Malapit na lang matabo ang gintagna ni Jesus parte sa paglaglag sa Jerusalem. Pero, may tion pa ang mga Cristiano sadto nga mahandaan ini. Puede nila gamiton ini nga tion para pabakuron ang ila pagtuo kag pagbatas. (Heb. 10:25; 12:​1, 2) Malapit na lang naton maeksperiensiahan ang kapipit-an nga mas mabudlay pa sa naeksperiensiahan sadto sang Hebreo nga mga Cristiano. (Mat. 24:21; Bug. 16:​14, 16) Binagbinaga ang pila ka laygay nga ginhatag ni Jehova sa ila nga makabulig man sa aton subong. Ginpalig-on ni apostol Pablo ang iya mga kauturan nga tun-an sing maayo ang Pulong sang Dios kag pamalandungan ini. (Heb. 5:14–6:1) Gingamit ni Pablo ang Hebreong Kasulatan para ipaathag sa ila nga mas labaw ang paagi sang pagsimba sang mga Cristiano sangsa paagi sang pagsimba sang mga Judiyo. Ginpalig-on sila ni Pablo nga magtuon sing maayo para mas mahangpan pa gid nila ang kamatuoran. Paagi sa sini, mapauswag nila ang ila ikasarang nga mabal-an ang butig nga mga panudlo kag masikway ini. w24.09 8 ¶2-3; 9 ¶6

Kinahanglan sang mga disipulo ni Jesus ang pagpalig-on. Ngaa? Ginbiyaan sang pila sa ila ang ila mga balay, pamilya, kag negosyo para mag-upod kay Jesus. (Mat. 19:27) Ginsikway naman ang iban sa ila bangod nangin mga disipulo sila ni Jesus. (Juan 9:22) Ginhimo nila ini nga mga sakripisyo bangod nagapati sila nga si Jesus amo ang ginpromisa nga Mesias. (Mat. 16:16) Pero sang ginpatay si Jesus, nasubuan gid sila kay abi nila indi na matuman ang ila ginalauman. Nahangpan ni Jesus nga normal lang nga masubuan ang iya mga disipulo sang napatay sia. Kag kabalo sia nga wala ini nagapahangop nga kulang ang ila pagtuo. Gani sang adlaw mismo nga ginbanhaw sia, ginpalig-on niya dayon ang iya mga abyan. Halimbawa, nagpakita si Jesus kay Maria Magdalena samtang nagahibi si Maria sa lulubngan ni Jesus. (Juan 20:​11, 16) Nagpakita man sia sa duha ka disipulo nga nagapakadto sa baryo sang Emaus. Kag nagpakita man sia kay apostol Pedro. w24.10 13 ¶5-6

Mga ginikanan, buligi ang imo bata kon paano niya pangapinan ang iya pagpati nga may ara sing Manunuga. Makabulig sa imo bata kon i-research ninyo ang serye sang artikulo nga “Pamangkot sang mga Pamatan-on—Creation Ukon Evolution?” sa jw.org. Dayon binagbinaga ninyo ang impormasyon nga sa banta niya makabulig sa iya nga mapaathag sa iban nga may ara gid sing Manunuga. Buligi sia kon paano niya mapaathag sing simple kag mahapos maintiendihan ang iya ginapatihan sa iban. Halimbawa, posible magsiling ang iya classmate: “Wala ’ko nagapati nga may Dios kay wala ko man sia nakita.” Puede isiling sang imo bata: “Halimbawa, nagalakatlakat ka sa isa ka forest nga malayo gid sa siudad kag banwa. Dayon, may nakita ka didto nga isa ka matahom nga balay. Ano ayhan ang imo mapensaran? Posible nga magsiling ka nga kon may naghimo sini nga balay, sigurado nga may naghimo man sang aton planeta kag sa tanan nga buhi nga butang.” w24.12 18 ¶16