Kannih cu lung cawlcangh awk ngai a simi caan ah kan nung. Cucaah nifatin Baibal chimchungbia a tlinmi kha kan hmuh. Tahchunhnak ah, vawleicung nawlngeitu si an duh caah “chaklei siangpahrang” le “thlanglei siangpahrang” pakhat le pakhat an i dohmi kha kan hmuh. (Dan. 11:40, NWT) Vawleicung pumpi ah Pathian Pennak kong chim a simi le mi nuai tampi nih Jehovah biak ding in an i thimmi zong kha kan hmuh. (Isa. 60:22; Matt. 24:14) Cun “a caan hmaan tein” thlarau rawl tampi zong kan hmuh. (Matt. 24:45-47) Jehovah nih a rauhhlan ah a cang dingmi a biapimi thil kong kha ṭha tein kan hngalhthiam nakhnga a kan bawmh peng. (Ptb. 4:18) Harnak nganpi aa thawk tikah kan hngalh a herhmi thil kha kan hngalh lai i mah harnak caan chung ah zumhfek te le lungrual tein kan um peng lai tiah kan zumh khawh. Asinain hmailei kong he aa tlaiin kan hngalh lomi thil cheukhat a um ti zong kan hngalh a hau. w24.05 8 ¶1-2

Salm caṭialtu pa nih mi congoihnak kong kha a hleiin a langhter. Mi congoih timi cu zeidah a si? A huap in chim ahcun mi pakhat a min a chiatter khomi a hmaan loin biachim kha a si. Salm 15:3 ah Jehovah khual pawl nih cun a hawikom cung ah ṭhatlonak a tuah lo i a innpa kong ah bia a vahpi lo ti zong in a ti. (Salm 15:1) Mah ah zeidah aa tel kho? A kong he aa tlaiin a hmaan lomi thawngpang kan karhternak thawng in mi pakhat kong kha ruahlopi in bia kan vahpi khawh. Tahchunhnak ah: (1) unaunu pakhat cu caantling rian in aa din, (2) nuva tuahkhat cu Bethel ah rian an ṭuan ti lo asiloah (3) unaupa pakhat cu Khrihfa upa asiloah bu rianṭuantu a si ti lo. Mah unau hna nih sualnak an tuah caah cutin an sining aa thlenmi a si tiah midang sinah chim cu aa tlak lai maw? Kan hngalh lomi a kong hna tampi a um kho men. Mah leng ah Jehovah thlam ah khual a simi nih cun “a hawikom cung ah ṭhatlonak a tuah lo i a innpa kong ah bia a vahpi lo.” w24.06 11 ¶11-13

Jehovah kan ṭihnak ṭhawnter awkah kan biakhiahnak kip ah a lung a lawmhtermi a si nakhnga kan i zuam a hau. Baibal ah an kong ṭialmi hna kong na rel tikah hitin i hal, ‘Mah thil sining ka ton ahcun zei biakhiahnak dah ka tuah lai?’ Tahchunhnak ah, Jehovah kamhmi ram an va ngiat hnuah hruaitu pahra nih Kanaan mi pawl kan tei kho hna lai lo tiah an ti lioah na um ve tiah na mithlam ah cuanter hmanh. An chimmi kha zumh in minung kha na ṭih hna lai maw asiloah Jehovah na dawt ca le a lunglawmhter na duhnak caah na ṭihnak kha na tei kho lai maw? Joshua le Kaleb nih biatak an chimmi kha Israel mi nih an rak zum hna lo. Cucaah Biakammi Ram ah luhnak caanṭha an rak sung.—Nam. 14:10, 22, 23. w24.07 10 ¶7