Wa ka prepararkaba maʼalob antes tiʼ a jóokʼol kʼaʼaytajeʼ, maas chéen chʼaʼabil ken a wilil a kʼaʼaytaj tiʼ u maasil. Jesúseʼ tu preparartaj u discípuloʼob antes tiʼ u túuxtikoʼob kʼaʼaytaj (Luc. 10:​1-11). Letiʼobeʼ tu beetoʼob le baʼax aʼalaʼabtiʼoboʼ, le oʼolal le ka suunajoʼobeʼ jach kiʼimak u yóoloʼob yoʼolal le meyaj tu beetoʼoboʼ. ¿Bix unaj k-preparartikba utiaʼal le kʼaʼaytajoʼ? Yáaxeʼ maʼalob ka k-máans t-tuukul bix jeʼel k-tsolik tiʼ wa máax baʼax ku yaʼalik le Biblia jeʼex suukil k-tʼaaneʼ. Maʼalob xan ka k-tukult kaʼapʼéel wa óoxpʼéel baʼaloʼob suuk u yaʼalik le máakoʼob kajaʼanoʼob teʼ territoriooʼ yéetel baʼax jeʼel k-aʼaliktiʼobeʼ. Beyoʼ kéen tsikbalnakoʼon tu yéeteloʼobeʼ maʼ nerviosoʼoniʼ, tranquiloʼon yéetel táan k-cheʼej. w24.04 pág. 15, 16 § 6, 7

Toʼoneʼ yaʼab baʼax oʼolal k-kʼaʼaytaj, pero maases k-beetik tumen k-yaabiltmaj Jéeoba bey xan u kʼaabaʼ. Cada ken kʼaʼaytajnakoʼoneʼ táan k-alabartik Jéeoba, yéetel k-eʼesik de acuerdoʼon yéetel le baʼax ku yaʼalik le Bibliaaʼ: «Ka náajmatik a kʼamik nojbeʼenil, tsiikil bey xan páajtalil». ¿Bix túun jeʼel k-tsʼáaik nojbeʼenil wa k-alabarkeʼ? ¿Bix jeʼel k-eʼesik tsiikil wa respeto tiʼeʼ? Letiʼe kéen k-tsol tiʼ le máakoʼob Jéeoba beetmil tuláakal baʼaloʼ yéetel letiʼ tsʼaamiltoʼon le kuxtaloʼ. ¿Bix túun jeʼel k-tsʼáaik páajtalil wa poder tiʼeʼ? Letiʼe kéen meyajnaktoʼon k-tiempo, k-muukʼ yéetel le baʼaxoʼob yaantoʼon utiaʼal k-kʼaʼaytajoʼ (Mat. 6:33; Luc. 13:24; Col. 3:23). Toʼoneʼ uts t-tʼaan k-tsikbaltik tiʼ u maasil yoʼolal Jéeoba, le Dios jach k-yaabiltmoʼ. w24.05 pág. 17 § 11

Jéeobaeʼ ku tsʼáaiktoʼon jeetsʼelil bey xan kiʼimak óolal yéetel maʼ kun xáantaleʼ kuxtal minaʼan u xuul. Toʼoneʼ convencidoʼon de ke Jéeobaeʼ yaan u bendecirkoʼon tumen yaantiʼ u páajtalil utiaʼal u beetik. Yoʼolal lelaʼ k-tsʼáaik k-óol k-meyajt Jéeoba jeʼex tu beetil le máaxoʼob meyajt úuchjeakiloʼ. Koʼoneʼex ilik u ejemplo Timoteo (Heb. 6:​10-12). Timoteoeʼ jach confiarnaj tiʼ le Dios kuxaʼanoʼ (1 Tim. 4:10). Letiʼeʼ jach convencido yaan u bendecirtaʼal, yoʼolal leloʼ letiʼeʼ jach tu tsʼáaj u yóol u meyajt Jéeoba bey xan u yáantik u maasil. ¿Baʼaxoʼob tu beetaj? Apóstol Pabloeʼ tu yaʼalaj tiʼ Timoteo ka u maas maʼalobkíint bix u kaʼansaj, bix u tʼaan tu táan u maasil, ka u tsʼáa junpʼéel maʼalob ejemplo tiʼ le táankelmoʼoboʼ yéetel tiʼ le máaxoʼob yaan u jaʼabiloʼoboʼ. Kʼubéentaʼab xan tiʼ baʼaloʼob maʼ chéen chʼaʼabil u beetaʼaliʼ. Por ejemploeʼ aʼalaʼabtiʼ ka u tsʼáa consejo, pero ka u beet yéetel yaabilaj bey xan yéetel u jaajil u yóol (1 Tim. 4:​11-16; 2 Tim. 4:​1-5). Timoteoeʼ u yojleʼ Jéeobaeʼ ku yilik le baʼax táan u beetkoʼ yéetel yaan u bendecirtik (Rom. 2:​6, 7). w24.06 pág. 22, 23 § 10, 11