Epu enanḓengu tjinene ndi tu zuvarisira ombuze ombwa omena rokutja twa suvera Jehova Mukuru nena re eyapuke. Eṱe tu vara otjiungura tjetu tjokuzuvarisa otjomuano wokutanga Mukuru ngu twa suvera. Eṱe tu yakura nomitima vyetu avihe kutja, Jehova, Mukuru, wa pwa ondjozikiro nondengero nomasa okuza kovakarere ve ovaṱakame. Eṱe tu mu pa ondjozikiro nondengero tji matu zuvarisa ouatjiri wokutja eye “wa uta oviṋa avihe,” nokutja eṱe tu nomuinyo mena rokutja ongwe tu pa omuinyo. Eṱe tu yandja omasa wetu ku Jehova indu tji matu ungurisa oruveze rwetu, nouini wetu okuzuvarisa otja pu matu yenene. (Mat. 6:33; Luk. 13:24; Kol. 3:23) Tjiri eṱe twa suvera okuhungira ohunga na Mukuru ngu twa suvera. Eṱe tu vanga okuraera varwe ohunga nena re nokutja ri heya tjike. w24.05 17 ¶11

Jehova u yandja ondjambi ku imba mbe rikotamena ku ye. (Hebr. 11:6) Eye u tu pa ohange nondjoroka nai, nu me ke tu pa omuinyo waaruhe moruyaveze. Eṱe tu nongamburiro kutja Jehova u vanga okutupa ondjambi, nu u nomasa wokutjita nao. Nu mena ranao, eṱe tu kayenda komurungu okurikotamena ku ye otja pu matu yenene, tjimuna ovakarere ve tjaave tjiti morukapitaveze. Imbyo ooviṋa Timoteus mbyaa tjita meserewondo etanga. (Hebr. 6:​10-12) Timoteus wa ri nongamburiro yomasa kutja Mukuru me mu pe ondjambi. (1 Tim. 4:10) Ku nao, eye opaa zokuungurira Jehova novandu varwe oukukutu. Omomiano viṋe? Omuapostele Paulus we mu tunduuza okurira omuhonge omuwa motjiungura tjokuzuvarisa na mombongo. Paulus wina we mu raera kutja nga rire otjihorera otjiwa kovakambure ovakwao omitanda, na imba ovanene motjiwondo. Nu eye wa perwe oviungura ovizeu mbya vi kamburire mo okuvyura ovandu norusuvero. (1 Tim. 4:​11-16; 2 Tim. 4:​1-5) Timoteus wa ri nongamburiro kutja Jehova me mu pe ondjambi.—Rom. 2:​6, 7. w24.06 22-23 ¶10-11

Indu ovakarere va Jehova tji ve ha karere nonḓuviro ku ye, eye potuingi aa hindi ovaprofete ve okuverakiza kutja mape tjitwa tjike indu tji ve hi nokutjita omarundurukiro. Otjotjihorera, Mukuru wa raera Jeremia okuraera Ovaisrael kutja: “Muhinouṱakame Israel, kotoka ku Ami. Ami mbi notjari, nu hi nokuṱomazenge na ove nga aruhe. Rihepura uriri kutja u nondjo, nokutja wa pirukira Muhona Ndjambi woye.” (Jer. 3:​12, 13) Okupitira mu Joel, Jehova wa tja: “Ritanaureye ku Ami nomitima vyeṋu avihe.” (Joel 2:​12, 13) Eye wa ungurisa Jesaja okuveraera kutja: “Rikohororeye nawa! Iseye ko ozondjito zouvi weṋu komurungu wandje; amu tjiti ourunde rukwao.” (Jes. 1:​16-19) Okupitira mu Esekiel Jehova wa pura kutja: “Mamu tjangovasi Ami mbi nonyuṋe monḓiro yomurunde are? Indee uri, Ami tjinene mbi vanga okumumuna kutja a kare nomuinyo. Ami hi nonyuṋe monḓiro yomundu. Ritanaureye komauvi weṋu, nu mamu kara nomuinyo!” (Esek. 18:​23, 32) Jehova u kara nondjoroka tjinene indu ovandu tji ve ritanaura komauvi wawo, mena rokutja u vanga kutja ve hupe nga aruhe. w24.08 9 ¶5-6