O unu, akuluntu balenda kala ye ziku vo Yave omonanga yo yangalela e salu kiau. Vana ntandu a salu kia vungula ekambi, longa, samuna e nsangu zambote, akuluntu ayingi bevananga moko muna salu kia tunga fulu ya nsambila yo sadisa awana bebwilwanga e sumbula. Akaka besadilanga muna Buka ya Kingula Mbevo yovo muna Comissões de Ligação com Hospitais. Akuluntu ana bekuyivananga muna salu yayi, bebadikilanga e nkutakani se dibundu dia Yave. Besalanga ye fululu kiawonso muna lungisa yiyekwa yau ye vuvu kia sia vo Nzambi osinga kubasenda mu mana bevanganga. (Kol. 3:23, 24) Vena ye mpangi ana ke balendi sala e salu kia kinkuluntu ko. Kansi, yeto awonso tuna ye lekwa tulenda vana kwa Yave. Nzambi otoma yangalelanga vava tuvanganga e ngolo muna kunsadila. Omonanga nkayilu tuvananga muna yikama e salu kia nz’amvimba, kana nkutu vo ke mia ntalu ko. Oyangalelanga mpe vava tuviokesanga makuzuka yo loloka konso mpangi utuvangidi diambu diambi. Kala ye vuvu vo Yave oyangalelanga mana olendanga vanga. Okuzolanga ye osinga kusenda.—Luka 21:1-4. w24.06 23 ¶12-13

O lusansu lwa Solomo lusonganga dina dilenda bwila konso selo kia Yave. Olenda vola e sumu diampwena i bosi, omona vo mawonso kuna kinsalukisa mavangamene. Kansi, avo otomene yindula dina divangamene, obakula vo mambu mayingi makizowa katekele vanga oma mamfididi muna sumuka. O mambu mama makizowa malenda kala vo kuyisia muna yikundi yambi, nsaka zambi yo kwenda muna fulu yambi, dilenda kala vo muna internete. Dilenda kala mpe vo wayambula samba, tanga Bibila, kwenda muna tukutakanu yo sala e salu kia umbangi. Nze i toko diyikwanga muna Ngana, e sumu diandi ke divangamene kuna kinsalukisa ko. Adieyi tulongokele muna nona kiaki? Ke tufwete venganga kaka e sumu ko, kansi tufwete venganga mpe mambu malenda kutufila mu vola e sumu. Solomo wasonga e mbuta diambu vava kasoneka lusansu lwalu—Mat. 5:29, 30. w24.07 16 ¶10-11

Nki i lusalu lwalu? I salu kia samuna e nsangu za Kintinu kivuluzanga e mioyo mia wantu. (2 Kor. 4:1) Nki i yinzu yatûma? E yinzu yatûma, i selo ya Nzambi ana besamunanga e nsangu zambote kwa akaka. Muna lumbu ya Paulu, akiti mvungu miatûma basadilanga muna natina lekwa yamfunu nze madia, vinyu ye nzimbu. Diau dimosi mpe, Yave watuvana e kiyekwa kia samuna e nsangu zambote. Muna lusadisu lwa Yave, tulenda vua nkuma tuvuidi o mfunu muna samuna e nsangu zambote una ufwene. Ezak’e ntangwa, tulenda mona wonga wa siwa kitantu yovo bembolwa kwa wantu. Aweyi tulenda sundila wonga wau? Badika e sambu kia antumwa vava bakanikinua vo bayambula samuna e nsangu zambote. Vana fulu kia mona wonga, balomba lusadisu lwa Yave kimana bakwamanana vovela kuna unkabu wawonso. Yave wavana e mvutu za sambu kiau vana vau. (Mav. 4:18, 29, 31) Avo ezak’e ntangwa wonga wa wantu omonanga, lomba kwa Yave kawokesa o zola kwaku kuna kwa wantu kimana walembi kala yo wonga wa kubasamunuina e nsangu zambote. w24.04 16 ¶8-9