Mambu mbi ngie fueti longuka matedi kimasi kiaku? Ava mabanza maku mabuelama mu nandi, ḿba benu lunkuiza tomba kutubila matedi mambu mankaka mankinza dedi, makani ma kadika mutu mu benu. Buidi ngie wulenda zabila, kitoko ki khati ki mutu wunkaka? Phila yimboti mulenda vangila mawu yidi mu kutuba kiedika, kuvana biuvu ayi kukuwa buboti. (Tia. 1:19) Muingi mununga kuba masolo mamboti, vala tombulu kuvanga mambu mankinza dedi kudia va kimueka, kukangala mu bibuangu bimbanga batu bawombo ayi kusamuna va kimueka. Mvandi wulenda longuka matedi mutu wunkaka bo mumviokisa thangu vakimueka na bakundi ayi basi dikanda. Muingi wuzaba buidi mutu widi yaku bumasi kankuiza vangila mambu, viokisanganu thangu mu ziphila ziviakana na batu baviakana. w24.05 27-28 ¶6-7

Mu bilumbu binkuiza, befu tuala viokila mu mambu maphasi mala luta tombulu tufiatila Yave mu ntima woso. Binongo bi Kibibila ayi bi zikhomba zitu mu bilumbu bitu, biala tusadisa kuyindula buidi Yave kamonisina zikhadulu buka dimanya dinneni muingi kusadisa bisadi biandi. Yindulanga buboti mu binongo abiobio. Mu phila ayoyo, ngie wala tadila Yave Dimanya diaku Dinneni. Mvandi, tuala luta ba bakubama muingi kukindisa zikhomba mu kimvuka. Dedi, Yesu wuvana Simoni dizina di Cefa (basekudila “Petelo”) dinsundula “Kitini ki Dimanya.” (Yoa. 1:42) Mansundula ti nandi wutambula kiyeku ki kubomba ayi kusikimisa zikhomba mu kimvuka. Kibibila kintedila bakulutu ba kimvuka banga ‘mvemvu wu dimanya dinneni didi ku thandu.’ Mawu mansundula ti bawu bafueti kieba zikhomba mu kimvuka. (Yesa. 32:2) Bukiedika, befu boso tumbankanga beni ndandu mu lusalusu lu bakulutu ba kimvuka, kuba kuandi boti tuidi babakala ove bakietu. Ayi mawu ma tusadisanga kulandakana zikhadulu zi Yave zidi buka dimanya dinneni. w24.06 28 ¶10-11

Mintinu mi Isaeli mi buela mioko mbuongimini yikiedika, miawu Yave kaba tadilanga, mintinu mikuikama. Nduka mintinu mioso balandakana mbuongimini yi luvunu, Yave wuba tadila mintinu bakhambu ba bakuikama kibila bambanda mbusa. (1 Minti. 21:​25, 26; 2 Lusa. 12:1) Kibila mbi mbuongimini yikiedika yibela diambu dinkinza kuidi Yave? Mintinu, bawu baba kiyeku ki kutuadisa dikabu di Yave mu mbuongimini yikiedika. Mvandi, mbuongimini yi luvunu, yaba natanga batu kuvanga masumu mangolo ayi kuvangila batu bankaka mambu mambi. (Hose. 4:​1, 2) Kubotula kuandi mambu amomo, mintinu ayi dikabu, baba batu bakivana kuidi Yave. Kibibila kindedikisa mbuongimini yi luvunu na kiphinga. (Yele. 3:​8, 9) Mutu wumvanganga kiphinga, wummonisanga kukhambu ku lukuikumunu kuidi mutu kafueti luta monisina lukuikumunu ayi mantuadisanga beni kiunda kuidi mutu wukuela yandi. Bobuawu mvandi, mutu wukivana kuidi Yave na kukhambu ba wukuikama, wunyongisanga beni ntim’andi.—Deute. 4:23. w24.07 22-23 ¶12-15