Prɔfesi mɛndó Yezo kambisa na lo ti gbɛ̃ngɔ ti kɔdɔrɔ ti Yuda angbã yakere ati na seni. Kanda awakristo lengbi ti salelangɔ ngoi mɛndó ala ngbã na ni ti nɛngɔ ya, ala lɛkɛ tɛrɛ la wa ala ti na seliye ti gbengɔ bɛ na ya loyengɔ. (Aeb. 10:25; 12:1, 2) Angbã dã e tengbi na kota pɛnɔ mɛ aɔ pɛnɔ mɛndó awakristo ti Ebre atengbi na ni. (Mat. 24:21; Suma 16:14, 16) E ba awangɔ mɛndó Yehova hɛ̃ awakristo mɛ ni lengbi nga ti zangɔ e ndɛ. Toma Polo sandó ngunu bɛ ayata lo ya ala manda na seni tɛnɛ tɛ Nzapa. (Aeb. 5:14–6:1) Polo salelandó Ngbangɔ mɛ na yanga ti Ebre so zangɔ ayata lo ya, ala hĩnga se mɛ sambela tɛ awakristo adu ngbondoni aɔ sambela tɛ Ayuda. Polo hĩngandó ya ti nɛngɔ ya ala ti na kɔdɛ wa ala ngbɔ̃ nga seni mbilimbili mɛ aba awakristo ko ayɔ ya, ala hĩnga wa ala kɛ̃ nga atɛnɛ zu ti nvɛ̃nɛ. w24.09 p. 8 par. 2-3; p. 8 par. 6

Ava Yezo ndó na gwɛ̃ ya, asa ngunu bɛ ala. Na lo nɛ? Na lo mɛ ya, ambanga ni ziandó da tɛ la, ndasewa tɛ la, buze tɛ la ti landangɔ Yezo bi zu. (Mat. 19:27) Alindó aye ti siɔni tɛrɛ ambangani na lo mɛ ya, ala ti ava Yezo. (Yn. 9:22) Ala yendó gbinyangbingɔ kpale ti ya dungɔ lɛ ngɛ̃́ tɛ la nga na hũngɔ pɛnɔ. (Mat. 16:16) Ala hũndó ya, Yezo du Masiya mɛ ako kapa tɛ lo, kanda ala tindó na sɔngɔ bɛ kpengbani na lo mɛ ya ta ala hĩnga ye mɛ na lingɔ tɛrɛ lo ma. Ta kitɛ da ma ya, Yezo hĩngandó vundu tɛ ava lo, lo hĩngandó ya dungɔ na vundu ta adu nzɛ̃ngɔ na ya nyingɔ ma. Kanda ni du sɔngɔ bɛ mɛ zo ndo ma na ngoi mɛ ye tɛ lo ti ngbondoni gere. Ni la na bi mɛndó Yezo so ko, lo bandandó sangɔ ngunu na bɛ ava lo, na ndakisa lo sindó ka gbɛlɛ Maria Magadalene na ngoi mɛndó lo gwe ka ndo sɛndɛ. (Yn. 20:11, 16) Lo sindó ka gbɛlɛ ava lo sɛ mɛndó ndo gwe ka Emausi. Lo si ngandó gbɛlɛ Toma Petro. w24.10 p. 13 par. 5-6

Awa dũngɔ ayangambi, ĩ lɛkɛ ayati ĩ́ ya, ala kambisa hɛ̃ azi mɛndɛ̃ nda mɛ ala ndo du na loyengɔ ka mbage tɛ Wa lingɔ aye zu. Ĩ lengbi ti hũngɔ ya, adu ngbondoni dingɔ atɛnɛ niko mɛ kaya jw.org ndoni kɔi kaya buku “Mituna oyo bilenge batunaka—Bomoi ekelamá to ebimá yango moko?” Na gesi, ĩ tɛnɛ tɛnɛ na ndo aye mɛ nyi ĩ hũ nzɔ̃ni ti nɛngɔ ya, lo za na azi mɛndɛ̃ agbɔ̃ nda mbilimbili na ndo Wa lingɔ aye. Sa ngunu bɛ lo ya, lo du na bingangɔ li ti nzɔ̃ni se zo ye tɛnɛngɔ tɛnɛ na lo na ndenge ti nzɔ̃ni. Na ndakisa, fɔ̃ lo kɔi ti kalasi lengbi ti tɛnɛngɔ hɛ̃ lo ya: “Mbi ndo ye tɛ mbi bo aye mɛ mbi ndo hũ, wa ta mbi dɛ hũ Nzapa ma.” Palanga wakristo lengbi ti pangɔ hɛ̃ lo ya: “Da bɛ mɔ ya, mɔ ndo nɔ nɔ kaya ngɔngɔ mɛ yɔngɔrɔni na kɔdɔrɔ, wa mɔ hũ lingu kɔi mɛ akĩ ni nzɔ̃ni na tɛnɛ̃. Mɔ lengbi ti tɛnɛngɔ ya nɛ? Se du ya, zo ti kɔdɛ kɔi la kĩ lingu niko nzɔ̃ni ko, elengbi ti tɛnɛngɔ ya nɛ na lo tɛ wa lingɔ ndozu ná sese nɛ!” w24.12 p. 18 par. 16