Bibuti, beno sadisa bana na beno na kuvanda ya kuyilama sambu na kulonga bantu sambu na nki bo ke kwikilaka na Ngangi mosi. Yo lenda vanda mbote nde beno tadila diaka masolo ya kele na jw.org na kitini “Bangiufula Yina Baleke Ke Kudiyulaka​—Bima Kudibasikilaka to Bo Gangaka Yo?” Na nima, beno lenda tubila ti bana na beno malongi ya mfunu ya me sepedisa bo yina bo ke mona nde yo lenda sadisa mpi bantu ya nkaka na kubakisa nde kele ti Ngangi mosi ya salaka bima yonso. Beno sadisa bo na kutendula mambu ya bo ke kwikilaka kukonda mpasi mpi na mutindu ya mbote ntangu muntu mosi me yula bo yo. Mu mbandu, mwana ya nzo-nkanda na bo mosi lenda songa bo nde: “Mono ke kwikilaka kaka na mambu yina mono ke monaka kansi mono ke monaka ve Nzambi.” Bana na beno lenda songa yandi nde: “Yindula nde nge ke tambula na mfinda mosi ya kele ntama mpenza ti bwala mpi kuna nge me mona dibulu mosi ya masa ya kutunga mbote ti matadi. Keti nge ta yindula nde dibulu yina kudibasikilaka? Kana dibulu yina ya masa kele ti muntu mosi ya mayele ya salaka yo, yo ke sadisa beto mpi na kubakisa nde kele ti Ngangi mosi ya mayele yina salaka bima yonso!” w24.12 18 § 16

Beto yonso ke vandaka ti mfunu ya lutwadisu sambu na kubaka balukanu ya mfunu na luzingu. Mbala mingi, beto ke bakaka lutwadisu yango na bankuluntu mpi na bampangi ya nkaka ya kuyela na kimpeve. Beto fwete tuba ve nde bandongisila na bo kele ve mfunu sambu na beto kaka sambu bo me kuma bambuta. Yehowa ke zola nde beto baka malongi na bandongisila yina bambuta ke pesaka beto sambu bo me longukaka mpi ke zabaka mambu mingi ya luzingu mpi bo kele ti mayele ya kubakisa mambu kuluta beto. Na ntangu ya ntama, Yehowa sadilaka bambuta yina vandaka kusadila yandi na ntima ya mvimba sambu na kupesa bantu na yandi kikesa mpi kutwadisa bo. Beto tadila mbandu ya Moize, Davidi mpi ntumwa Yoane. Bo zingaka ve ntangu mosi mpi mambu ya luzingu na bo swaswanaka mpenza. Na nsuka ya luzingu na bo, bo pesaka baleke bandongisila ya mbote. Bambuta yai yonso tubilaka mingi mfunu ya kulemfukila Nzambi. Yo vanda beto kele baleke to bambuta, beto lenda baka mambote na bandongisila yina bo pesaka kana beto ke baka ntangu ya kulonguka yo.​—Bar. 15:4; 2 Tim. 3:16. w24.11 8 § 1-2

Na bilumbu ya Noa, Nzambi buyisaka bantu na kudia menga. (Kuy. 9:3, 4) Yehowa buyisaka mpi bantu ya Izraele na Nsiku ya Moize na kudia menga. Bo vandaka ‘kufwa’ konso muntu yina vandaka kudia menga. (Levi 7:27, noti na nsi ya lutiti.) Yezu vandaka kuzitisa Nsiku ya Moize. (Mat. 5:17-19) Yo yina, beto fwete yindula ve ata fioti nde yandi sosaka kupusa Bayuda yina na kudia mpenza nsuni ya nitu na yandi to na kunwa mpenza menga ya nitu na yandi. Yezu vandaka kutuba na mutindu ya kifwani mutindu yandi salaka yo ntete ntangu yandi solulaka ti Musamaria mosi ya nkento. Yezu songaka yandi nde: “Masa yina mono ta pesa . . . ta pesa . . . luzingu ya mvula ya mvula.” (Yoa. 4:7, 14) Mambu yai Yezu songaka Musamaria yina ya nkento, vandaka ve kutendula nde yandi zolaka kubaka luzingu ya mvula na mvula kaka kana yandi nwa mwa masa mosi buna. Mutindu mosi, Yezu zolaka ve kutuba nde bantu yina yandi vandaka kulonga na Kapernaumi, zolaka kuzinga mvula na mvula kana bo diaka mpenza nsuni ya nitu na yandi mpi kana bo nwaka mpenza menga ya nitu na yandi. w24.12 9 § 4-6