Nnaamweera atthu akina yoothokoronreeneni nyuwo moohireerela, muroromeleke weera Yehova annoosivelani ni annoovahani mwiitti. Wakhala weera nyuwo munniisoona ‘ohivareleya muteko’, muupuweleke weera Yehova ohoona itthu sooreera vamurimani vanyu nave ohoopurulelani wa yoowo. (Yoh. 6:44) Owo ikwaha sootheene ori oolikaneene weera ookhavihereni, mwaha wooweera nyuwo tootthuneya wa yoowo. Hiyo pooti oxuttera miyuupuwelo sa Yehova nthokororaka ntakihero na Yesu. Yesu areene elapo ya vathi, aahaasuwela atthu yahaapwatthiwa ni atthu akina, ni aahaakosoopa mooreera murima. (Math. 9:9-12) Vaavo muthiyana mmoha aatthuna olamihiwa eretta awe aatanvaawe ikuwo sa Yesu weera alame, Yesu aahimmaaliha ni aamuttottopela mwaha wa nroromelo nawe. (Mar. 5:25-34) Yesu onnoonihera moomalela mikhalelo sa Tiithi awe. (Yoh. 14:9) Mwa yeeyo, nyuwo pooti ororomelaka weera Yehova onnoopwatthani ni onnaweha mikhalelo sanyu sooreera, ohela mpuwa nroromelo nanyu ni nsivelo mummooniheraanyu. w24.10 epaax. 7 eparag. 4-5

Mpuwa mwa ekumi awe, Davidi aaviriha maxupo mantxipale yaawo yaamweerinhe winla. Owo annakhaleliwa nrima ni aarukunuweliwa ni atthu aaroromelaawe. (1 Sam. 19:10, 11; 2 Sam. 15:10-14, 30) Owo olempe ha: “Kòkhulumuwa niwoko nowìpulela waka: ohiyu wothene kinnìnla vamwinlini vaka, ni maithori kinnananiha vanìsatalelaka’vo.” (Nsal. 6:7 [6:6, NM]) Nnaamweera Davidi aavirinhe maxupo mantxipale, owo annaroromela weera Yehova annamusivela. Owo olempe ha: “Yahvéh òhìwa nsu nowinla waka.” (Nsal. 6:9 [6:8, NM]) Masu eri va yoolepa ya olele ennoonihera moota Yehova ommoriwaawe ikharari vaavo ommukosoopaawe mutthu. Davidi aahoona weera waakhala ntoko Yehova aattottela maithori awe ahelaka mukarafani naari alepaka muliivuruni. Davidi annasuwela weera Yehova annoona ni wuupuwelela moota oonaawe ovoreya. Davidi annasuwela weera Tiithi awe a wiirimu annasuwela, ohiya paahi maxupo aavirihaawe, mene-tho moota yanvoleelaaya. w24.12 epaax. 22 eparag. 11-12

Hiyo ninnatthuneya wiilipihera ohiya paahi weera nikhale oolipa mene ovirelela okhala oolipa. Eyo entaphulela weera nintthuneya osepa wiiroromela mwaneene ahu. (1 Akor. 10:12) Nave hiyo onnatthuneya ‘wiikohaka mwaneene ahu’ weera noone wakhala weera ninnarowa vahoolo. Ekaarta aalepenlaawe Akolosi, murummwa Paulo aahuuluma woohima sa otthuneya waya ovirelela okhala oolipa. Akolosi yaari akristu oolipa moomunepani, nnaamweera vareene hiiho, Paulo aawooperera otthuneya waya osepa wuupuwela ntoko atthu a mulaponi. (Akol. 2:6-10) Ni Epafra aahaasuwela nnene sene asinna a muloko ole, ni annaavekelela weera ‘ekhale oomalela’ naari neere, oolipa moomunepani. (Akol. 4:12) Ninxuttera eheeni? Paulo ni Epafra yannasuwela weera, weera mutthu okhale oolipa moomunepani ontthuneya wiilipihera vantxipale ni okhaviheriwa ni Muluku. Awo yaatthuna weera akristu a wAkolosi evirelele okhala oolipa moomunepani nnaamweera yaakumana ni maxupo. w24.04 epaax. 6-7 eparag. 16-17