Kubutudibua kua ndumbuluilo a mianda a bena Yunda, kubabakuile kui Yesu kubaadi peepi. Bena Nkidishitu babaadi balombene kufubisha nsaa ipeela ibaadi ishaale buabadia kuilumbuula bua kudima ngikashi bu lukumiino na kunyingiila. (Eb. 10:25; 12:1, 2) Tui peepi na kupeta mpombo ikata ikile ibapetele bena Nkidishitu ba mu Ebelu. (Mat. 24:21; Kbf. 16:14, 16) Tutaluuleyi angi malango abaabadi bape bena Nkidishitu kui Yehowa alombene kuitukuasha n’atue namu lelo uno. Mu mukanda wa bena Ebelu, Mpoolo baadi munyingishe bena kukumiina naye buabadia kunyiisha kubadika Eyi di’Efile Mukulu na kunangushena. (Eb. 5:14–6:1) Mpoolo baadi afubisha bifundue bia kiina Ebelu bua kuibapatuluila’shi, mushindo wabalanguila Yehowa kui bena Nkidishitu ngukile bibaabadi abamulanguila kui bena Yunda. Mpoolo baadi muwukie’shi kutamisha kiwukilo na mpushisho a bia binyibinyi, kubaadi kulombene kukuasha bena Nkidishitu buabadia kuikala b’elumbuule bua kutundula malongiesha a madimi na kuiapela. w24.09 8-9 ¶2-3; 10 ¶6

Balongi ba Yesu abaadi na lukalo lua kunyingishibua. Buakinyi? Bangi abaadi balekie mashibo aabo, bifuko biabo, na midimo yabo bua kulonda Yesu nsaa yoso. (Mat. 19:27) Bangi abaadi abebakitshina mianda ibubi muanda abaadi bafikie balongi ba Yesu. (Yo. 9:22) Abaadi bakumiine kuno kushintuluka mu nshalelo aabo na kukiengieshibua muanda abaadi bakumiine’shi Yesu baadi Mesiya baadi mulayibue. (Mat. 16:16) Kadi nsaa ibaadi Yesu muipayibue, abaadi benyongole na babofule ku mashimba muanda tababaadi abauku akikiebe kukitshika. Kushi mpaka Yesu tabaadi mumone kinyongua kia balongi baaye bu kubofula kua mu kikudi nya. Na dingi baadi auku’shi ta mbenyongole muanda wa kukutua kua lukumiino nya. Biabia nka mu diadia efuku dibaadi musangukie, babangile kunyingisha ba kuuku baye. Bu kileshesho, baadi mumuenekiele Mariya a ku Magadala nsaa ibaadi adidi ku mashama aaye. (Yo. 20:11, 16) Baadi dingi mumuenekiele balongi babidi babaadi abende ku Emause. Na baadi mumuenekiele’nyi Mpiele mutumibua. w24.10 13 ¶5-6

Baledi, lumbuulayi bana benu buabadia kuikala na mushindo wa kupatuluila bangi buakinyi mbakumiine mui mupangi. Bi kuikala buwa su anutaluula pamune miisambo i mu jw.org ayamba’shi: “Les jeunes s’interrogent​—Création ou évolution?” Akupu, esambileyi mianda ilombene kukuasha bana bobe buashi bekale na bishinkamiisho biabadi balombene namu kukuasha bangi bua kupusha bia binyibinyi pabitale Mupangi. Na su kui muntu kampanda akumiina’shi besambile pabitale wawa muanda, ebanyingishe batungunukie na kupatuluila bantu mianda mu mushindo upelepele. Bu kileshesho, bena kalasa nabo be kuamba’shi: “Atukumiinaa nka mianda yatumono na meso, t’atukumiina mui Efile Mukulu atush’abamono nya.” Nsongua muina Nkidishitu mulombene kuakula’shi: “Banda kupuandikisha’shi okuete kutambuka munkatshi mua mutamba wi kula na bantu, bosangana nshibo ya mabue yabadi bebakie kalolo. We kuamba namu naminyi? Nka bilombene muntu e na binangu kuibaka nshibo i buwa ya mabue, mu mushindo umune, ma planete eetu, na bintu bioso bi na muwa bi muanka, mbebipangie kui muntu kampanda e na binangu!” w24.12 18 ¶16