Kon may nagakaigo kita nga kahadlok kay Jehova, indi gid kita maghimo sang bisan ano nga makapasubo sa iya bangod palangga gid naton sia. Gusto gid naton nga malipay sa aton si Jehova. Gani gusto gid naton mabal-an ang kinalain sang husto kag sala, kag ang kinalain sang kamatuoran kag kabutigan. (Hulu. 2:​3-6; Heb. 5:14) Kon mas labaw ang aton kahadlok sa tawo sangsa aton kahadlok sa Dios, posible nga mapahilayo kita sa kamatuoran. Binagbinaga ang halimbawa sang 12 ka pangulo nga nag-espiya sa duta nga ginpromisa ni Jehova nga ihatag sa mga Israelinhon. Sa bahin sang pulo ka espiya, mas labaw ang ila kahadlok sa mga Canaanhon sangsa ila gugma kay Jehova. Ginsilingan nila ang pareho nila nga mga Israelinhon: “Indi kita mahimo magpakig-away sa ila, bangod mas makusog sila sangsa aton.” (Num. 13:​27-31) Kon basihan lang ang makita sang mga tawo, matuod gid man nga mas makusog ang mga Canaanhon. Pero sang nagsiling sila nga indi nila mapierde ang ila mga kaaway, ginpakita nila nga wala nila ginhunahuna si Jehova. w24.07 9 ¶5-6

Makasalig gid bala kita nga kon ginahukman ni Jehova ang mga tawo, husto gid ang tanan nga ginahimo niya nga desisyon? Huo. Sa bahin ni Abraham, kumbinsido sia nga si Jehova ang perpekto, pinakamaalam, kag maluluy-on nga “Hukom sang bug-os nga duta.” Ginhanas ni Jehova ang iya Anak kag ginhatag niya sa iya Anak ang responsibilidad sa paghukom sa tanan nga tawo. (Juan 5:22) Mabasa ni Jehova kag ni Jesus ang tagipusuon sang tanan nga tawo. (Mat. 9:4) Gani “matarong” gid pirme ang ila paghukom. Saligan gid naton si Jehova kag ang tanan niya nga desisyon. Dapat naton batunon nga sia ang kabalo maghukom kag indi kita kalipikado sa sini. (Isa. 55:​8, 9) Gani ginatugyan naton kay Jehova kag sa iya Anak ang tanan nga paghukom bangod nagasalig kita sa ila. Kabalo man kita nga perpekto nga ginailog sang aton Hari, nga si Jesus, ang katarungan kag kaluoy sang iya Amay.​—Isa. 11:​3, 4. w24.05 7 ¶18-19

Importante gid nga maghambal kita sing kamatuoran sa aton tagipusuon. May matun-an kita parte sa sini sang gindala ni Felipe ang iya abyan nga si Natanael kay Jesus para makilala niya sia. Bisan pa amo ato ang pinakauna nga tion nga nakilala ni Jesus si Natanael, nagsiling si Jesus: “Tan-awa, ang matuod nga Israelinhon nga wala nagapangdaya.” (Juan 1:47) Nakita ni Jesus nga tumalagsahon gid ang pagkasinsero ni Natanael. Indi man perpekto si Natanael pareho sa aton. Pero, ginpakita niya kon sin-o gid sia kag honest sia sa tanan nga butang. Gani gindayaw ni Jesus si Natanael. Ang kalabanan nga ginsambit sa Salmo 15 nagatudlo sa aton kon paano naton dapat trataron ang iban para malipay sa aton si Jehova. Ang Salmo 15:3 nagasiling nga ang bisita sa tolda ni Jehova “wala nagapasipala, wala nagahimo sing malain sa iya isigkatawo, kag wala nagapakahuya sa iya mga abyan.” Kon kabaliskaran sa sini ang himuon naton, posible mahalitan gid naton ang iban.​—Sant. 1:26. w24.06 10 ¶7; 11 ¶9-10