Dawuda ye gwɛlɛya caaman sɔrɔ a ka ɲɛnamaya kɔnɔ, o minw y’a to a kasira. Dɔw y’a kɛlɛ ani a ka lannamɔgɔ dɔw yɛrɛ y’a janfa (1 Sam. 19:10, 11; 2 Sam. 15:10-14, 30). Wagati gwɛlɛ dɔ la, a y’a sɛbɛ ko: “Ne barika banna ŋunankojugu fɛ. Suu o suu ne ka dilan be ɲigi kasi bolo, n ɲaji be n ka dilan bɛɛ ɲigi.” (Zab. 6:7). Hali ni gwɛlɛyaw tun be Dawuda kan, a tun lanin b’a la ko Jehova b’ale kanu. A y’a sɛbɛ ko: “Masaba ye ne kasikan mɛn.” (Zab. 6:9). Bi ka vɛrise kɔnɔnakumaw b’a yira ka gwɛ ko Jehova b’an kanu kosɔbɛ ani a b’a janto an dusukunnakow la. A tun be Dawuda ɲɛɛ na ko ale ɲɛji bɔnna cogo min na, Jehova y’o sɛbɛ a ka sɛbɛ kɔnɔ. O kɔrɔ ko a tun lanin b’a la ko Jehova b’ale ka tɔɔrɔw kala ma ani ko a tɛna ɲinɛ u kɔ. Nga o dɔrɔn tɛ. A tun lanin b’a la fana ko o tɔɔrɔw be min kɛ ale la, a sankolola Faa kanutigi b’o kala ma. w24.12 22 § 11-12

An ka ɲi ka banba ka kɛ kerecɛn kɔgɔninw ye. Nka an ka ɲi k’an jija fana ka to a ye. O kama, an man ɲi ka la an yɛrɛ la kojugu (1 Kor. 10:12). An ka ɲi k’an “yɛrɛ sɛgɛsɛgɛ k’a filɛ” n’an bele be ɲɛtaga kɛra Alako ta fan fɛ. Kɔlɔsikaw ka lɛtɛrɛ kɔnɔ, ciden Pol y’a yira ka gwɛ tugun ko a kɔrɔtanin lo an ka to mɔgɔkɔrɔbaw ye Alako ta fan fɛ. Hali n’u tun ye mɔgɔkɔrɔbaw ye ka ban Alako ta fan, Pol ko u k’u yɛrɛ kɔrɔsi walisa duniɲamɔgɔw ka miiriya kana u lafili (Kɔlɔs. 2:6-10). Epafarasi fana tun be Kɔlɔsi kafodenw lɔn ka ɲɛ. A tun be to ka delili kɛ walisa u “ka se ka kɔgɔ Ala koo la.” (Kɔlɔs. 4:12). An be se ka kalan juman lo sɔrɔ o koo la? Pol ni Epafarasi fila bɛɛ y’a faamu ko walisa ka to mɔgɔkɔrɔbaw ye Alako ta fan fɛ, an ka ɲi ka jijaliw kɛ ani ka Ala ka dɛmɛ ɲini. Kɔlɔsikaw ka gwɛlɛyaw bɛɛ n’a ta, Pol ni Epafarasi tun b’a fɛ u ka to mɔgɔkɔrɔbaw ye Alako ta fan fɛ, o kɔrɔ kerecɛn kolɔnbagaw. w24.04 6-7 § 16-17

N’an be siran Jehova ɲɛ cogo bɛnnin na, a koo bena diya an ye kosɔbɛ. An tɛna a ɲini abada ka koo dɔ kɛ min man di a ye. An b’a fɛ kosɔbɛ ka ɲuman lɔn ka bɔ juguman na ani ka tiɲɛn lɔn ka bɔ ngalon na sabu an b’a fɛ k’an koo diya Jehova ye (Talenw 2:3-6; Eburuw 5:14). N’an be siran adamadenw ɲɛ ka tɛmɛ Ala kan, o be se k’a to an be tiɲɛn sira bila. An ka Israɛldenw ka kuntigi tan ni fila ka koo lajɛ. Jehova tun ye layidu ta ko a bena jamana min di Israɛldenw ma, u y’u ci ka taga o lajɛ. U la mɔgɔ tan tun be ni kanuya min ye Jehova koo la, Kanankaw ɲɛsiran bonyana ka tɛmɛ o kan. U y’a fɔ Israɛlden tɔɔw ye ko: “An te se ka taga mɔgɔ nunu kɛlɛ, u barika ka bon n’an ta ye.” (Nɔnb. 13:27-31). Adamadenw ɲɛɛ kɔrɔ, Kanankaw barika tun ka bon kosɔbɛ. O tun ye tiɲɛn lo ye. Nka k’a fɔ ko Israɛldenw tɛna se ka jamana bɔsi u juguw la, o kɔrɔ ko u ɲinɛna Jehova kɔ le. w24.07 9 § 5-6