ပတအိၣ်ဒီး တၢ်ဂံၢ်တၢ်ဘါဒ် ယဟိဝၤယွၤဘၣ်အဃိ ပဟ့ၣ်ပှၤဂၤ တၢ်ဂံၢ်တၢ်ဘါ ဒ်သိးဒီးအီၤ တသ့ဘၣ်. ဘၣ်ဆၣ် ပကွၢ်လိအီၤ ဒီးသူပဂံၢ်ပဘါလၢ ကမၤစၢၤပှၤဂၤသ့. အဒိ ပမၤစၢၤ ဒီပုၢ်ဝဲၢ်လၢအသးပှၢ် ဒီးဒီပုၢ်ဝဲၢ်မုၣ်ခွါ လၢအအိၣ်တဆူၣ်ဘၣ်တဖၣ် ခီဖျိ မၤကဆှီန့ၢ် အဟံၣ် ဒီးလဲၤပှ့ၤန့ၢ် တၢ်လၢအဝဲသ့ၣ် လိၣ်ဘၣ်ဝဲသ့. တကးဒံးဘၣ် ပလဲၤမၤကဆှီ ဒီးဘှီဂ့ၤထီၣ်က့ၤ တၢ်အိၣ်ဖှိၣ်လီၢ် သ့စ့ၢ်ကီး. ပကဘၣ် နီၣ်ဘၣ်လၢ တၢ်လၢပတဲန့ၣ် အကဲထီၣ် တၢ်ဂံၢ်တၢ်ဘါလၢ ပှၤဂၤအဂီၢ်သ့. အဒိ ပှၤလၢကဒိးန့ၢ်ဘၣ် တၢ်ဂံၢ်တၢ်ဘါ ခီဖျိ နတဲအီၤလၢ နပာ်လုၢ်ပာ်ပှ့ၤ တၢ်လၢအမၤဝဲန့ၣ် အိၣ်တဂၤဂၤဧါ. ဒီးပှၤလၢ အလိၣ်ဘၣ် တၢ်မၤမုာ်ထီၣ်က့ၤန့ၣ် နသ့ၣ်ညါ အိၣ်တဂၤဂၤဧါ. မ့ၢ်အိၣ်န့ၣ် တဲဘၣ်အီၤလၢ နသးအိၣ်အီၤနီၢ်ကီၢ်. ဒီးနပာ်ဖျါထီၣ်လၢ နသးအိၣ်အီၤ ခီဖျိ လဲၤဟးလၢအအိၣ်, ကိးအီၤလၢ လီတဲစိ, ဆှၢန့ၢ်အီၤ ခးဖိတဘ့ၣ်, ဆှၢန့ၢ်အီၤ လံာ်လၢအံမ့ မ့တမ့ၢ် လၢမဲးစ့းသ့. နကဘၣ် တဲအီၤဒ်လဲၣ်န့ၣ် နတလိၣ် သးကိၢ်တၢ် အါတလၢဘၣ်. နမ့ၢ်တဲအီၤ တၢ်ကတိၤလၢ အပှဲၤဒီးတၢ်အဲၣ်တၢ်ကွံ စှၤကိာ်ဖျၢၣ်န့ၣ် ဘၣ်သ့ၣ်သ့ၣ် ကကဲထီၣ် တၢ်ဂံၢ်တၢ်ဘါလၢ အကလဲၤခီဖျိ တၢ်ကီတၢ်ခဲ လၢတနံၤအဂီၢ်. ဒီးဘၣ်သ့ၣ်သ့ၣ် အသးကမုာ်ထီၣ်က့ၤ.—ကတိၤ ၁၂:၂၅; အ့း ၄:၂၉. တၢး၂၄.၀၉ ၂၈ ¶၈-၁၀

