Ngoi mɛ e hũ ya, ta e ye kpale kɔi ngaso ma ko, elengbi ti gingɔ hĩngangɔ tɛnɛ mɛ Ngbangɔ tɛnɛ na ndoni. E mu ndakisa tɛ palanga kɔli mɛ lo ndo hũnda tɛrɛ lo na ndo ya, bere Nzapa ndo hũ lo ngbondoni ka lɛ lo. Lo lengbi bo ti hũngɔ mbala kɔi ya, dangɔ bɛ tɛ ni du biani? Ipɔ, lo lengbi ti “gingɔ hĩngangɔ kpale zu” nga na hĩngangɔ dangɔ bɛ tɛ Yehova na ndo akpale niko. Ngoi mɛ e ndo di tɛnɛ tɛ Nzapa ko, e ndo “ma” tɛnɛ mɛ Yehova ndo tɛnɛ hɛ̃ e. Kanda ayɔ ya, e li aye gba na ngoi ko la e ndo di Ngbangɔ se e ye ya, Yehova hɛ̃ e gbinya na ndo ahũnda tɛ e. E na gwɛ̃ ti luangɔ nga na mandangɔ akpale gba kaya Ngbangɔ mɛ na zangɔ e ya, e lua agbinya ti ahũnda tɛ e. Elengbi ti gingɔ abɛli tɛnɛ ni kaya mbeti mɛ linɔ tɛ Yehova ndo si na ni. (Mas. 2:3-6) Ena gwɛ̃ ti lingɔ sambela hɛ̃ Yehova wa e yɔ nga ka ti lo ya, lo za e, e lua gbinya ti ahũnda tɛ e. Elengbi nga ti gingɔ andia ti ya Ngbangɔ nga na kpãngɔ na kwa aye mɛndɛ̃ mɛ lengbi ti zangɔ e na ndo akpale tɛ e. w24.10 p. 25 par. 4-5

Ta Yehova na sulungɔ ge ge ge tɛ azi ko la ndo yakɛ tɛrɛ la wa ala ndo gonda nga tɛrɛ la ma. (1 Kɔr. 10:24, 33; 13:4) Na ya ngoi mɛndɛ̃ akwa Yezo mɛndó dã na lo gindó luangɔ kumba na ndenge ti siɔni. E mu ndakisa tɛ ava Yezo sɛ Zaki ná Yoanɛ. Ala yɔndó ka ti Yezo ya lo hɛ̃ la ndo ti ngbondoni kaya Lo-lengɔ Gbia tɛ lo. Ta Yezo sepalandó na dangɔ bɛ tɛ la niko ti siɔni ma. Kanda lo kambisandó hɛ̃ ava lo 12 ya: “Se mbanga zo ye dungɔ kotani ko ale lo du wa lingɔ kwa hɛ̃ ĩ, wa se mbanga zo na popo tɛ ĩ aye nga dungɔ wa li ni ko, ale lo du mbɛ tɛ ĩ zu.” (Mar. 10:35-37, 43, 44) Ayata mɛ songo la ndo to la ya ala li kwa na lo tɛ azi mɛndɛ̃ ko, ala na dungɔ nzɔ̃ sulu kaya bombi.—1 Tɛs. 2:8. w24.11 p. 15-16 par. 7-8

Na ngoi mɛ e ndo mu ekateli ko, songo na tongɔ e ya, e li ye mɛ nzɔ̃ni na “lo tɛ afɔ̃ e” wa e du nga azi mɛ ndo li ye na seni. (1 Kɔr. 10:23, 24, 32; 1 Tim. 2:9, 10) Ni la, e na mungɔ ekateli mɛ na fangɔ ya e na songo nga na tɔndɔngɔ na ndo azi mɛndɛ̃. Se du ya mɔ ye mungɔ ekateli ti ngbondoni ko, kpã lɛ mɔ na ndo ye mɛ mɔ ye lingɔ nga na ye mɛ na singɔ na pɛni. Yezo tɛnɛ hɛ̃ e ya, uzu ti zo kĩngɔ da ko “ayɔ ya lo binga li lo bere falanga kɛ̃ la lo na kĩngɔ na da ni.” (Luka 14:28) Ni la ayɔ ya e ba ngoi, aye nga na ngunu mɛ na lingɔ ya e mu ekateli ti lingɔ kwa kɔi ngaso. Na ya ngoi mɛndɛ̃ ayɔ ya e kambisa ni hɛ̃ azi ti ndasewa tɛ e ti bangɔ zo mɛ ka ndasewa mɛ na dungɔ na gwɛ̃ ti nɛngɔ ya, lo za e na ndoni. Nda mɛ lɛkɛngɔ kpale ti ngaso du ngbondoni nɛ? Ni lengbi ti zangɔ mɔ ya, mɔ hĩnga se du ya mɔ lengbi ti lɛkɛngɔ ekateli tɛ mɔ bere ekateli mɛndɛ̃ na dungɔ nzɔ̃ni. Wa na ngoi mɛ mɔ ma azi ti ndasewa tɛ mɔ na seni ko, ni na lingɔ ya mɔ ti dã ti lengɔ kwa tɛ mɔ nga na mungɔ ekateli mɛ na lingɔ ya mɔ longa. w25.01 p. 18-19 par. 14-15