Dwɛkɛ, October 27
Bɛhakyi bɛ subane na bɛnyia adwenle fofolɛ.—Wlo. 12:2.
Ɔlua Nyamenle sunsum ne moalɛ zo, menli dɔɔnwo mɔɔ mɔlebɛbo ne ɛnee bɛ subane le kɛ nane la ɛyɛ nzenzaleɛ mgbole wɔ bɛ ɛbɛlabɔlɛ nu. (Aye. 65:25) Bɛbɔ mɔdenle ɛsesebɛ bɛdudu bɛ subane ɛtane ne mɔ abo. (Ɛfɛ. 4:22-24) Noko Nyamenle menli ɛtɛdile munli, ɔti yɛbahɔ zo yɛayɛ nvonleɛ. Noko Gyihova ɛmaa “menli kɔsɔɔti” ɛyɛ ko mɔɔ ɛlɔlɛ nee anzodwolɛ kpole wɔ bɛ nu a. (Tae. 2:11) Ɛhye le nwanwane debie mɔɔ Nyamenle tumivolɛ bedevinli ne angomekye a bahola ayɛ a! Dahuu ye edwɛkɛ ba nu. (Aye. 55:10, 11) Kɛkala bɔbɔ, sunsum nu paladaese ne wɔ ɛkɛ yɛɛ ɔlɛyɛ gyima. Gyihova ɛyɛ abusua bie mɔɔ bɛsonle ye mɔɔ bɛle ngakyile bɔkɔɔ. Kɛmɔ yɛboka ye menli ne anwo la ati, yɛlɛ anzodwolɛ nee banebɔlɛ wɔ ewiade mɔɔ basabasayɛlɛ ɛyi nu la anu. (Edw. 72:7) Ɔlua ɛhye mɔ ati, yɛkulo kɛ yɛbɔ mɔdenle yɛboa menli dodo biala mɔɔ yɛbahola la yɛmaa bɛbaboka yɛ nwo. Saa yɛfa yɛ adwenle yɛsie menli mɔɔ yɛmaa bɛarayɛ ɛdoavolɛma la azo a, yɛbahola yɛayɛ ɛhye.—Mat. 28:19, 20. w24.04 23 ¶13, 15
Maanle, October 28
Yɛlɛ Kelaese adwenle.—1 Kɔl. 2:16.
Gyisɛse vale ye adwenle muala hulole Gyihova. Ɛnee ɔze mɔɔ Gyihova kulo kɛ ɔyɛ la, na ɛnee yebɔ kpɔkɛ kɛ ɔbayɛ ye zɔ ɔnva nwo kɛ ɛhye mɔɔ ɔbayɛ la bamaa yeanwu amaneɛ la. Kɛmɔ ɛnee Gyisɛse ɛva ɛzie ɔ nye zo kɛ ɔbayɛ ɔ Ze ɛhulolɛdeɛ la ati, yeammaa debie biala andwehwe ye adwenle. Pita nee ɔ gɔnwo mɔ ɛzoanvolɛma ati yɛle boɛ kɛ bɛnyianle nwolɛ adenle bɛ nee Gyisɛse luale na bɛzukoale kɛzi ɔdwenle ninyɛne nwo la. Pita maanle Kilisienema anwosesebɛ wɔ ye kɛlata ne mɔɔ ɔlimoale ɔhɛlɛle la anu kɛ bɛva adwenle ko ne ala mɔɔ ɛnee Kelaese lɛ la bie bɛziezie bɛ nwo. (1 Pita 4:1) Wɔ aneɛ mɔɔ bɛlimoale bɛvale bɛhɛlɛle Baebolo ne la anu, edwɛkɛ “bɛziezie bɛ nwo” mɔɔ Pita vale lile gyima la kile sogyama mɔɔ bɛva akodeɛ bɛziezie bɛ nwo bɛmaa konle la. Ɔti saa Kilisienema sukoa adwenle mɔɔ Gyisɛse lɛ anzɛɛ kɛzi ɔdwenle ninyɛne nwo la a, ɔbamaa bɛanyia akodeɛ kpole mɔɔ bɛbava bɛaho bɛatia bɛ sinlidɔlɛ mɔɔ twehwe bɛ ɔmaa bɛyɛ ɛtane nee ewiade ne mɔɔ Seetan a nea zo la.—2 Kɔl. 10:3-5; Ɛfɛ. 6:12. w25.03 8-9 ¶1-3
Kule, October 29
Sonla ahonle nu nzuzulɛ le kɛ azule mɔɔ le kuma la, noko sonla mɔɔ lɛ adwenlenunwunlɛ la sa bie.—Mrɛ. 20:5.
Saa ɛ nee awie ɛlɛtu a, ninyɛne boni mɔ a ɔwɔ kɛ ɛnwu ye wɔ ahenle anwo a? Kolaa na wɔava wɔ ahonle muala wɔawula nu la, bie a ɛbahulo kɛ ɛ nee ahenle ne suzu ninyɛne mɔɔ hyia kpalɛ, mɔɔ bie a le bodane mɔɔ gyi ɔ nye zo la anwo. Kɛ ɔkɛyɛ na wɔahola wɔanwu kɛzi ahenle de kpalɛ kpalɛ ɛ? Adenle kpalɛ ko a le kɛ bɛbavi bɛ ahonle nu bɛadendɛ na bɛaha nɔhalɛ bɛahile bɛ nwo, bɛbiza kpuya na bɛdie mɔɔ bɛ gɔnwo baha la kpalɛ. (Gye. 1:19) Amaa bɛayɛ ye zɔ la, bɛbahola bɛayɛ ninyɛne mɔɔ bamaa bɛanyia adenle bɛabɔ adawu, bie a le kɛ bɛbabɔ nu bɛali aleɛ, bɛakpɔsakpɔsa ɛleka mɔɔ menli dɔɔnwo wɔ la na bɛabɔ nu bɛahɔ daselɛlilɛ. Eza saa bɛ nee bɛ gɔnwo mɔ nee bɛ mbusuafoɔ bɔ nu yɛ ninyɛne a, bɛbahola bɛanwu bɛ nwo kpalɛ. Bieko, bɛyɛ ninyɛne mɔɔ bamaa bɛanwu kɛzi ahenle wɔ tɛnlabelɛ ngakyile nu anzɛɛ ɔ nee menli ngakyile wɔ a ɔbayɛ ye nyɛleɛ la. w24.05 27-28 ¶6-7