တၢ်အိၣ်ဖှိၣ်သးပှၢ်, ကဝီၤအပှၤကွၢ်တၢ်, ဝဲၤတြၢ် ဒီးပှၤပၢဆှၢတၢ်ကမံးတံာ် ဟံးစုနဲၣ်ကျဲပှၤ ခဲအံၤခဲအံၤ ဒ်သိး ကမၤစၢၤပှၤလၢ ပကဘူၣ်ထီၣ်ဘါထီၣ် ယဟိဝၤယွၤအဂီၢ်. ဘၣ်ဆၣ် တဘျီတခီၣ် တၢ်ဟံးစုနဲၣ်ကျဲ လၢပဒိးန့ၢ်ဘၣ် တနီၤန့ၣ် ပတနၢ်ပၢၢ်အီၤ လီၤတံၢ်လီၤဆဲးဘၣ်. ဒီးဘၣ်သ့ၣ်သ့ၣ် ပကဆိကမိၣ်လၢ တၢ်ဟံးစုနဲၣ်ကျဲအံၤ တကဲဘျုး လၢပဂီၢ်ဘၣ်. တကးဒံးဘၣ် ဘၣ်သ့ၣ်သ့ၣ် ပကဃုထံၣ် ဒီပုၢ်ဝဲၢ်လၢအတီခိၣ်ရိၤမဲပှၤတဖၣ် အတၢ်လီၤတူာ်လီၤကာ်. ပမ့ၢ်လဲၤတၢ်လၢ တၢ်နာ်အပူၤန့ၣ် ပနာ်လၢ ယဟိဝၤယွၤ ဟံးစုနဲၣ်ကျဲ အတၢ်ကရၢကရိ ဒီးအသ့ၣ်ညါ ပတၢ်အိၣ်သး အဂ့ၤကတၢၢ်. အဃိ ပဂုာ်ကျဲးစၢး ဒိကနၣ် ဒီးမၤထွဲ အတၢ်ဟံးစုနဲၣ်ကျဲ တဘျီဃီ လၢတၢ်သးအိၣ်အပူၤ. (ဧ့ၤ ၁၃:၁၇) ဒီးပသ့ၣ်ညါစ့ၢ်ကီးလၢ ပမ့ၢ်မၤထွဲ အတၢ်ဟံးစုနဲၣ်ကျဲန့ၣ် ကမၤစၢၤ တၢ်အိၣ်ဖှိၣ်ဖိလၢ ကဆဲးအိၣ်ဒီး တၢ်ဃူတၢ်ဖိး. (အ့း ၄:၂, ၃) တကးဒံးဘၣ် ပသ့ၣ်ညါလၢ ဒီပုၢ်ဝဲၢ်ခွါလၢ အတီခိၣ်ရိၤမဲပှၤတဖၣ် တကဲပှၤလၢပှၤပှဲၤဘၣ် သနာ်က့ ဖဲပဒိကနၣ်ဒီးမၤထွဲ တၢ်ဟံးစုနဲၣ်ကျဲအခါ ယဟိဝၤယွၤ ကဆိၣ်ဂ့ၤပှၤ. (၁ မူၤ ၁၅:၂၂) ဒီးမ့ၢ်လိၣ်လၢ ပတၢ်ကရၢကရိ ကဘၣ်မၤဘၣ်ထီၣ်က့ၤ တၢ်ဟံးစုနဲၣ်ကျဲ တမံၤမံၤန့ၣ် ပနာ်သပှၢ်တၢၢ်လၢ အဆၢကတီၢ်မ့ၢ်ဘၣ်န့ၣ် ယဟိဝၤယွၤ ကမၤဘၣ်ထီၣ်ဝဲ. တၢး၂၅.၀၃ ၂၄ ¶၁၃-၁၄

ခဲအံၤ ပအိၣ်မူဘၣ်လၢ ဆၢကတီၢ်လၢ အလီၤသူၣ်ပိၢ်သးဝးဒိၣ်မး. ဒီးတၢ်လၢလံာ်စီဆှံ တဲပာ်စၢၤဝဲန့ၣ် ပထံၣ်ဘၣ်လၢ အဟဲလၢပှဲၤထီၣ် ကိးနံၤဒဲး. အဒိ ပထံၣ်ဘၣ်လၢ “ကလံၤစိးအစီၤပၤ” ဒီး “ကလံၤထံးအစီၤပၤ” ဘၣ်သးဒိၣ်စိလၢ ဟီၣ်ခိၣ်ဒီဘ့ၣ်အဃိ အဝဲသ့ၣ် ပြၢလိာ်သး. (ဒၤ ၁၁:၄၀) ပထံၣ်ဘၣ်စ့ၢ်ကီးလၢ ဘီမုၢ်တၢ်သးခုကစီၣ်န့ၣ် ပှၤစံၣ်တဲၤတဲလီၤဝဲလၢ ဟီၣ်ခိၣ်ဒီဘ့ၣ်ညါ ဒီးပှၤအကကွဲၢ်တဖၣ် ဘူၣ်ထီၣ်ဘါထီၣ်က့ၤ ယဟိဝၤယွၤ. (ၡါ ၆၀:၂၂; မး ၂၄:၁၄) တကးဒံးဘၣ် ပဒိးန့ၢ်ဘၣ် နီၢ်သးတၢ်အီၣ် “ဖဲအဆၢကတီၢ်လၢ အကြၢးဝဲဘၣ်ဝဲ” အါအါဂီၢ်ဂီၢ်. (မး ၂၄:၄၅-၄၇) ဘၣ်ဃးဒီး တၢ်ကကဲထီၣ်သး လၢခါဆူညါန့ၣ် ယဟိဝၤယွၤ ဆဲးမၤစၢၤပှၤအဃိ ပနၢ်ပၢၢ်တၢ်ဂ့ၢ် ၡဲဒိၣ်ထီၣ်မၣ်ဒိၣ်ထီၣ်. (ကတိၤ ၄:၁၈) ဒီးဖဲတၢ်နးတၢ်ဖှီၣ်ဖးဒိၣ် စးထီၣ်အခါ ဒ်သိးပကဆဲးအိၣ်ဒီး တၢ်သးတီ ဒီးဆဲးအိၣ်ဃူဃူဖိးဖိးအဂီၢ် ပကဘၣ်မၤဒ်လဲၣ်န့ၣ် ပကသ့ၣ်ညါဘၣ် တၢ်ဂ့ၢ်ခဲလၢာ်လၢ ပကြၢးသ့ၣ်ညါ. သနာ်က့ ဘၣ်ဃးဒီး တၢ်ကကဲထီၣ်သး လၢခါဆူညါန့ၣ် ပကဘၣ် သ့ၣ်နီၣ်ထီၣ်လၢ တၢ်ဂ့ၢ်လၢ ပတသ့ၣ်ညါဘၣ်န့ၣ် ကအိၣ်တနီၤ. တၢး၂၄.၀၅ ၈ ¶၁-၂

ပှၤကွဲးထါစံးထီၣ်ပတြၢၤ ပာ်ဖျါထီၣ်ဝဲ လီၤတံၢ်လီၤဆဲး ဘၣ်ဃးဒီး တၢ်တဲဟးဂီၤ ပှၤဂၤအဂ့ၢ်. တၢ်တဲဟးဂီၤ ပှၤဂၤအဂ့ၢ်န့ၣ် အဲၣ်ဒိးတဲ မနုၤလဲၣ်. အဲၣ်ဒိးတဲဝဲ ပတဲလံၣ်တဲလီ ပှၤတဂၤအဂ့ၢ် ဒ်သိးအမံၤအသၣ် ကဟးဂီၤအဂီၢ်. စံးထီၣ်ပတြၢၤ ၁၅:၃ ဒုးသ့ၣ်နီၣ်ထီၣ် စ့ၢ်ကီးပှၤလၢ ယဟိဝၤယွၤ အပှၤတမှံၤန့ၣ် တမၤအၢ ပှၤလၢအဃၢၤ နီတမံၤဘၣ် ဒီးအတမၤဟးဂီၤ အသကိးတဖၣ်အမံၤဘၣ်. (စံး ၁၅:၁) ဘၣ်ဆၣ် ပမၤဟးဂီၤဘၣ် ပသကိးတဖၣ် အမံၤသ့ဒ်လဲၣ်. တဘျီတခီၣ် လၢတၢ်တပလီၢ်သးအပူၤ ပကတဲဟးဂီၤဘၣ် ပှၤတဂၤဂၤအမံၤ ခီဖျိပဟးတဲ အဂ့ၢ်လၢ အတဂ့ၤဘၣ်. အဒိ ဆိကမိၣ်ကွၢ် တၢ်အိၣ်သး တဖၣ်အံၤ. (၁) ဒီပုၢ်ဝဲၢ်မုၣ်တဂၤ တဆဲးမၤ ကစၢ်ယွၤတၢ်မၤ လၢဆၢကတီၢ်လၢပှဲၤလၢၤဘၣ်. (၂) ပှၤဒီမိၢ်ဝၤခံဂၤ တမၤတၢ်လၢ ဘ့ၤသ့လးလၢၤဘၣ်. (၃) ဒီပုၢ်ဝဲၢ်ခွါတဂၤ တကဲတၢ်အိၣ်ဖှိၣ်သးပှၢ်လၢၤဘၣ် မ့တမ့ၢ် တကဲတၢ်အိၣ်ဖှိၣ် အပှၤမၤစၢၤတၢ်လၢၤဘၣ်. တၢ်မ့ၢ်ကဲထီၣ်သးဒ်အံၤန့ၣ် ပတဘၣ် ဆိကမိၣ်ကြီလၢ ဒီပုၢ်ဝဲၢ်မုၣ်ခွါတဖၣ်အံၤ အတၢ်အိၣ်သး ဆီတလဲန့ၣ် ဘၣ်သ့ၣ်သ့ၣ် ကမ့ၢ်ခီဖျိလၢ အဝဲသ့ၣ် မၤကမၣ်တၢ် တမံၤမံၤအဃိ ဒီးဟးတဲဘၣ် ပှၤဂၤဘၣ်. တၢ်ကဲထီၣ်သးဒီး အဝဲသ့ၣ်ဒ်အံၤန့ၣ် ဘၣ်သ့ၣ်သ့ၣ် တၢ်ဂ့ၢ်အဂၤလၢ ပတသ့ၣ်ညါဘၣ်န့ၣ် ကအိၣ်ဒီဒူၣ်ဒံး. တကးဒံးဘၣ် ပှၤတမှံၤလၢ အအိၣ်လၢ ယဟိဝၤယွၤအဒဲပူၤန့ၣ် “အဝဲတမၤအၢ ပှၤလၢအဃၢၤနီတမံၤဘၣ် ဒီးအတမၤဟးဂီၤ အသကိးတဖၣ်အမံၤဘၣ်.” တၢး၂၄.၀၆ ၁၁ ¶၁၁-၁၃