Pikija vamweni vanoshaisha kumutaja, ivanyi no cokwadi cokuti Jehovha anomuda maningi, cimwenizve, munosisira maningi kwaari. Iyena “ari phedo no vaya vano mwoyo inohwajihwa.” Kudari imwimwi munojizwa makasuruvara, ceukijanyi kuti Jehovha ari kuvona zviro zvakanaka no kukhwedera kwenyu phedo kwaari. (Joh. 6:44) Iyena wakanasiririka kuti amubesere, ngokuti munosisira maningi kwaari. Kuti tizive mazwiro ana Jehovha, ngatende tipopore muezaniso wa Jesu. Paainga eciita basa rake pasi pano, Jesu wakavona vandhu vainga vacikatajwi ushoni ngo vamweni. Iyena wakavataja ngo njira yo kunaka mwoyo. (Mat. 9:​9-12) Mwanakaji umweni waitambujika ngo ndhendha yainesa maningi, paakabata pura-pura ya Jesu kuti arapike, Jesu wakamutondhoja no kumuvangisa ngo rutendo hwake. (Mrko. 5:​25-34) Jesu wakatevejera ngo njira yakakwana undhu huna Baba wake. (Joh. 14:9) Imwimwi mungava no cokwadi cokuti Jehovha anoreremeja no kuvona mugariro jenyu jaushoni kubatanijavo rutendo no rudo hwamunahwo kwaari. w24.10 7 ¶4-5

Mu upenyu hwake, Dhavhidhi wakacungirira mugariro jakasiyana-siyana jakamuita kuti aceme. Kwainga no vandhu vazinji vaimuzonda. Pikija vamweni vainga shamwari jake, ukama hwake, avacaingepi vakagondeka kwaari. Cimwenizve, vaiita zviro kuitira kumukhuvaza. (1 Sam. 19:​10, 11; 2 Sam. 15:​10-14, 30) Pa vhaza imweni, iyena wakatara kudari: “Simba rangu riri kupera ngo ndava yo kugomera kwangu; usiku hwese ndinobija kama yangu ngo ndava yo musoji; pandinovata panopera kubira ngo ndava yo kucema.” (Nduy. 6:6) Pikija no zvineso zvaisongana na Dhavhidhi, iyena wainga no cokwadi cokuti Jehovha waimuda. Iyena wakatara kudari: “Jehovha anozozwa kucema kwangu.” (Nduy. 6:8) Magama o mu vhesi yedu anotibesera kuzwisisa kuti Jehovha anotida maningi, cimwenizve anoneseka ngo mazwiro edu. Dhavhidhi wakazwa inga kuti Jehovha wainga ecitora musoji jake ecijidira mubotiri kana kujitara mu bhuku riri rese. Dhavhidhi wainga no cokwadi cokuti Jehovha waivona no kuceukija kuhwajihwa kwake. Dhavhidhi wainga no cokwadi cokuti Baba wake vano rudo vokudenga vainga vecivona zvese zvaaingari ecisongana nazvo. Cimwenizve vaizwisisa manera azvaimupsasa. w24.12 22 ¶11-12

Itusu tinodikana kuvangisira haiwa basi kuti tive vandhu vakura, asi kuti tienderere mberi takadaro. Izvi zvinoreva kuti atidikani kuva vandhu vanojithemba maningi. (1 Vak. 10:12) Cimwenizve, tinodikana ‘kwenderera mberi tecijipopora pacedu’ kuti tive no cokwadi cokuti tiri kwenderera mberi tecikura kana kuti haiwa. Pa karata yake ku Vakorose, mupostori Pauro wakabhuyazve ngo kwenderera mberi tecikura ku divi ro kumujimu. Vakorose vainga vaa Makristu akura, Pauro wakavangwaja kuti vangwarire kuti vatame kurangarira inga vandhu vo nyika. (Vako. 2:​6-10) Epafra uwo wokuti kangaije wainasa kuziva ushoni hama jo mu ungano iya, waiita mukumbiro mukuvo wese ngo pamusoro pavo kuti vave ‘vakakwana’ kana kuva vakura. (Vako. 4:12) Ngo rapi fundo? Pauro kubatanijavo na Epafra vakazwisisa kuti kwenderera mberi tecikura ku divi ro kumujimu zvinoda kuvangisira no besero ra Jehovha. Pauro na Epafra vaida kuti Vakorose vaenderere mberi vari Makristu akavanga no akaivha pikija no zvineso zvavainga vecihwisana nazvo. w24.04 6-7 ¶16-17