Таныклымылан сайын ямдылалтыда гын, шагалрак тургыжланаш тӱҥалыда да тыланда еҥ-влак дене мутланаш куштылгырак лиеш. Иисус тунемшыже-влакым таныклаш колтымо деч ончыч нунылан таныклымашлан ямдылалташ полшен (Лук. 10:1—11). Нуно ойлымыжо почеш ыштеныт. Тидлан кӧра служымаш моткоч сай лектышым конден, да тунемше-влак чот куаненыт. А кузе таныклымылан ямдылалташ лиеш? Мом ойлаш да кузе тидым шке мут дене каласаш, шоналтыза. Тыгак шоналтыза, ойлымыланда еҥ-влакын могай реакцийышт лийын кертеш? Кажне тӱрлӧ реакций годым мом те вашештеда, шонкален налза. Вара таныклыме годым тыланда лыпланаш, шыргыжаш да поро лияш гына кодеш. w24.04 16, абз. 6, 7

Ме Иеговам да тудын святой лӱмжым йӧратена. Тиде эн тӱҥ амал, молан ме поро уверым каласкалена. Таныклымаш мыланна йӧратыме Ачанам чапландараш йӧным пуа. Ме уло шӱм дене тыгай шомак дене келшена: «Господь, Тый чапымат, пагалымашымат, вийымат налаш йӧрышӧ улат» (Почм. 4:11). Иегова чылажымат ыштен да тудлан кӧра ме илен кертына манын, еҥ-влаклан пеҥгыде доказательстве-влакым конден, ме тудлан пагалымашым ончыктена да чапым пуэна. Ме Иеговалан шкенан вийнам пуэна, кунам жапнам да материальный шотышто мо улмым кертме семын служитлымаште кучылтына (Матф. 6:33; Лук. 13:24; Кол. 3:23). Молан ме чыла тидым ыштена? Молан манаш гын, мыланна йӧратыме Юмына нерген каласкалаш чот келша. Тыгак весе-влаклан тудын лӱмжӧ нерген да Иегован могай улмыжо нерген каласкалымына шуэш. w24.05 17, абз. 11

Уже кызытак Иегова мыланна тынысым пуа да мыланна пиалан лияш полша, а ончыкыжым курымашлык илышым пӧлекла. Ме Юмын сӧрымашыж-влаклан пеҥгыдын ӱшанена, вет тудын нуным шукташ кумылжат, вийжат уло. Тидын нерген шарнена гын, тиде мыланна Юмылан уло чон дене служитлаш да тудлан эн сайжым пуаш тарата. Лач тыге ожно илыше Юмын служитлышыже-влак ыштеныт. Мутлан, нунын коклаште Тимофей лийын (Евр. 6:10—12). Тимофей илыше Юмылан ӱшаным пыштен да сандене погынымаште чот тыршен (1 Тим. 4:10). Мом тудо ыштен? Апостол Павелын каҥашыже почеш тудо служымаште да погынымаште туныктышо семын кушкаш тыршен. Тыгак Тимофей иза-ака-влаклан — самырык-влакланат, кугурак-влакланат — чыла шотыштат сай примерым ончыктен. Тудын проста огыл заданий-влакат лийыныт. Мутлан, кӱлеш годым тудо чын корно деч кораҥше-влаклан туран, но йӧратымаш дене каҥаш-влакым пуэн (1 Тим. 4:11—16; 2 Тим. 4:1—5). Тимофей пален: Иегова тудым суапландара (Рим. 2:6, 7). w24.06 22—23, абз. 10, 11