David okixnamik miak tlamantli ikinon noijki ochokak miak. Okikokoliayaj ifamiliares, iyolikniuan uan oksekimej. Sekimej okikajkayajkej uan okinekiayaj kimiktiskej (1 Sam. 19:​10, 11; 2 Sam. 15:​10-14, 30). Se tonal okijkuilo: “Yonisotlauak porque san nimoyolkokojtok; nochi youak sapanoua nichoka; ijkuak nichoka hasta siaua notlapech” (Sal. 6:6). David okimatiaya Jehová okitlasojtlaya maski otlajyouiaya. Okijto Jehová okikakiaya ijkuak ochokaya (Sal. 6:8). Itech texto tlen axkan timomachtijtokej ika kualtsin tlajtoli kiteititia Jehová techtlasojtla uan kitekipachoua ken timomachiliaj. David okijto Jehová yetoskia ken kinechikoua toixayo itech kontsin tlen chijchitok ika kuetlaxtli noso yetoskia ken ijkuilitok itech se amochtli. Ye okineltokaya toTajtsin Dios okimatiaya tlen okijyouiaya uan noijki okilnamiktoka. Noijki okilnamiktoka Jehová okimatiaya ken omomachiliaya uan amo san okimatiaya tlen okixnamikiaya. w24.12 22 párrs. 11, 12

Moneki nochipa matimochijchikauakan matikpiakan chikauak totlaneltokilis. Ikinon moneki nochipa matimomaluikan (1 Cor. 10:12). Nochipa matikitakan tlen tikchiuaj uan ijkon tikitaskej kox mochikajti totlaneltokilis. Carta tlen apóstol Pablo okinmijkuilili tokniuan tlen okatkaj Colosas noijki okinmilui miak ipati mamochijchikauakan nochipa makipiakan chikauak intlaneltokilis. Yejuan yokipiayaj chikauak intlaneltokilis pero okinmilui omonekiaya momaluiskej uan ijkon amikaj kinkajkayauas ika tlen amitlaj ipati (Col. 2:​6-10). Epafras kuali okinmixmatiaya tokniuan ikinon nochipa inpatka omotlatlaujtiaya para ‘nochipa mayetokan ajsitokej’ (Col. 4:12). ¿Tlen techmachtia? Pablo uan Epafras okimatiayaj moneki timochijchikauaskej tikpiaskej chikauak totlaneltokilis uan matikiluikan Jehová matechpaleui. Yejuan okinekiayaj tokniuan tlen okatkaj Colosas makipiakan chikauak intlaneltokilis maski okixnamikiayaj miak tlamantli. w24.04 6, 7 párrs. 16, 17

Tiktlakaitaskej Jehová kijtosneki tiktlasojtlaskej uan amo keman tikchiuaskej itlaj tlen kiyolkokos. Noijki tla tiknekij matechseli Jehová moneki tikmatiskej tlen kuali uan tlen amo kuali. Ikinon miak ipati matikmatikan tlen melauak uan tlen amo (Prov. 2:​3-6; Heb. 5:14). Tla amo timomaluiskej peuas tikinmauiliskej oksekimej, xamo amo okachi tiktlakaitaskej toTajtsin Dios nion ayakmo tikneltokaskej tlen ye techiluia. Matimokuayejyekokan tlen okinpanok 12 israelitas ijkuak oyajkej otlachiatoj altepetl Canaán tlen Jehová okinmilui kinmakaskia. Majtlaktli israelitas tlen oichtakatlachiatoj okiteititijkej amo okitlasojtlayaj Jehová porque okinmauilijkej cananeos. Ikinon okijtojkej: “Amo uelis ompa titlejkoskej porque akinmej ompa chantij okachi chijchikauakej” (Núm. 13:​27-31). Pero ijkuak okijtojkej amo uelis kintlaniliskiaj okiteititijkej ayakmo okineltokayaj Jehová kinpaleuiskia. w24.07 9 párrs. 5, 6