Etitano, 4 Septemba
“Omupukifi oye oixuna kOmwene, ndelenee Ye omushiiviki wovayuki.” — Omayel. 3:32.
Jesus okwe tu tulila po oshihopaenenwa shiwa shi na sha nokukala ovanashili, eshi a li a shakena naNatanael oshikando shaye shotete. Eshi Filippus a li a eta kaume kaye Natanael kuJesus, opa li pa ningwa oshinima shi didilikwedi. Nonande Jesus ka li a shakena nale naNatanael, Jesus okwa li a popya a ti: “Taleni Omuisrael washili ehe na oukengeleledi washa.” (Joh. 1:47) okwa li a mona sha shididilikwedi muNatanael. Natanael ka li a wanenena, ngaashi ashike fye, ashike ka li omunaihelele, ndele okwa li omunashili mwaaishe. Jesus okwa li a lenga nokupandula Natanael omolwounashili waye. Ihapu yomoiteelelwa oyo ya tumbulwa mEpsalme 15 oi na sha nanghee hatu dulu okuhafifa Jehova. Epsalme 15:3 ola popya kutya oo e li metwali laJehova ke na okukala ha “popyaana nelaka laye noita ningile omukwao owii, nomushiinda waye ite mu fifa ohoni.” Ngeenge otwa kala hatu longifa nai elaka letu. — Jak. 1:26. w24.06 10 ¶7, 9; 11 ¶10
Olomakaya, 5 Septemba
“Omwene, nokuli neendemoni oda dulika kufye eshi twa longifa edina loye.” — Luk. 10:17.
Ngeenge owe lilongekidile nawa oukalele, oto ka kala u udite wa manguluka, ngeenge to popi navamwe. Jesus okwa li a kwafela ovahongwa vaye ve lilongekide, ofimbo ine va tuma moukalele. (Luk. 10:1-11) Molwaashi ova li va tula moilonga osho Jesus e va honga, ova li va dula okuninga oinima ihapu iwa, naasho osha li she va etela ehafo linene. Ongahelipi hatu dulu okulilongekidila oukalele? Otwa pumbwa okudiladila kwaasho hatu ka popya noku shi yelifa monghedi i li paushitwe, hatu longifa oitya yetu vene. Otashi ke tu kwafela yo, ngeenge otwa diladila keenghedi dimwe omo ovanhu tave ke linyenga nanghee hatu ke va nyamukula. Opo nee eshi hatu popi novanhu, ohatu ka kala twa ngungumana, hatu limemesha notu na omhepo youkaume. w24.04 16 ¶6-7
Osoondaxa, 6 Septemba
“Jehova Kalunga ketu, oove wa wana okupewa efimano, etumbalo neenghono molwaashi oove wa shita oinima aishe.” — Eh. 4:11.
Etomheno la fimanenena kutya omolwashike hatu udifa onghundana iwa ololo kutya otu hole Jehova Kalunga nedina laye liyapuki. Otwa tala ko oukalele wetu u li onghedi yokufimanekifa Kalunga oo tu hole. Ohatu tu kumwe kutya Jehova Kalunga okwa wana okupewa efimano, etumbalo neenghono kovalongeli vaye ovadiinini. Ohatu mu fimaneke noku mu tumbaleka, ngeenge hatu lombwele vamwe oushili oo kutya oye a “shita oinima aishe” nonokutya otu na omwenyo molwaashi oye eu tu pa. Ohatu longifa yo efimbo, eenghono noiniwe yetu, opo tu kufe ombinga pauyadi moilonga yokuudifa, ngaashi eenghalo detu tadi shi pitike. (Mat. 6:33; Luk. 13:24; Kol. 3:23) Oku shi popya paunafangwa, otu hole okupopya kombinga yaKalunga oo tu hole. Ohashi tu linyengifa yo tu lombwele vamwe kombinga yedina laye, nonokutya oKalunga a tya ngahelipi. w24.05 17 ¶11