နမ့ၢ်ကဲ တၢ်အိၣ်ဖှိၣ်အပှၤမၤစၢၤတၢ်န့ၣ် ဘၣ်သ့ၣ်သ့ၣ် နမၤစၢၤဘၣ်တၢ် ကအိၣ်တတီၤဖိလံ. အဃိ ဒ်သိးနကကဲထီၣ်ဘၣ် တၢ်အိၣ်ဖှိၣ်သးပှၢ်အဂီၢ် နကအိၣ်ဒီး တၢ်ဂ့ၤတၢ်ဝါလၢ လံာ်စီဆှံ ပာ်ဖျါထီၣ်ဝဲန့ၣ် အါမးလံ. နဘၣ်သးမၤစၢၤအါထီၣ် ဒီပုၢ်ဝဲၢ်မုၣ်ခွါ ဒီးမၤ “တၢ်မၤလၢအဂ့ၤ” လၢတၢ်အိၣ်ဖှိၣ်သးပှၢ် မၤဝဲဧါ. တၢ်အိၣ်ဖှိၣ်သးပှၢ် အမူဒါန့ၣ် မ့ၢ်မနုၤလဲၣ်. တၢ်အိၣ်ဖှိၣ်သးပှၢ်တဖၣ်န့ၣ် အဝဲသ့ၣ် ဟးစံၣ်တဲၤတဲလီၤတၢ်လၢ တၢ်သးဆူၣ် ဃုာ်ဒီးတၢ်အိၣ်ဖှိၣ်ဖိ. အဝဲသ့ၣ် မၤတၢ်ဆူၣ်ဆူၣ် ဒ်သိး ကကဟုကယာ် ဒီးသိၣ်လိ ဒီပုၢ်ဝဲၢ်မုၣ်ခွါ. တကးဒံးဘၣ် အဝဲသ့ၣ် မၤဆူၣ်ထီၣ် ဒီပုၢ်ဝဲၢ်မုၣ်ခွါတဖၣ် အတၢ်နာ်န့ၢ် ယဟိဝၤယွၤ ခီဖျိ တၢ်လၢအဝဲသ့ၣ် တဲဝဲဒီးမၤဝဲ. အဃိ လံာ်စီဆှံကိးဝဲ တၢ်အိၣ်ဖှိၣ်သးပှၢ် တဖၣ်အံၤ “ဒ်တၢ်ဟ့ၣ်တဖၣ် အသိး.” (အ့း ၄:၈) ဒီပုၢ်ဝဲၢ်ခွါတဂၤ ကကဲထီၣ်ဘၣ် တၢ်အိၣ်ဖှိၣ်သးပှၢ်အဂီၢ် အကဘၣ်မၤဝဲဒ်လဲၣ်. နကကဲထီၣ်ဘၣ် တၢ်အိၣ်ဖှိၣ်သးပှၢ်အဂီၢ် တမ့ၢ်ထဲ နကဘၣ်အိၣ်ဒီး တၢ်သ့တၢ်ဘၣ်ဘၣ်. အဒိ ဖဲနလဲၤတီၣ်ထီၣ် တၢ်မၤအခါ နမ့ၢ်အိၣ်ဒီး တၢ်သ့တၢ်ဘၣ်လၢ တၢ်မၤခိၣ်လီကီဝဲန့ၣ် နကန့ၢ်ဘၣ်တၢ်မၤ. ဘၣ်ဆၣ် နကကဲထီၣ်ဘၣ် တၢ်အိၣ်ဖှိၣ်သးပှၢ်န့ၣ် တမ့ၢ်ဒ်န့ၣ်ဘၣ်. နကကဲထီၣ်ဘၣ် တၢ်အိၣ်ဖှိၣ်သးပှၢ်အဂီၢ် နကဘၣ်အိၣ်ဒီး တၢ်သ့တၢ်ဘၣ်လၢ ကစံၣ်တဲၤတဲလီၤတၢ် ဒီးသိၣ်လိတၢ်အဂီၢ်. တကးဒံးဘၣ် နကဘၣ်အိၣ်ဒီး တၢ်ဂ့ၤတၢ်ဝါလၢ လံာ်စီဆှံ ပာ်ဖျါထီၣ်ဝဲဖဲ ၁ တံၤမသ့း ၃:၁-၇ ဒီး တံတူး ၁:၅-၉. တၢး၂၄.၁၁ ၂၀ ¶၁-၃

