Lia mu Citanu, 9 ya Outubro
Nji lanesa vitantekeyeso viange na vikomoueso viange mu cifuti ca Ingito.—Ezu. 7:3.
Mosesa ua puile kapolofeto, ngazi, ntuamena, na mukua ku soneka mizimbu. Ua tuamenene vaIsaleli mu va fumine mu Ingito naku limuena vikomoueso via Yehova via vingi. Yehova ua mu pangesele a soneke mavulu atanu a ku livanga a mu Mbimbiliya, Visamo 90, kaha halumo na Visamo 91. Kaha halumo ikeye naua ua sonekele livulu lia Yombi. Mosesa ua tsile na miaka 120, kaha ntsimbu kanda a tse, ua kunguluile vaIsaleli mu ku va mamuna na ku va vuluisa viuma vi va limuenenene. Va limuenenene vikomoueso via vingi via lingile Yehova, ngeci mua kasitiku ka hele ku vakua Ingito. (Ezu. 7:4) Vendele mu Cisali ca ku Tila, na ku limuena vati Yehova ua nongesele masualale va Falao. (Ezu. 14:29-31) VaIsaleli mu va kele mu vindinda, va limuenenene naua vati Yehova ua va niungile. (Ndeu. 8:3, 4) Kaha mu va kele na ku kovela mu Cifuti ca Cikulaheso, Mosesa ua va kaniamesele ntsimbu kanda a tse. w24.11 8-9 ¶3-4
Sapalalo, 10 ya Outubro
Uose alia ku mbolo yaco aka yoya miaka yose . . . Mbolo inji mi hana inapu ntsintu yange vene ize ihana muono ku vakua mavu.—Yoa. 6:51, NWT.
Via lekele Yesu ku vandongesi vendi ha Mulalelo ua Muangana, a liseza na mezi a lekele ku civunga ca vaYundeya. Muomu via handekele ha Mulalelo ua Muangana, ua vi talekesele lika ku civunga ca cindende. Kaha Yesu mua kele mu Ngalileya mu 32 T.K.N., ua handekele na vaYundeya va tondele lika viakulia kuli ikeye. Ua va kuasele kuivuisisa nguavo kua kele via seho ku hiana viakulia, kaha vie ku va hele muono ka ue kuhua. Ua va lekele naua nguendi vose ve ku tsile, ve ku sangukile ha litangua lia ku manusuila na ku yoya miaka yose. Ha ntsimbu yaco, Yesu ka kele na ku handeka via civunga ca cindende ngue mua lingile ha Mulalelo ua Muangana. Vunoni, ku Ngalileya ua handekele via civezikiso ci ve ku tambuile vantu vose. w24.12 11 ¶10-11
Calumingu, 11 ya Outubro
Enu vamala, lemenu vampuevo venu.—Kolo. 3:19.
Yehova ua zinda mukua luozi. (Visa. 11:5) Cikumakuma vamala ve ku veta vampuevo vavo. (Mal. 2:16) Nga yala ke ku niunga vuino mpueyendi, ce ku kuata ku vusamba vuendi na Njambi. Kaha halumo Yehova ka ka halakana vivundilo viendi. (1 Pet. 3:7) Vamo ve ku tenukila vampuevo vavo na ku va handeka mezi eku va vavalesa ku mutima. Vunoni Yehova ua zinda “vutenu, na matoto, na muyoyo [ni ku handeka mua ku vihia].” (Efe. 4:31, 32) Yala ue ku tenukila mpueyendi ke ku pihisa lika vulo, vunoni na vusamba vuendi na Yehova. (Tia. 1:26) Cikuavo naua, yala ue ku tala via vuntselentsele ue ku pihisa vusamba vuendi na Yehova, kaha ke ku singimika mpueyendi. Yehova ua tonda vamala vambata vapue vakua vusunga ku vampuevo vavo, kati lika mu vilinga vunoni na mu visinganieka. Yesu ua handekele nguendi yala nga a tala mpuevo na lisungu, na lingi laza vukoyi “mu mutima.”—Mat. 5:28, 29. w25.01 9 ¶6-8