Momukokomoko gwonkalamwenyo ye, David okwa li i idhidhimikile oonkalo oondhigu ndhoka dha li dhe mu lilitha. Okwa li e hugike kuyalwe nokwa li a kengelelwa kwaamboka i inekela. (1 Sam. 19:10, 11; 2 Sam. 15:10-14, 30) Pompito yimwe okwa nyola a ti: “Ngame onda dhengwa kuuwehame; kehe uusiku ombete yandje oya tuta kokulila kwandje, nontala yandje otayi hiha omahodhi.” (Eps. 6:6) Nonando David okwa li a piti moonkalo oondhigu, okwa li a tompwa kutya Jehova oku mu hole. Okwa nyola a ti: “Omuwa otu uvu okulila kwandje.” (Eps. 6:8) Oohapu dhenyolo lyesiku lyonena otadhi gandja ethano lya yela kutya Jehova oku tu hole unene, noku na ko nasha nankene hatu kala tu uvite. David okwa li e uvite Jehova a fa ta gongele omahodhi ge mekende, nenge te ga nyolele membo. Okwa li e na uushili kutya Jehova oku mu wete, noha dhimbulukwa uuwehame we. David okwa li a tompwa kutya He omunahole gwomegulu oku shi uupyakadhi we nosho wo nkene wa li we mu ningitha a kale e uvite. w24.12 22 ¶11-12

Katu na owala okukambadhala okuninga Aakriste ya koka pambepo, ihe otu na wo okutsikila okukoka pambepo. Onkee otwa pumbwa okukala twa kotoka kaatu dhiladhile kutya otwa koka sha gwana pambepo. (1 Kor. 10:12) Otwa pumbwa ‘okwiikonakona’ tse yene, tu tale ngele otatu tsikile tuu okuninga ehumokomeho. Montumwafo ye ndjoka a li a nyolele Aakolossa, omuyapostoli Paulus okwa li natango a tsu omuthindo kutya oya pumbwa okukala ya koka pambepo. Nonando oya li ya ningi Aakriste aakuluntu, Paulus okwa li e ya londodha ya kale ya kotoka kaaya nwethwe mo komadhiladhilo guuyuni. (Kol. 2:6-10) Epafras, ngoka tashi vulika oye a li e shi nawa egongalo ndyoka, okwa li ha galikana aluhe li “kale lya kola,” nenge li koke pambepo. (Kol. 4:12) Shino otashi tu longo shike? Paulus naEpafras oya li ye uvite ko kutya opo omuntu a kale Omukriste a pyokoka, okwa pumbwa okuninga oonkambadhala nokwa pumbwa ekwatho lyaKalunga. Oya li ya hala Aakolossa ya kale Aakriste ya koka pambepo, nando oya taalela omashongo. w24.04 6-7 ¶16-17

Okutila Jehova otashi ti kutya okukala tu mu hole noonkondo, noitatu ka ninga nando sha shoka tashi mu yemateke. Otwa halelela okwiilonga eyooloko pokati kaashoka sha uka naashoka sha puka, nopokati koshili niifundja, opo tu kale twa hokiwa kuJehova. (Omayel. 2:3-6; Heb. 5:14) Ngele otwa kala hatu tila aantu shi vulithe puJehova, otashi vulu oku tu fala kokule noshili. Natu taleni koshiholelwa shoondaadhi 12, ndhoka dha ka ndaadhele evi ndyoka Jehova a li a uvanekele Aaisraeli. Oondaadhi omulongo odha etha uumbanda wokutila Aakaanana wu kale wu vule ohole yadho yokuhola Jehova. Odha lombwele Aaisraeli ooyakwawo dha ti: “Katu na oonkondo oku ya matukila. Aantu mbeyaka oye na oonkondo ye tu vule.” (Num. 13:27-31) Pataloko lyopantu, Aakaanana oya li ye na oonkondo lela, naashoka oshoshili. Ihe kehe ngoka a li ta ti kutya Aaisraeli itaya vulu okusinda aatondi yawo, ka li e na Jehova momadhiladhilo. w24.07 9 ¶5-6