Saa ɛsiezie ɛ nwo kpalɛ ɛmaa daselɛlilɛ a, ɔnrɛmaa wɔ ahonle ɛnrɛdu kpole wɔ mekɛ mɔɔ ɛ nee awie mɔ ɛlɛtendɛ la. Kolaa na Gyisɛse amaa ye ɛdoavolɛma ne ahɔ kɛ bɛkabɔ edwɛkpa ne nolo la, ɔboale bɛ ɔmaanle bɛzieziele bɛ nwo. (Luku 10:​1-11) Kɛmɔ ɛdoavolɛma ne vale mɔɔ Gyisɛse hilehilele bɛ la lile gyima la ati, bɛ nye liele mɔɔ bɛholale bɛyɛle la anwo. Duzu a yɛbayɛ yɛava yɛaziezie yɛ nwo yɛamaa daselɛlilɛ a? Ɔwɔ kɛ yɛdwenle kɛzi yɛbava yɛdayɛ mumua ne yɛ edwɛkɛ yɛahilehile nɔhalɛ ne anu kpalɛ la anwo. Eza ɔbayɛ kpalɛ kɛ yɛbazuzu nyɛleɛ nwiɔ anzɛɛ nsa bie mɔɔ menli dɔɔnwo mɔɔ wɔ azɛlɛsinli ne anu la da ye ali nee mɔɔ yɛbayɛ ye wɔ nyɛleɛ zɔhane mɔ anu biala anwo la anwo. Akee saa ɔwɔ kɛ yɛ nee awie mɔ tendɛ a, yɛbahola yɛazie yɛ nwo dii, yɛade yɛ nyunlu na yɛ nee bɛ abɔ adawu kɛ agɔnwolɛma. w24.04 16 ¶6-7

Debie mɔɔ hyia kpalɛ mɔɔ ɔti yɛbɔ edwɛkpa ne nolo la a le kɛ yɛkulo Gyihova Nyamenle nee ye duma nwuanzanwuanza ne. Yɛbu yɛ ɛzonlenlɛ gyima ne kɛ ɔle adenle mɔɔ yɛdua zo yɛye Nyamenle ne mɔɔ yɛkulo ye la ayɛlɛ a. Yɛdie yɛto nu bɔkɔɔ kɛ Gyihova Nyamenle fɛta kɛ ɔdie anyunlunyia, enililɛ nee tumi ɔfi ye azonvolɛ nɔhavoma ɛkɛ. Saa yɛka ninyɛne mɔɔ di daselɛ kɛ ɔdaye a ‘ɔbɔle ninyɛne kɔsɔɔti’ la anwo edwɛkɛ yɛkile awie mɔ na yɛmaa bɛnwu kɛ ɔdaye a yemaa yɛ ngoane a, ɛnee yɛlɛfa anyunlunyia nee enililɛ yɛamaa ye. Saa yɛfa yɛ mekɛ, yɛ anwosesebɛ nee ninyɛne mɔɔ yɛlɛ la yɛyɛ edwɛkɛhanlɛ gyima ne kɛ mɔɔ yɛ tɛnlabelɛ ne bamaa yɛ adenle la a, ɛnee yɛlɛfa tumi ne—yɛ tumi ne—yɛamaa ye. (Mat. 6:33; Luku 13:24; Kɔl. 3:23) Yɛbahola yɛapɛ ye sikalɛ kɛ, yɛ nye die nwo kɛ yɛbaha Nyamenle ne mɔɔ yɛkulo ye la anwo edwɛkɛ. Eza yɛ nye die nwo kɛ yɛbaha ye duma ne nee kɛzi ye duma ne maa yɛnwu Nyamenle holɛ ko mɔɔ ɔde la anwo edwɛkɛ yɛahile awie mɔ. w24.05 17 ¶11

Gyihova maa yɛnyia anzodwolɛ nee ahunlundwolɛ kɛkala na ɔbamaa yɛanyia dahuu ngoane kenle bie. Yɛbahola yɛanyia anyelazo kɛ Gyihova bamaa yɛ ahatualɛ yɛɛ ɔlɛ tumi ne mɔɔ ɔbava yeayɛ zɔ la. Na ɔwɔ kɛ zɔhane anwodozo ne maa yɛyɛ dɔɔnwo wɔ ye ɛzonlenlɛ nu, kɛ mɔɔ Nyamenle tete azonvolɛ nɔhavoma yɛle la. Ɛhye bie a Timote yɛle a. (Hib. 6:​10-12) Timote vale ɔ nye dole tease Nyamenle ne anwo zo. (1 Tim. 4:10) Ɛhye ati a ɔyɛle dɔɔnwo ɔmaanle Gyihova nee awie mɔ la. Wɔ adenle boni azo? Ɛzoanvolɛ Pɔɔlo maanle ye anwosesebɛ kɛ ɔbɔ mɔdenle ɔnyia anyuhɔlɛ kɛ kilehilevolɛ wɔ edwɛkɛhanlɛ gyima ne nee asafo ne anu. Eza ɛnee ɔwɔ kɛ Timote yɛ neazo maa ɔ mediema diedima, mgbavolɛ nee mgbanyinli kɔsɔɔti. Bɛmaanle ye gyima ɛsesebɛ bie mɔ, bie a le kɛ ɔzi ɔ gyakɛ aze ɔdu menli mɔɔ ɔhyia kɛ ɔtu bɛ folɛ la folɛ noko ɔyɛ ye wɔ ɛlɔlɛ nu. (1 Tim. 4:​11-16; 2 Tim. 4:​1-5) Ɛnee Timote ze kɛ Gyihova nwu ye na ɔbamaa ye ahatualɛ.—Wlo. 2:​6, 7. w24.06 22-23 ¶10-11