Yala an be se ka la a la ko kiti tuma na, Jehova bena mɔgɔw kiti tilenninya la tuma bɛɛ wa? Ɔnhɔn! I ko Ibrayima, an b’a faamu ka ɲɛ ko Jehova dafanin lo, a ka hakilitigiya ɲɔgɔn tɛ yen ani tuma min na a bena “adamadenw bɛɛ kiti,” a bena a yira ko a be makari. A ye fɔrɔmasɔn di a Dencɛ ma ani a ye kitikow bɛɛ kalifa a ma (Zan 5:22). Jehova n’a Dencɛ b’a lɔn min be mɔgɔ kelen kelen bɛɛ dusukun na (Mat. 9:4). U bena mɔgɔ kelen kelen bɛɛ “kiti tigɛ ni tilenninya ye”! An ka la a la kosɔbɛ ko min ka fisa, Jehova b’o lɔn. An be sɔn a ma ko ale lo ka ɲi ka kiti tigɛ, anw tɛ! (Ezayi 55:8, 9). O la, an b’an hakili sigi ka kitikow bɛɛ to ale n’a Dencɛ bolo. A Dencɛ ye Masacɛ dafanin ye, min be kiti tigɛ cogo tilennin na ani a be makari i ko a Faa.—Ezayi 11:3, 4. w24.05 7 § 18-19

Siɲɛ fɔlɔ min na Yezu ye Natanayɛli kunbɛn, a ye koo dɔ fɔ min b’an dɛmɛ k’a faamu ko a kɔrɔtanin lo an ka kɛ mɔgɔ kɔnɔgwɛw ye. Tuma min na Filipu tagara n’a teri Natanayɛli ye Yezu fɛ, koo kabakoman dɔ kɛra. Yezu tun ma deli ka Natanayɛli ye, nga a ko: “Nin ye Isirayɛliden yɛrɛ ye tigitigi. Namaramɔgɔ tɛ.” (Zan 1:47). Natanayɛli ka hɔɔrɔnya ye Yezu kabakoya. Natanayɛli tun ye mɔgɔ dafabali ye i ko anw. Nga, filankafoya tun t’a ka koow la ani a tun ye hɔɔrɔn ye koo bɛɛ la. O diyara Yezu ye ani a y’a tando o kosɔn. Jehova be koo minw ɲini an fɛ Zaburuw 15nan kɔnɔ walisa k’an koo diya a ye, u fanba b’a yira an ka ɲi ka mɔgɔ wɛrɛw minɛ cogo min na. Zaburuw 15:3 b’a fɔ ko mɔgɔ min b’a fɛ ka to Jehova ka soo kɔnɔ, o tigi “te mɔgɔ tɔgɔjugu fɔ, a te kojugu kɛ a tɔɲɔgɔn na, a fana t’a sigiɲɔgɔn nɛni.” N’an t’an kumacogo kɔrɔsi, an be se ka koo jugu kɛ tɔɔw la.—Zaki 1:26. w24.06 10 § 7, 9; 11 § 10

N’i b’i yɛrɛ labɛn koɲuman waajuli kama, i tɛna siran kojugu ka kuma mɔgɔw fɛ. Sanni Yezu k’a ka kalandenw ci waajuli la, a kɔnna k’u dɛmɛ u y’u yɛrɛ labɛn (Luka 10:1-11). U ye Yezu ka ladiliw sira tagama minkɛ, u sera ka koo ɲuman caaman kɛ ani u ye ninsɔndiyaba sɔrɔ o la. An be se k’an yɛrɛ labɛn cogo di waajuli kama? An ka ɲi ka miiri k’a filɛ an bena min fɔ ani cogo min na an be se k’o fɔ an yɛrɛ kumacogo la. Mɔgɔw ka teli ka koo minw fɔ an ye, an be se ka miiri u la fila wala saba la ani k’a filɛ an bena u jaabi cogo min na. N’an b’a fɛ ka baro daminɛ ni mɔgɔ dɔ ye, an k’an hakili sigi, ka yɛlɛmisɛnw kɛ ani ka koow kɛ teriya la. w24.04 16 § 6-7