Njati rié nì ko Yova do nji ri ró, ko adi ke ji bbo. Føri adi rili nzɨ ko nji nzá ka ndi tho ke nyǒ ná ddikpa lo ro maddi. Ko adi riji bbo ko chu bblolo ma kana njonjonga chelo na ndirigoti ko chu bbʉbbʉlo ma kana njonjonga kali dhi lo na ndiro ko tso uni Yova na d’e. (Mez. 2:3-6; Ebr. 5:14) Njati ko di ndrŭ do nji Mungu do ko adi nji ná nga djolu ró, ko ka ko nga njonjo kʉ Yova adi ddi ná bbʉbbʉlo ró ro ná lo udha tso. Addinga Waisraeli dho Yova tsongʉeni djo ná ngø tso rangʉe lo ná 12 ngʉe ná bbobbonga dhó loroji djo di. Kpa kana 10 ngʉe ná kpa njingʉe Kanaani nǎ ndrŭ do nari dzá kpakpanga dangʉe da Yova ndima ji nari djolu. Kpa pongʉeri ndima lai Waisraeli dho: “Ko dho nzɨ ri ro ka ko rá lɨ nji fø kpa na ri dhonalo kpa kʉ kpakpa bbo ko djolu.” (Hes. 13:27-31) Bbʉbbʉ dhé, ndrŭ dhó nganjadha ró ro, Kanaani nǎ ndrŭ ngʉe kpakpa. Ro, Waisraeli nzá ka ndima sie ndima dhó mbubai djolu ri, ná føri ngʉ po ná kpa nzá ddingʉe nga Yova djo ri. w24.07 9 §5-6

Yova lod’i ndrŭ djo ná saa na, ke adi lonanga vʉ bblo dhé, ná føri ká ko ka ko uu? uo! Abrahamu chungʉeri nari bbai, Yova kʉ kaka ná ke, bbo kʉ nyod’yu na ná ke ndirigoti “dz’ lu djó lod’i ná ke.” Ke bbʉ mazoezi Yesu dho ndiro ndi d’ilo ndrŭ djo d’e. (Yoh. 5:22) Yova ma, Yesu ma na churie ndrŭ thí nǎ kʉ ná lo chu. (Mt. 9:4) Føri dzá lo dho, lo kpa si d’i ndrŭ djo ná saa na kpa si kʉ “chølo dhé nji”! Ako uri u nari kʉ, Yova ma, ndidhó lonangavʉdha ma na e bblo dhé. Ko churi chu nari kʉ, ko ro nzá ka lod’idha dho ri, ke kaka fø njí dho! (Isa. 55:8, 9) Ko bba lod’idha krʉ dhi lo Yova ma, ndidhi Dduna Yesu ma na dhó dhonalo Yesu adi ndidzá Baba dhó chølo ma, zølo ma na dyø.—Isa. 11:3, 4. w24.05 7 §18-19

Ya kwanza Yesu ma njungʉe Natanaeli na ro njingʉeni ná lo nǎ ro ko ka ko ba bbo na mana kʉ ná somo bbʉbbʉlo le ti le thí nǎ nari djo. Filipo ma, ndidzá kau Natanaeli ma na njungʉe Yesu na ná saa na, ddikpa bbo na mana kʉ ná lo njingʉeni. Nzá mai Yesu ma ro d’engʉe nju Natanaeli na anziro ro, Yesu pongʉeri ɨ: “Anja, bbʉbbʉ Mwisraeli, nga shasha kʉ ndi nǎ ro.” (Yoh. 1:47) Ke pongʉeri Natanaeli ngʉ bbʉbbʉ kʉ ná loti ndi thí nǎ bbo pli kʉ ná chu nǎ. Natanaeli ngʉe nzá kaka ná ke ko bbai dhé. Ro, ke nǎ nga ngʉe shasha ro ri, føri rɨngana ke ngʉe chø ndi ngʉ nji ná lo krʉ kana. Yesu bangʉe hwè fø lo dho ndirigoti ke mangʉe Natanaeli ma. Zaburi 15 nǎ lo ró bí kʉ ná nga dho ngbaribbai ma kodhó lo ka ndi tho Yova nyǒ nja ndrŭ na ko njini nari kana. Zaburi 15:3 pori nari kʉ, Yova dhó hema nǎ kʉ ná ndrŭ “nzɨ adi kali sha ndima dà na ri, kpa nzɨ adi ddikpa chelo ro ma nji ddi ndima lai ró ri ndirigoti kpa nzɨ adi ndima dhó bbakau ró dho nanga sa ri.” Njati ko di nja ndrŭ ró dho nanga sa fø di ná lo na ró, føri ka ndi liri ndrŭ mbu ndima che bbo.—Yak. 1:26. w24.06 10 §7, 9; 11 §10