David a pasa den situashonnan hopi difísil ku a pon’é yora. Por ehèmpel, tabatin hende ku tabata odi’é i a hasi su bida imposibel. Tambe algun di su mes amigu- i famianan a traishon’é. (1 Sám. 19:​10, 11; 2 Sám. 15:​10-14, 30) Dado momento el a skirbi: “Mi ta kansá di suspirá; henter anochi, mi lágrimanan ta muha mi kama. Mi sofá ta papa muhá di tantu ku mi ta yora.” (Sal. 6:6) Apesar di tur loke David a pasa aden, e tabata konvensí ku Yehova tabata stim’é. El a bisa: “Yehova lo tende mi yoramentu.” (Sal. 6:8) E palabranan di nos teksto djawe ta siña nos algu hopi bunita. Yehova ta ègt stima nos i ta hopi atento na nos sintimentunan. David a sinti ku, den un sentido, Yehova tabata warda kada un di David su lágrimanan den un saku òf tabata skirbi kada un di nan den un buki. David tabatin sigur ku Yehova tabata sa presis loke el a pasa aden i lo no a lubidá esei. Tambe e tabata konvensí ku su Tata den shelu tabata komprondé bon kon su problemanan tabata pon’é sinti. w24.12 22 §11-12

Nos mester hasi esfuerso pa no solamente alkansá madures ma pa mantené asina tambe. Esei ta nifiká ku nunka nos lo pensa ku nos ta kla. Nos tin ku sigui krese. (1 Kor. 10:12) Ta masha importante pa nos “sigui saminá” nos mes pa hasi sigur ku nos ta progresando. Den Apòstel Pablo su karta na e rumannan na Kolósas, el a enfatisá un biaha mas e importansia di alkansá madures i no pèrd’é. Aunke ku e kristiannan ei ya tabata madurá, el a bisa nan ku nan mester tabatin masha kuidou pa no laga pensamentu di mundu engañá nan. (Kol. 2:​6-10) Anto Epafras, kende tabata konosé e rumannan di e kongregashon ei bon, konstantemente tabata hasi orashon pa nan “finalmente por ta maduro.” (Kol. 4:12) Kiko esei ta siña nos? Tantu Pablo komo Epafras tabata sa ku pa nos keda madurá den sentido spiritual nos mester hasi esfuerso i konta ku yudansa di Yehova. Nan tur dos tabata ke, pa apesar di kualke difikultat ku e rumannan na Kolósas haña nan kuné, nan no pèrdè nan madures. w24.04 6-7 §16-17

Rèspèt profundo pa Yehova ke men ku nos ta stima Yehova asina tantu ku nos no ke hasi nada ku lo pon’é rabia. P’esei, nos ke sa bon e diferensia entre bon i malu, entre bèrdat i mentira, pa asina nos hasi Yehova kontentu. (Pro. 2:​3-6; Heb. 5:14) Si nos miedu di hende ta mas grandi ku nos rèspèt profundo pa Yehova, nos por kuminsá bai tras di kosnan ku ta kontrali di e bèrdat. Wak por ehèmpel loke a pasa ku e 12 kabesantenan ku a bai spioná e pais ku Yehova a primintí di duna e israelitanan. Dies di nan a bisa e nashon: “Nos no por bai kontra e pueblo, pasobra nan ta muchu fuerte pa nos.” (Num. 13:​27-31) For di punto di bista di hende, ta bèrdat ku e kananeonan tabata mas fuerte. Pero bisando ku nan no por a vense e kananeonan a nifiká ku nan a laga Yehova afó. Bon mirá, e miedu ku nan tabatin di e kananeonan tabata mas fuerte ku nan amor pa Yehova. w24.07 9 §5-6