Mamoe bona nani parabolena ai, Iesu na taunimanima ese ia tadikakana e kara henidia dalana heḡereḡerena ai, ena hahemaoro be karaiamu. (Mat. 25:​31-46) ‘Hisihisi badana’ lalonai, Aramagedono do se hematama ai, Iesu ese una hahemaoro ḡaukarana be karaiamu. (Mat. 24:21) Mamoe nari tauna ese mamoe na nani amo e hapararadiamu heḡereḡerena, Iesu ese tadikakana horoa taudia e durudiamu taudia na asie durudiamu taudia edia amo be hapararadiamu. Baibul ena peroveta herevana ese e hahedinaraiamu, Iehova ese e abia hidi tauna, Iesu, na mai kara maoromaorona ida hahemaoro ḡaukarana be karaiamu. (Isa. 11:​3, 4) Ia ese taunimanima edia kara, lalohadai, hereva bona ia tadikakana e kara henidiamu dalana na e haerodiamu. (Mat. 12:​36, 37) Iesu na be dibamu daidia be ia tadikakana horoa taudia bona edia ḡaukara e duruamu. Mamoe heḡereḡerena taudia ese horoa taudia e durudiamu dalana badana na haroro ḡaukara. w24.09 rau 20-21 par. 3-4

Namona na ta abi daemu ḡaudia na Baibul amo baita hamomokanidia. Heḡereḡere, matamanai tame herevalaia mero matamatana mani aita laloa. Ia na e daradaramu, Dirava ese la be e lalomu, eiava. Ia ese una lalohadai baine abia dae be maoro, a? Lasi. Namona na ena daradara ḡauna baine hamaoromaoroa totona, Dirava ena lalohadai baine tahua. Baibul ta duahiamu neganai, una na vaitani Iehova ese ita e hereva henidamu. To, bema ta uramu Iehova ena amo haere maorona baita abia, namona na Baibul baita duahia bona ḡau ma haida baita kara. Heḡereḡere, eda henanadai bae haerelai siridia baita tahu bona baita stadilai. Iehova ena orea ese e halasimu pablikeisin idauidau ai, hetahu karadia haida baita kara. (Her. 2:​3-6) Iehova baita ḡuriḡuri henia, bona baita noia baine duruda eda henanadai haerena baita davaria totona. Bena Baibul ai baita badina diba ena hahekau bona heduru herevadia baita tahu. w24.10 rau 25 par. 4-5

Iehova ese hekokoroku eiava sibona ladana e abia isimu tauna na basine hanamoa. (1 Kor. 10:​24, 33; 13:4) Nega haida, Iesu bamona namodia danu badi kereredia daidiai e urava hahenamo bae abi. Mani Iesu ena aposetolo taudia rarua—Iakobo bona Ioane ediai e vara ḡauna aita laloa. Idia ese Iesu e noia ena Basileia lalonai dagi badadia baine henidia. Iesu ese idia na se hanamodia. To ia ese aposetolo 12 e sisiba henidia, e gwa: “Ta baine lohia e tomamu, ia na isiaimui baine lao heni; bona ta baine herea e tomamu, ia na iboumui ai emui hesiai tauna ai bainela.” (Mar. 10:​35-37, 43, 44) Badi maorona dainai una maduna e abiamu tadikakadia na hahenamo ta kongrigeisin ai.—1 Tes. 2:8. w24.11 rau 15-16 par. 7-8