Yesu unakpa dhó lo ká ungʉeri le li ndima kpakpa addudho? Dhonalo kpa kana nja kpa bbangʉe ndima dhó dza ma, familia ma, turusa ma na ndiro ndima dyø Yesu krʉ saa ró d’e. (Mt. 19:27) Ndirigoti nja ndrŭ ngʉ adi njini kpa na d’idhe kpa ngʉ Yesu unakpa nari dho. (Yoh. 9:22) Kpa bbangʉe fø ritsi krʉ ndima u Yesu kʉ, tso djo le tsongʉeni ná Masia nari dho. (Mt. 16:16) Ro, Yesu ndrŭ hwingʉe ná saa na, kpa ngʉe njedha na bbo, kpa thí bʉngʉeni bʉ ndirigoti kpa nzá chungʉe fø lo goti ká addu ma ka ndi njieni nari ro ri. Yesu nzá njangʉe njedha na ndi unakpa kʉ ndi dhe nari djotsina ná fø ri ro che ri. Ndirigoti ke chungʉeri nari kʉ njedha na kpa kʉ ná føri na mana nga kʉ, kpa kʉ udha na nga ri. Føri dzá lo dho, ndi ga ná dyi thei ke ngangʉe kpakpa ndi ndidhó bbakau li nari tso. Loroji na, ke dhongʉe ndi Maria Magdalene dho kabbuli djó le ngʉ dzz ná saa na. (Yoh. 20:11, 16) Føri kina, ke dhongʉe ndi ndi una aro kʉ ná mitume dho Emaus na kpa ngʉ ra ro. Ndirigoti luti ke dhongʉe ndi ki mutume Petro dho. w24.10 13 §5-6

Gø dhi ndrŭ anitayarisha nidhó ngba ndiro ke tú ndi u ná lo nanga Ngano ná Ke djo. Ni ka ni tilo ddinga jw.org djó kʉ ná ɨ djǒ ripo ná lo djo, “Vijana Huuliza—Uumbaji au Mageuzi?” Ndirigoti anitilo nidhó ngba nyǒ tho ná lo djo njaro ri na ke ka ndi kó nja ndrŭ tsotso ndima famu bbʉbbʉlo ritsi no ná Ke djo. Ali ke kpakpa ndiro ke tu lonanga dhʉdhʉ kʉ ná chu nǎ njati ddikpa ngba nanga jini ndi chu lo bbo fø lo djo ró. Loroji na, ke lai darasa nǎ ngba ka ndi pori ɨ mai: “Ma adi nja ma nja ná ritsi dhé u ndirigoti ma nzá d’erie Mungu ro nja ri.” Ddikpa jadda kʉ ná Mukristo ka ndi ngʉ logoti ɨ mai: “Anzingaddi i lo djo di, ni bbí ddikpa ngødja lu da ndrŭ e nanga nǎ ro ndirigoti chʉ ni si drrdrr chingʉeni dju na ná dza ro, nde føro ká ni ka ni po ngbá lo? Bbʉbbʉ dhé, fø dju na le chi ná dza ri dhǒ pʉlʉpʉlʉ nari kʉ, ri akili na kʉ ná ddikpa ke chingʉe. Føri bbai, ko di djó ná i dz’ ma, ri djó kʉ ná shi di ná ritsi ma na dho ringani ndi é ndi no ná ddikpa ke na!” w24.12 18 §16

Ko krʉ dhó lo urie chutsoddadha ndiro ko vʉ lonanga bblo d’e. Fø chutsoddadha ko ka ko ba kutaniko nǎ wazee dhó ro inga dhidhi kiroho nǎ ná le-djoi ma, le-vei ma na dhó ro. Njati rié da ma kpadhó cho da kodhó cho djolu ri ró, ri nzá ngani ko ddiri nari kʉ, kpa bbʉ ko dho nari kʉ b’lo cho da ná shauri. Yova jiri ko ba somo ngó ngʉ ná fø le-djoi ma, le-vei ma na dhó lo nǎ ro. Kpa chu lo, kpa adi lo famu ndirigoti kpa kʉ nyod’yu na ko djolu. Biblia le ngʉ ndi ná saa na, Yova njingʉe njí chi tøni ndi dho ná ngó kpa na ndiro kpa li ndidzá ndrŭ kpakpa ndirigoti kpa bbʉ chutsoddadha ndidzá ndrŭ dho d’e. Loroji na, akonja Musa ma, Daudi ma, mutume Yohana ma na dhó loroji. Kpa dingʉe njonjo kʉ ná saa na ndirigoti kpadhó hali ngʉe njonjo bbo. Chøchø kpa si ndima dhó maisha dzá mwisho na ná saa na, kpa bbʉngʉe nyod’yu dhi shauri jadda kpa dho. Fø kpetsi kpa krʉ tingʉe lo Mungu dho le ngarr nari dzá faida djo. Njati ko é jadda ma inga ngó ma ró, ko ka ko ba faida ngbà dhé kpadhó shauri nǎ ro.—Ro. 15:4; 2 Ti. 3:16 w24.11 8 §1-2