Mutindu mosi na Yehova, beto diaka beto lenda pesa bantu yankaka bima yina bakele na yau nsatu samu beto kezolaka bau. Na kifuani, nge mezaba mpangi mosi Muklisto yina kele na nsatu ya bima ya kudia to ya bilele? Yehova lenda sadisa nge samu nge pesa yandi kima yina lenda sadisa yandi na kukokisa nsatu yango. Bisadi ya Yehova mezabana mingimingi samu na kikadulu ya kukaba yina bakemonisaka ntangu kisumbula mosi mesalama. Na kifuani, na ntangu ya maladi ya yimbi ya COVID-19, bampangi kabulaka bima ya kudia, bima ya kuvuata, mpe bima yankaka samu na kusadisa bantu yina vuandaka na nsatu ya lusadusu. Bampangi mingi diaka pesaka makabu ya nzola samu na kisalu yina kena kusalama na yinza ya mvimba. Yasadisaka samu na kubaka lusadusu ya kupesa bampangi na yinza ya mvimba. Basadilaka bampova yina kele na Baebre 13:16: “Beno zimbakana ve kusala mambote mpe kukabila bantu yankaka bima, samu Nzambi kesepelaka mpenza na bankayilu ya mutindu yina.” w24.09 27 ¶6-7

Kanisa na kifuani yayi. Nge kena kusosa kisalu mosi samu na kusadisa dibuta na nge. Bisalu zole memonana. Nge metadila mambu nionso, na kifuani, yinki kele kisalu yango, programe na yau, ntangu yikua yakebanda kubaka nge mpe mambu yankaka. Bisalu yango nionso zole kele yimbi ve samu na Baklisto. Mbala yankaka nge kesepela kupona kisalu mosi kati na nionso zole samu nge kesepelaka na yau to samu yakefutaka mbongo mingi. Kasi, yakele na mambu yankaka yina nge fueti tadila tekila ya kubaka nzengolo. Na kifuani, kisalu yango kebebisa programe na nge ya lukutakanu ya kimvuka? Kisalu yango kekudia ntangu yina nge kele na yau nsatu samu na kukokisa bansatu ya makanisi mpe ya kimpeve ya dibuta na nge? Kukiyuvusa biuvu yango kesadisa nge na kutula “mambu yina meluta mfunu”​—nsambudulu na nge mpe bansatu ya dibuta na nge—​na ntuala ya kusosa mbongo mingi. Na manima nge lenda baka nzengolo yina Yehova kesakumuna. w25.01 17 ¶11-13

Ata kana bantu yankaka vuandaka niokola nge, nge lenda kukindimisa ti Yehova kezolaka nge mpe yandi kebakaka nge na valere. Kana nge kena kumona ti nge ‘melemba nzutu,’ kuzimbakana ve ti Yehova kemonaka mambu ya mbote yina kele na ntima na nge mpe yandi mosi bendaka nge penepene na yandi. (Yoa. 6:44) Yandi kevuandaka ntangu nionso pene ya kusadisa nge samu nge kele na mfunu na meso na yandi. Beto lenda longuka banguilu ya Yehova na kutadilaka kifuani ya Yesu. Ntangu Yesu vuandaka na ntoto, yandi vuandaka tula dikebi mpe kumonisa ntima kiadi na bantu yina bantu yankaka vuandaka mona mpamba. (Mat. 9:9-12) Ntangu nketo mosi yina vuandaka na nsatu ya kubeluka na maladi mosi ya ngolo simbaka kinkuti na yandi, Yesu bombaka yandi mpe yandi pesaka yandi felisitasion samu na kiminu na yandi. (Mrk. 5:25-34) Yesu monisaka kimuntu ya Tata na yandi na mutindu ya kukoka. (Yoa. 14:9) Na yau, nge lenda kukindimisa ti Yehova kebakaka nge na valere mpe yandi kemonaka bikadulu na nge ya mbote, na kifuani kiminu mpe nzola na nge samu na yandi. w24.10 7 ¶4-5