Nun baledy, ambulwiishaay mwaan iinun bwa kuleebeley myand yidyey mwiitabij habitaatal cyaakahang. Udy mwa kuhet dyambulwiish ha kubal nend haakaabumw biin-bwaal bidy mu jw.org mu bituh bya ney “les jeunes s’interrogent Création ou évolution ?” Ni iisambilaay ha tubingil tudy mwa kusak mwaan iibuh bwa kwiikaley mutwiishiibw ni kwambulwiish bakwaabw bwa kumvwobw myand ya biin-biin habitaatal cyaakahang. Mukashish bwa iikal ni mumvwiij maheehel ni majaalal hady muut ukaam kumanyik myand yivul. Cileejel, muloony aababw a mu kalaas udy mwa kuleeb ney: “Niitaatabij teng myand yinataatal, ki ciish mwanj kutaloh Mawej.” Ki sand mwiin Krist udy mwa kwaalabul ney: “Langeby ket uw wendel mwiit kuleeh ni taawuny ni utal cind ciibak ni mabw. I biny biwiikal mwa kulang? Iikaleby ney kudy muut a meej udy mulong cind aacy, i mushind kaay udy muut udy mulong biit byoos eeby kay mwa kwiikalok!” w24.12 diib. 18 cik. 16

Tut boos tudyaakal tukaam buludik bwa kwangat mahangadik ma buseeb mu shikacil iitut. Tudy mwa kuhetel buludik oobw kudy bakul ba mu cisumbw ni kudy biin Krist bashimat mu spirit. Bab biikal bakuluuh kutudy, katwiish mwa kulek mibel yaababw ney yikaady yihicil. Yehow i mukat bwa tulongel kudy baat bakuluuh. Bakaady ni mafuk mavul ni meej ni myand yivul yidyobw bamanyik biituhitok. Mu ciisang cifundilobw Bibl, Yehow ukadil mudimw ni baat bakuluuh ba lulamat bwa kulombol baat bindiy. Twangat cileejel cya Moyiz, Davih, ni cya mupostol Jah. Baakady ni buumy mu biisang bishiilangan. Ni shikacil aababw waakady mushiilangan menmen. Haakadyobw ki haabwiih ni kufw, baakishil baasand mibel ya meej. Woos wa ku baan-balum ba lulamat aab, uleejel buseeb budy naabw kukooyel ku mikenj ya Mawej. Ning tut baasand eecy bakuluuh, tudy mwa kuhet musangal ha kutalulul mibel yaababw eey.​—Rom 15:4; 2 Tim. 3:16. w24.11 diib. 8 cik. 1-2

Mu ciisang cya noweh, Mawej wambiil baat bwa kulek kudyobw mash. (Kbwa. 9:3, 4) Yehow uleebel cikwaabw bwa bwaal oobw mu mikenj yiheeley biin Izaleel. Muut woos waakady udy mash, baakady ni bwa “kumuzuh.” (Lv. 7:27, NWT) Yeez uleebel byend bwa mukenj oow. (Mat. 5:17-19) Nook, kaakadyoh bend wambil baat bwa kudyobw nyeet ni kunobw mash mindiy bimweemweek ni mees eeby. Haakady Yeez wiisamb ni mwaan-mukaj wa ku Samarih, ukadil mudimw ni cileejel eecy: ‘Bwaal mwanz uniiyiiy kutwaal wiiyiiy kutwaal buumy bwa mwendelel.’ (Jah 4:7, 14) Yeez kaakadyoh bend ukaam kwambil mwaan-mukaj wa ku Samarih oow ney, waakady mwa kun mwanz weet oow bwa kushaaley ni buumy buyiil. Bya mushind aakaabumw, haakady Yeez wiisamb ni baat ba ku Kafarnawum, kaakadyoh bend ukaam kwiibambil ney bwa kuhetobw buumy bwa mwendelel byaakady bikaam bady nyeet ni ban mash mindiy bimweemweek eeby. w24.12 diib. 9 cik. 4-6