nih zeizong vialte kha a remh dih cang lai. w25.03 23-24 ¶13-14