Tama sina, natumu ba hagoadaia ḡau iboudiai e Havara Tauna e abia daemu badina na haida ediai baine herevalaia. Heduru ḡauna namona ta na, natumu ida jw.org ai ina kaha ladana “Young People Ask—Creation or Evolution?” ai e ato atikol idauidau ba herevalai hebou diba. Natumu ese una buklet amo haida baine durudia diba kahana ta baine abia hidi bena ia ida iherevalaina dalana ba praktislaia. Bema ta na e uramu natumu ida una topik bae herevalaia, namona na dala haraḡadia ai baine herevalaia. Heḡereḡere, bema turana ta na baine gwa: “Lau na na itamu ḡaudia mo na abi daemu, bona Dirava na do asina itaia.” Kristen matamata tauna na baine gwa diba: “Mani a laloa oi na uda badana ta lalonai o rakamu una na ta se nohomu gabuna bena nadi amo e karaia ranu gurina ta bo itaiamu, oi be dahaka bo lalomu? Oi na bo dibamu una na ta ese e karaia gurina. Una heḡereḡerena, eda tanobada bona mauri ḡaudia iboudiai na ta ese e karadia!” w24.12 rau 18 par. 16

Ita iboudai na abi hidi badadia ta karamu neganai, ta uramu haida edia amo hahekau herevadia baita abi. Unu hahekau herevadia momo na elda taudia bona lo Kristen taudia amo baita abimu. Bema idia na iahu, namona na basita lalo edia hahekau herevadia ese ita na basie duruda dibamu. Iehova na e uramu iahudia edia amo diba baita abi. Mauri ai e varamu ḡau momo na mai dibadia, edia diba bona aonega danu bada. Baibul negadiai, Iehova ese abidadama iahudia amo ena taunimanima e hagoadadiava bona e hakaudiava. Heḡereḡere, Mose, David, bona aposetolo Ioane aita lalodia. Idia na nega idauidau ai e nohova, bona edia noho daladia danu i’idau. Edia mauri dinadia oredia ai, edia sisiba namodia amo matamatadia e hagoadadia. Idia ta ta na Dirava ibadinana ena namo e herevalaia badabada. Ena be ita na matamata eiava iahu, to edia sisiba baita stadilaimu neganai namo baita davarimu.—Roma 15:4; 2 Tim. 3:16. w24.11 rau 8 par. 1-2

Noa ena negai, Dirava ese taunimanima ediai taravatu ta e atoa, rara na basie ani. (Gen. 9:​3, 4) Gabeai, Iehova ese Israel taudia e haḡanidia rara na basie ani. Bema ta na rara baine ani, ia na “bae hamasea.” (Lev. 7:​27, NWT) Iesu ese Iuda taudia e hadibadia, Dirava ese e heni taravatudia iboudiai bae badina. (Mat. 5:​17-19) Una dainai, Iesu ese Iuda taudia na basine noidia diba ia hidiona bona rarana korikorina bae ania bona bae inua. Ta dibamu, Iesu na hutuma e hereva henidiava neganai laulau herevadia e ḡaukaralai, Samaria hahinena e hereva henia neganai danu laulau herevadia e ḡaukaralai, eto: “Lau ese baina henia ranuna [ese] . . . mauri hanaihanai baine henia.” (Ioa. 4:​7, 14, NWT) Iesu na se gwa una Samaria hahinena na ranu guri idauna ta amo ranu baine inu bena baine mauri hanaihanai. Una heḡereḡerena, Kaperanauma ai hutuma e hereva henidia neganai, ia na se gwa ia hidiona bona rarana korikori bae ania bona bae inua bena bae mauri. w24.12 rau 9 par. 4-6