David kala napi sekeda situasi ti tusah ke ngasuh iya nyabak. Mayuh orang begedika iya. Indah sekeda ari diri sebilik iya sereta bala kaban iya enda setia ngagai iya lalu nguji deka ngemediska iya. (1 Sam. 19:​10, 11; 2 Sam. 15:​10-14, 30) Maya napi siti situasi ti amat tusah ba pengidup, David nulis: “Aku nyau lelak bedemuh. Genap malam peninduk aku basah laban ai mata. Panggal aku nyau basah laban ai mata aku.” (Mas. 6:​6, 7) Taja pan David napi mayuh situasi ti tusah, tang iya yakin Jehovah sayauka iya. David nulis: “[Jehovah] udah ninga sabak aku.” (Mas. 6:8) Ayat seharitu nunjukka Jehovah amat sayauka kitai sereta ibuhka asai ati kitai. David nyemaka Jehovah baka ke nulis semua ai mata iya dalam siti bup. David amat yakin Jehovah beratika sereta ingat semua pemedis ke diasaika iya. David andal, Jehovah ukai aja nemu utai ke ditapi iya, tang mega nemu baka ni utai nya ngachau emosi iya. w24.12 22 ¶11-12

Taja pan kitai udah nyadi orang Kristian ke besai tuai, tang kitai agi patut ngaga pemansang. Kena ngereja nya, kitai patut nyeliah ari nyadi kelalu yakin enggau diri empu. (1 Kor. 10:12) Nya alai, “anang ngetu meresa diri empu” kena nentuka kitai terus ngaga pemansang. Ba surat rasul Paul ke nuju ngagai orang Kristian ba Kolosi, iya sekali agi madahka, kitai patut mengkang nyadi orang Kristian ke besai tuai. Taja pan sida udah nyadi orang Kristian ke besai tuai, tang Paul nangkan sida ngambika enda ditipu penemu orang ba dunya tu. (Kol. 2:​6-10) Pia mega, Epafras, ke ngelala bala menyadi dalam raban gempuru nya, seruran besampi ngambika sida “ulih bediri tegap baka orang ke besai tuai.” (Kol. 4:12) Nama ulih dipelajarka kitai ari tu? Paul enggau Epafras nemu, ngambika ulih mengkang nyadi orang ke besai tuai, tu begunaka usaha kitai empu sereta sukung ari Petara. Seduai iya dekaka orang Kristian ba Kolosi mengkang nyadi orang Kristian ke besai tuai, enda ngira nama penanggul ke ditapi sida. w24.04 6-7 ¶16-17

Nangika Jehovah reti iya, kitai amat rinduka Jehovah nyentukka kitai enggai ngereja sebarang utai ke deka ngemediska ati Iya. Kitai keran deka belajarka bida entara utai ti betul enggau utai ti salah, sereta entara pemendar enggau pemula, ngambika kitai ulih diterima Jehovah. (J-lam. 2:​3-6; Heb. 5:14) Enti kitai takutka mensia lebih agi ari nangika Petara, kitai ulih dilimpangka ari pemendar. Peratika cherita pasal 12 iku tuai raban bansa Israel, ke diasuh ngintip menua ke disemayaka Jehovah ngagai orang Israel. Ba sepuluh iku pengintip, asai takut sida ke orang Kanaan besai agi ari pengerindu sida ke Jehovah. Sida madah ngagai orang Israel ke bukai: “Kitai enda ulih ngelaban sida laban sida kuat agi ari kitai.” (P-pau. 13:​27-31) Sigi amat, enti nitihka runding mensia, orang Kanaan endang kering agi. Tang, sapa-sapa ke madahka orang Israel enda ulih ngalahka munsuh sida, kebendar iya enda berunding pasal Jehovah. w24.07 9 ¶5-6