Bibuti, sadisa mwana ya nge na kuzonzila na bantu ya nkaka samu na yinki yandi ke kwikilaka ti ya ke na muntu yina yidikaka bima nyonso. Beno lenda tala dyaka na mwana masolo yina ke na jw.org yina ke zonzilaka faso luzingu bandaka. Nge lenda sadisa mwana ya nge na kutala na bamambu yina yandi me tanga, yinki yandi lenda sadila samu na kusadisa bantu ya nkaka na kuzaba ti ya ke na muntu yina yidikaka bima nyonso. Kasi, na ntangu yandi ke na sololaka na mpangi ya lukolo, yandi lenda sadila nzonzolo ya pete samu na kunata yandi na kukanisa mbote-mbote. Na kifwani, mpangi ya lukolo lenda zonza na yandi: “Mu ke kwikilaka kaka na mambu yina mu ke talaka. Kasi nabunu mu tala Nzambi.” Mwana lenda zonza: “Kanisa mwa fioti: Kana nge ke na tambulaka na kati ya brusu, mpe nge me tala yinzo ya kitoko, kasi ata muntu ke vandaka na kisika yina. Nge ke kanisa kwandi ti yinzo yango basikaka kaka faso yina samu nge me tala ata muntu? Kana yinzo yayi ke na lakisaka ti ya ke na muntu mosi ya mayela yina salaka yawu, yinki nge ke zonza samu na bima nyonso yina ke na ntoto mpe na zulu?” w24.12 18 § 16

Beto nyonso ke vandaka na nsatu ya malongi ya mbote samu na kubaka mikanu ya mfunu. Bakuluntu mpe bakristo ya kukula na kimpeve lenda pesa beto malongi yango. Bantangu ya nkaka, beto lenda tala ti malongi ya bawu lenda simba ve samu ba me nuna to samu beto lenda kanisa ti ba me zaba ve bamambu ya bubu yayi. Kasi Yehova zola ti beto kuwa bantu ya kukula samu ba me kutana bamambu mingi, ba me zaba bamambu mingi mpe ba ke na ndwenga. Na ntama, Yehova sadilaka bisadi ya yandi ya biboba samu na kukindisa dikanda ya yandi mpe kutwadisa bawu. Na kifwani, yandi sadilaka Moyize, Davidi, mpe ntumwa Yoane. Ba zingaka ve na ntangu mosi mpe baluzingu ya bawu vandaka ve mutindu mosi. Na nsuka ya luzingu ya bawu, ba pesaka malongi ya ndwenga na bampangi ya ntwenya. Malongi ya bawu lakisaka mfunu ya kutumama na Nzambi. Beto vanda ntwenya to kuluntu, malongi ya bawu lenda sadisa beto.—Rom. 15:4; 2 Tim. 3:16. w24.11 8 § 1-2

Na ntangu ya Nowe Nzambi niminaka bantu na kudya to kunwa menga. (Kub. 9:3, 4) Yehova vutukila dyaka mambu yayi na musiku yina yandi pesaka na bana ya Izraele. Ba me fwana ‘kufwa’ muntu nyonso yina ke kudya menga (Lev. 7:27) Yesu zonzaka ti Bazwife zola zitisa bamambu nyonso yina ke na musiku ya Moyize. (Mat. 5:17-19) Na yawu, yandi sosaka ve kuzonza na Bazwife na kudya musuni ya nzutu ya yandi to kunwa menga yina ke na kati ya yawu.Yesu sadilaka kifwani kaka mutindu yandi salaka ntangu yandi zonzaka na kento ya bwala ya Samariya ti: “Maza yina mu ke pesa, ke kupesa luzingu ya ntangu nyonso.” (Yoa. 4:7, 14) Yesu vanda sosa ve kuzonza ti ya vandaka na dibulu yina vandaka na maza yina zola pesa luzingu ya ntangu nyonso na kento yayi ya bwala ya Samariya. Mutindu mosi mpe, Yesu vanda sosa ve kuzonza ti kimvuka ya bantu yayi vanda kuwa yandi ya Kapenawume zola kuzwa luzingu ya ntangu nyonso kana ba kudya musuni ya nzutu ya yandi mpe kunwa menga ya yandi. w24.12 9 § 4-6