တၢ်အိၣ်ဖှိၣ်သးပှၢ်, ကဝီၤအပှၤကွၢ်တၢ်, ဝဲၤတြၢ် ဒီးပှၤပၢဆှၢတၢ်ကမံးတံာ် ဟံးစုနဲၣ်ကျဲပှၤ ခဲအံၤခဲအံၤ ဒ်သိး ကမၤစၢၤပှၤလၢ ပကဘူၣ်ထီၣ်ဘါထီၣ် ယဟိဝၤယွၤအဂီၢ်. ဘၣ်ဆၣ် တဘျီတခီၣ် တၢ်ဟံးစုနဲၣ်ကျဲ လၢပဒိးန့ၢ်ဘၣ် တနီၤန့ၣ် ပတနၢ်ပၢၢ်အီၤ လီၤတံၢ်လီၤဆဲးဘၣ်. ဒီးဘၣ်သ့ၣ်သ့ၣ် ပကဆိကမိၣ်လၢ တၢ်ဟံးစုနဲၣ်ကျဲအံၤ တကဲဘျုး လၢပဂီၢ်ဘၣ်. တကးဒံးဘၣ် ဘၣ်သ့ၣ်သ့ၣ် ပကဃုထံၣ် ဒီပုၢ်ဝဲၢ်လၢအတီခိၣ်ရိၤမဲပှၤတဖၣ် အတၢ်လီၤတူာ်လီၤကာ်. ပမ့ၢ်လဲၤတၢ်လၢ တၢ်နာ်အပူၤန့ၣ် ပနာ်လၢ ယဟိဝၤယွၤ ဟံးစုနဲၣ်ကျဲ အတၢ်ကရၢကရိ ဒီးအသ့ၣ်ညါ ပတၢ်အိၣ်သး အဂ့ၤကတၢၢ်. အဃိ ပဂုာ်ကျဲးစၢး ဒိကနၣ် ဒီးမၤထွဲ အတၢ်ဟံးစုနဲၣ်ကျဲ တဘျီဃီ လၢတၢ်သးအိၣ်အပူၤ. (ဧ့ၤ ၁၃:၁၇) ဒီးပသ့ၣ်ညါစ့ၢ်ကီးလၢ ပမ့ၢ်မၤထွဲ အတၢ်ဟံးစုနဲၣ်ကျဲန့ၣ် ကမၤစၢၤ တၢ်အိၣ်ဖှိၣ်ဖိလၢ ကဆဲးအိၣ်ဒီး တၢ်ဃူတၢ်ဖိး. (အ့း ၄:၂, ၃) တကးဒံးဘၣ် ပသ့ၣ်ညါလၢ ဒီပုၢ်ဝဲၢ်ခွါလၢ အတီခိၣ်ရိၤမဲပှၤတဖၣ် တကဲပှၤလၢပှၤပှဲၤဘၣ် သနာ်က့ ဖဲပဒိကနၣ်ဒီးမၤထွဲ တၢ်ဟံးစုနဲၣ်ကျဲအခါ ယဟိဝၤယွၤ ကဆိၣ်ဂ့ၤပှၤ. (၁ မူၤ ၁၅:၂၂) ဒီးမ့ၢ်လိၣ်လၢ ပတၢ်ကရၢကရိ ကဘၣ်မၤဘၣ်ထီၣ်က့ၤ တၢ်ဟံးစုနဲၣ်ကျဲ တမံၤမံၤန့ၣ် ပနာ်သပှၢ်တၢၢ်လၢ အဆၢကတီၢ်မ့ၢ်ဘၣ်န့ၣ် ယဟိဝၤယွၤ ကမၤဘၣ်ထီၣ်ဝဲ. တၢး၂၅.၀၃ ၂၄ ¶၁၃-၁၄