Jehova u yandja oviṋa mbi tjita kutja ovakarere ve avehe ve kare noupanga ouwa ku na ye. Eye u ve hongorera po nokuvetjevera. Omuano Jehova me raisa kutja ke nombangu, omokutjita kutja ovandu avehe ongondoroka nouye ve lese Ombeibela. Pomautiro Ombeibela ya tjangerwe momaraka yetatu nga: Otjiheberi, Otjiaramei nOtjigrike. Hapo imba mbu mave yenene okulesa omaraka Ombeibela mu ya tjangerwe rukuru, ve noupanga wopopezu ku na Jehova pu imba mbe hi nokutjiwa okulesa omaraka ngo? Kako, katjiperi. (Mat. 11:25) Jehova ke tu ṋanga kutja tu rire omapanga we mena rokutja twa hongwa tjinene, poo mena rokutja tu tjiwa omaraka inga Ombeibela mu ya tjangerwe rutenga. Jehova u yandja ounongo we kovandu avehe ongondoroka nouye, nu kaku imba mba hongwa tjinene uriri. Embo re Ombeibela ra torokwa momaraka omengi, ku nao ovandu ongondoroka nouye ve yenena okumuna ouwa komahongero waro nokurihonga kutja mave yenene vi okurira omapanga we.—2 Tim. 3:​16, 17. w24.06 6-7 ¶13-15

Omanyoneno wa Jerusalem, Jesus nga hunganeka ya ri popezu. Ovakriste mbo aave sokuungurisa oruveze ndwa sewa po okurirongerisa oveni mokukurisa ovikaṋena tjimuna, ongamburiro nonḓaro orure. (Hebr. 10:25; 12:​1, 2) Eṱe tu ri pookumuna ondatumisire onene tjinene okukapita indji Ovakriste Ovaheberi ndji va munine. (Mat. 24:21; Omavan. 16:​14, 16) Tara komaronga Jehova nga yandja okuvatera Ovakriste mbo nu wina ngu maye yenene okutuvatera. Omuapostele Paulus wa tunduuza ovakambure ovakwao okukonḓonona nokuripurira ko oukoto kEmbo ra Mukuru. (Hebr. 5:14–6:​1, ONT) Paulus wa ungurisa Omatjangwa wOtjiheberi okukahurura kutja ongwaye omuano Ovakriste maave rikotamena ku Jehova, tji wa ri omusemba okukapita omuano Ovajuda maave rikotamene ku ye. Paulus wa tunduuza Ovakriste okutjiwa nokuzuva nawa ouatjiri okuza mOmatjangwa kutja ve yenene okumuna omahongero woposyo nu ve ye pirukire. w24.09 8-9 ¶2-3; 10 ¶6

Ovahongewa va Jesus aave hepa okutunduuzwa. Omena raye? Tjiva va isa ozonganda zawo, omaṱunḓu, nozongetjefa okukongorera Jesus oruveze aruhe. (Mat. 19:27) Varwe aave tjindwa navi mena rokutja va rira ovahongewa ve. (Joh. 9:22) Owo ve riyandjera okutatumisiwa, nu va tjita omarundurukiro ngo mena rokutja va ri nongamburiro kutja Jesus ongu ri Messias ngwa kwizikwa. (Mat. 16:16) Posi ya indu Jesus tja zepewa, owo va ri nomuhihamwatima tjinene mena rokutja kaave tjiwa kutja mape tjitwa tjike kombunda yonḓiro ye. Jesus aa tjiwa kutja kanavi kovahongewa ve okukara noruhoze mena ronḓiro ye. Nu aa tjiwa kutja otjiṋa ho kaatji raisa kutja kava ri nongamburiro. Ku nao, meyuva nda pendurwa ndo, eye wa uta okutunduuza omapanga we. Otjotjihorera, eye we rimunikisa ku Maria Magdalena ngunda e ri peyendo re ama riri. (Joh. 20:​11, 16) Eye wina we rimunikisa kovahongewa ve vevari mbaave i kotjirongo tja Emaus. Nu we rimunikisa komuapostele Petrus. w24.10 13 ¶5-6