Luhapu, Jehova okwa li ha longifa ovaprofeti vaye va londwele nova pukulule oshiwana shaye. Pashihopaenenwa, okwa popya okupitila muJeremia, a ti: “Aluka! Akutu oove nakuliteeka nge, Israel. . . Ame itandi ke mu didivala vali, osheshi Aame omunanghenda. . . Ame itandi ka kala nda handuka fiyo alushe. Shimwe ashike, kala wa koneka oulunde woye.” (Jer. 3:​12, 13, KB-13) Jehova okwa popya okupitila muJoel, a ti: “Alukeni kwaame nomutima weni aushe.” (Joel 2:​12, 13, KB-13) Okwa popya okupitila muJesaja, a ti: “Lifeteni; kufeni po owii womoilonga yeni koshipala shange, nye mu efe okulonga owii.” (Jes. 1:​16-19, KB-13) Okupitila muHesekiel, Jehova okwa li a pula a ti: “Ame ngeno ndi hokwe efyo lomuhenakalunga? . . . Hasheshi ngeno, ye ote lialuluka keendjila daye ndele ta kala e nomwenyo? Osheshi Ame inandi hokwa efyo laau ta fi. . . Onghee hano lialulukeni, nye mu kale mu nomwenyo.” (Hes. 18:​23, 32, KB-13) Jehova oha kala a hafa neenghono, ngeenge e wete ovanhu tave lidilulula, molwaashi okwa hala va kale nomwenyo fiyo alushe. w24.08 9 ¶5-6

Onghedi vali imwe omo Jehova ha ulike kutya ke na okatongo, omokushilipaleka kutya ovanhu aveshe mounyuni otava dulu okumona Ombiibeli. Omishangwa Diyapuki oda li da shangwa tete momalaka atatu, mOshiheberi, mOshiaramia nomOshigreka. Mbela ovo hava dulu okulesha omalaka oo mwa li mwa shangwa tete Ombiibeli, ove na ekwatafano lopofingo naJehova ve dulife vakwao? Hasho nandenande. (Mat. 11:25) Jehova ihe tu shivi tu ninge ookaume kaye, molwaashi ashike twa hongeka, ile tu shii omalaka opehovelo omo mwa li mwa shangwa Ombiibeli. Ponhele yaasho, okwa pa omhito ovanhu aveshe mounyuni va mone ounongo waye, kutya nee ovahongwa, ile hasho. Eendjovo daye da nwefwa mo, Ombiibeli, oda tolokwa momalaka omayovi, nokungaho ovanhu mounyuni aushe otava dulu okumona ouwa momahongo ado, nokulihonga nghee tava dulu okupanga oukaume naye. — 2 Tim. 3:​16, 17. w24.06 6-7 ¶13-15

Ehanauno longhalelo yoinima yOshijuda, olo Jesus a li a xunganeka, ola li la ehena popepi. Ovakriste ova li va pumbwa okulongifa efimbo olo la xupa ko, opo ve lilongekide mokukulika omaukwatya, ngaashi eitavelo nelididimiko. (Heb. 10:25; 12:​1, 2) Nafye otu li pokutaalela oudjuu munene, oo u dulife oo wa li wa taalelwa kOvakriste Ovaheberi. (Mat. 24:21; Eh. 16:​14, 16) Tala komayele amwe, oo taa dulu yo oku tu kwafela, oo Jehova a li a yandja, opo a kwafele Ovakriste ovo. Omuyapostoli Paulus okwa ladipika ovaitaveli vakwao va konakone Eendjovo daKalunga moule. (Heb. 5:14–6:1) Paulus okwa li a tofa mOmishangwa dOshiheberi, nokwa yelifa kutya omolwashike onghedi omo Ovakriste hava longele Jehova ya yooloka ko filufilu konghedi omo Ovajuda va li have mu longele. Paulus okwa li a ladipika Ovakriste va shiive nova ude ko oshili oyo i li mOmbiibeli, opo va dule okudidilika mo omahongo oipupulu, noku a henuka. w24.09 8-9 ¶2-3; 10 ¶6