Etitatu, 2 Septemba
“Omuwa oku li pamwe natse. . . inamu tila.” — Num. 14:9.
Okutila Jehova otashi ti kutya okukala tu mu hole noonkondo, noitatu ka ninga nando sha shoka tashi mu yemateke. Otwa halelela okwiilonga eyooloko pokati kaashoka sha uka naashoka sha puka, nopokati koshili niifundja, opo tu kale twa hokiwa kuJehova. (Omayel. 2:3-6; Heb. 5:14) Ngele otwa kala hatu tila aantu shi vulithe puJehova, otashi vulu oku tu fala kokule noshili. Natu taleni koshiholelwa shoondaadhi 12, ndhoka dha ka ndaadhele evi ndyoka Jehova a li a uvanekele Aaisraeli. Oondaadhi omulongo odha etha uumbanda wokutila Aakaanana wu kale wu vule ohole yadho yokuhola Jehova. Odha lombwele Aaisraeli ooyakwawo dha ti: “Katu na oonkondo oku ya matukila. Aantu mbeyaka oye na oonkondo ye tu vule.” (Num. 13:27-31) Pataloko lyopantu, Aakaanana oya li ye na oonkondo lela, naashoka oshoshili. Ihe kehe ngoka a li ta ti kutya Aaisraeli itaya vulu okusinda aatondi yawo, ka li e na Jehova momadhiladhilo. w24.07 9 ¶5-6
Etine, 3 Septemba
“Omupanguli guuyuni auhe ita longo ando pauyuuki?” — Gen. 18:25.
Mbela otatu vulu ngaa okukala nuushili kutya uuna Jehova ta pangula aantu ohe shi ningi pauyuuki? Eeno. Abraham okwa li e shi uvite ko nawa kutya Jehova “Omupanguli guuyuni awuhe” okwa gwanenena, omunandunge nomunahenda. Jehova okwa li a dheula Omwana nokwe mu pe oshinakugwanithwa shokupangula. (Joh. 5:22) Jehova nOmwana ohaya vulu okulesha omitima dhaantu. (Mat. 9:4) Uuna taya pangula omuntu kehe, ohaye shi ningi “pauyuuki.” Natu kale tu na einekelo kutya Jehova oku shi shoka sha dhenga mbanda. Otu shi kutya inatu gwana okupangula, ihe Jehova oye a gwana oku shi ninga. (Jes. 55:8, 9) Onkee ano natu etheleni iilonga ayihe yokupangula miikaha yaJehova nOmwana, ngoka e li Omukwaniilwa a gwanenena, noku li omuyuuki nomunahenda ngaashi He — Jes. 11:3, 4. w24.05 7 ¶18-19
Etitano, 4 Septemba
“Omugoyoki oye iihuna koshipala shOmuwa, ihe Omuwa okwi inekela aayuuki.” — Omayel. 3:32.
Osha simana okukala hatu popi oshili. Otatu vulu oku shi mona mokutala kwaashoka sha ningwa po sho Filippus a hiya kuume ke Natanael, a tsakanene naJesus. Nonando Jesus ina tsakanena nale naNatanael, Jesus okwa ti: “Taleni, Omwiisraeli gwashili ngoka kee na nando omakoto gasha!” (Joh. 1:47) Okwa li a mono kutya Natanael omunashili lela. Ngaashi tse, Natanael ka li a gwanenena. Nonando ongawo, ka li omufudhime, ihe omunashili miinima ayihe. Jesus okwa li e shi kuminwa, e ta pandula Natanael. Iitegelelwa oyindji mbyoka ya popiwa mEpisalomi 15, mbyoka tayi tu kwathele tu kale twa hokiwa kuJehova, oya pambathana nankene hatu ungaunga nayalwe. Episalomi 15:3 otali ti kutya omuyenda metsali lyaJehova ‘iha lundile mukwawo, oye iha ningile ookuume ke uuwinayi, ye iha hokola aashiinda ye.’ Okulongitha nayi elaka lyetu momikalo dha tya ngawo, otaku vulu okuuvitha nayi yalwe. — Jak. 1:26. w24.06 10 ¶7, 9; 11 ¶10