Gyisɛse hanle dole ɛkɛ ne kɛ bɛbazɛkye Dwuuma ngyehyɛleɛ ne na ɛnee mekɛ zɔhane ɛlɛbikye. Ɛnee ɔwɔ kɛ Kilisienema zɔhane fa mekɛ mɔɔ ɛha la mia bɛ diedi nee bɛ kpundiigyinlanlɛ ne anu amaa bɛava bɛaziezie bɛ nwo bɛamaa mɔɔ ɔbasisi la. (Hib. 10:25; 12:​1, 2) Ɔnrɛhyɛ yɛbahɔ anwongyelelɛ mɔɔ le kpole kpalɛ tɛla mɔɔ Hibulu Kilisienema ne hɔle nu la anu. (Mat. 24:21; Yek. 16:​14, 16) Suzu folɛdulɛ kpalɛ mɔɔ Gyihova vale maanle zɔhane Kilisienema ne mɔɔ ɔbaboa yɛdayɛ noko la bie mɔ anwo. Pɔɔlo maanle ɔ mediema diedima anwosesebɛ wɔ kɛlata ne mɔɔ ɔhɛlɛle ɔhɔmaanle Hibuluma ne la anu kɛ bɛzukoa Nyamenle Edwɛkɛ ne kpalɛ na bɛdwenledwenle nwolɛ. (Hib. 5:14–6:1) Pɔɔlo gyinlanle Hibulu Ngɛlɛlera ne azo hilehilele deɛmɔti Kilisiene ɛzonlenlɛ ne le kpalɛ tɛla Dwuuma ɛzonlenlɛ ne la anu hilele ɔ mediema ne mɔ. Ɛnee Pɔɔlo ze kɛ saa zɔhane Kilisienema ne sukoa ninyɛne dɔɔnwo na bɛte nɔhalɛ ne abo kpalɛ a, ɔbaboa bɛ yeamaa bɛanwu nzuzulɛ mɔɔ le adalɛ na bɛahwe bɛ nwo bɛavi nwo amaa bɛamminli. w24.09 8-9 ¶2-3; 10 ¶6

Ɛnee Gyisɛse ɛdoavolɛma ne hyia anwosesebɛmaanlɛ. Duzu ati ɔ? Bɛ nuhua bie mɔ gyakyile bɛ azua, bɛ mbusua nee bɛ gyima na bɛlile Gyisɛse anzi dahuu. (Mat. 19:27) Kɛmɔ bie mɔ rayɛle ye ɛdoavolɛma la ati bɛ nee bɛ anli ye boɛ. (Dwɔn 9:22) Bɛvale ninyɛne ɛhye mɔ amuala bɛbɔle afɔle ɔluakɛ bɛliele bɛlile kɛ Gyisɛse a le Mɛzaya ne mɔɔ bɛbɔle ɔ nwo ɛwɔkɛ la. (Mat. 16:16) Noko mɔɔ bɛhunle Gyisɛse la, bɛ anyelazo wiele na bɛ sa nu dole. Ye biala anu Gyisɛse nwunle kɛ ye ɛdoavolɛma ne ɛlɛdi nyane, tɛ kɛ ɛnee bɛyɛ bɛtɛɛ wɔ sunsum nu la ati ɔ, emomu kɛmɔ ɛnee bɛ menle Gyisɛse ɛwu la ati ɔ. Ɔti kenle ko ne ala mɔɔ bɛdwazole ye la, ɔbɔle ɔ bo kɛ ɔmaa ɔ gɔnwo mɔ anwosesebɛ. Kɛ neazo la, ɔyele ɔ nwo ɔhilele Mɛle Magedalene wɔ mekɛ mɔɔ ɛnee ɔwɔ nla ne anwo ɔlɛsu la. (Dwɔn 20:​11, 16) Eza ɔyele ɔ nwo ɔhilele ɛdoavolɛma nwiɔ ne mɔɔ ɛnee lua adenle nu ɛlɛkɔ Ɛmeeyɛse la. Yɛɛ ɔyele ɔ nwo ɔhilele ɛzoanvolɛ Pita. w24.10 13 ¶5-6

Awovolɛ, bɛboa bɛ ra bɛmaa ɔhola ɔhilehile diedi mɔɔ ɔlɛ wɔ Bɔvolɛ ne anu la anu. Bie a bɛbahola bɛ nee ye azuzu edwɛkɛ “Asoo Awie A Yɛle A?” mɔɔ wɔ jw.org la anwo. Akee bɛ nee bɛ ra ne ɛzuzu ngilehilenu mɔɔ ɔte nganeɛ kɛ ɔbahola yeava yeaboa awie mɔ yeamaa bɛade ɔ bo kɛ Bɔvolɛ bie wɔ ɛkɛ la anwo. Maa ye anwosesebɛ kɛ saa awie kpondɛ kɛ ɔ nee ye suzu edwɛkɛ ne anwo a, ɔmaa ye ngilenu ne ɛyɛ sikalɛ na nuhua ɛla ɛkɛ. Kɛ neazo la, bie a sukuluma ne bie baha kɛ: “Debie mɔɔ menwu ye la ala a medie medi a, na metɛnwunle Nyamenle ɛlɛ.” Kilisienenli kakula bie bahola abua kɛ: “Fa ye kɛ ɛlua kpɔkɛ bie mɔɔ ɛmbikye sua zo la anu na wɔnwu bula kɛnlɛma bie. Duzu a bara wɔ adwenle nu a? Saa bula ne maa ɔba wɔ adwenle nu kɛ awie mɔɔ ze nrɛlɛbɛ la a yɛle a, ɛnee fane nyɛ a yɛkola yɛka kɛ tɛ awie a bɔle anwuma nee aze a!” w24.12 18 ¶16