Wi kin lan bɔt wetin mek i impɔtant fɔ bi pɔsin we ɔnɛs frɔm wetin bin apin di fɔs tɛm we Jizɔs ɛn Nataniɛl bin si. We Filip bin kam wit in padi Nataniɛl fɔ kam si Jizɔs, wan impɔtant tin bin apin. Pan ɔl we dis na di fɔs tɛm we Jizɔs ɛn Nataniɛl bin si, Jizɔs bin se: “Una luk rial Izrɛlayt we nɔ bɛnbɛn atɔl.” (Jɔn 1:47) Jizɔs bin notis se Nataniɛl bin rili ɔnɛs. Jɔs lɛk wi, Nataniɛl nɔ bin pafɛkt. Bɔt in nɔto pɔsin we bin ipokrit, i bin ɔnɛs pan ɔltin. Jizɔs bin kɔle Nataniɛl bikɔs ɔf dat ɛn i bin tɔk fayn tin bɔt am. Bɔku pan di tin dɛn we wi fɔ du fɔ mek Jiova gladi we de na Sam 15 gɛt sɔntin fɔ du wit di we aw wi de trit ɔda pipul dɛn. Sam 15:3 se pɔsin we na strenja na Jiova in tɛnt “nɔ de yuz in mɔt fɔ pwɛl ɔda pipul dɛn, i nɔ de du bad tin to in neba ɛn i nɔ de mek in padi dɛn shem.” If wi de pwɛl ɔda pipul dɛn nem, wi go ambɔg dɛn siriɔs wan.​—Jems 1:26. w24.06 10 ¶7, 9; 11 ¶10

If yu pripia fayn fɔ go prich, i go izi fɔ mek yu tɔk to pipul dɛn. Jizɔs bin ɛp in disaypul dɛn fɔ pripia bifo i sɛn dɛn fɔ go prich. (Lyuk 10:1-11) Bikɔs di disaypul dɛn du wetin Jizɔs tɛl dɛn, dɛn bin gladi bikɔs ɔf wetin dɛn bin ebul fɔ du. Aw wi go pripia fɔ prich? I go fayn fɔ mek wi tink bɔt wetin wi go want fɔ tɔk ɛn aw wi go tɔk am insay wi yon wɔd dɛn. I go fayn bak fɔ mek wi tink bɔt tin dɛn we pipul dɛn we de na wi tɛritri go tɔk ɛn tray fɔ tink bɔt aw wi go ansa dɛn. Dɔn we wi mit pipul dɛn, wi fɔ tray fɔ rilaks, smayl, ɛn tɔk fayn to dɛn. w24.04 16 ¶6-7

Di rizin we impɔtant pas ɔl we mek wi de prich di gud nyuz na bikɔs wi lɛk Jiova Gɔd ɛn in oli nem. Wi de si di prichin wok as we fɔ mek wi go prez di Gɔd we wi lɛk. Wi gri wit ɔl wi at se Jiova Gɔd fit fɔ gɛt di glori, di ɔnɔ, ɛn di pawa frɔm di wan dɛn we de wɔship am. Wi de gi am glori ɛn ɔnɔ we wi ɛp ɔda pipul dɛn fɔ biliv se “na [in] mek ɔltin” ɛn na in gi wi layf. Wi de gi am wi pawa we wi yuz wi tɛm, trɛnk, ɛn di tin dɛn we wi gɛt fɔ du ɔl wetin wi ebul fɔ prich to pipul dɛn. (Mat. 6:33; Lyuk 13:24; Kol. 3:23) Fɔ tɔk am simpul wan, wi lɛk fɔ tɔk bɔt Gɔd bikɔs wi lɛk am. Wi want fɔ tɛl ɔda pipul dɛn bak bɔt in nem ɛn di kayn Gɔd we i bi. w24.05 17 ¶11