We de show say Jehovah na our Rock when we trust-am with all our heart. We know say when we obey-am even when things really dey hard, na we go gain. (Isa. 48:​17, 18) Anytime wey we see how Jehovah help us, e de make us trust-am more. We go really dey sure say na only Jehovah go fit help us endure any problem wey we face no matter how e hard reach. Just as big rock no de shift comot from where e dey, na so Jehovah be. Im character and wetin e get for mind to do, no de ever change. (Mal. 3:6) When Adam and Eve sin against Jehovah for the garden of Eden, Jehovah no change wetin e get for mind to do for us. Apostle Paul talk say Jehovah “no go fit do wetin dey against who e really be.” (2 Tim. 2:13) This one mean say no matter wetin happen or wetin other people do, Jehovah no go ever change im character, wetin e get for mind to do, or im law. Because we know say Jehovah no de ever change, we know say e go help us when things really hard, and e go do wetin e promise us for future.—Ps. 62:6, 7. w24.06 27-28 ¶7-8

If you dey for relationship, wetin go help you decide if you go marry the person or if you no go marry-am? Make una try know each other well. Na true say you fit don know some things about the other person before you start relationship with-am. But now, you get the chance to fit know “the kind person wey [e] be for inside.” You go fit know about im friendship with Jehovah, im character, and the way e de think. As time de go, you suppose fit answer question like: ‘This person go fit be better husband or wife for me?’ (Prov. 31:​26, 27, 30; Eph. 5:33; 1 Tim. 5:8) ‘We go fit love and care for each other? I go fit live with-am even though say e de do some things wey I no like?’ (Rom. 3:23) Make you remember say wetin dey important pass no be whether the two of una like the same thing, but na how una ready to adjust about the things wey una no like about each other. w24.05 27 ¶5

King David commit serious sin. But when prophet Nathan tell-am how Jehovah feel about wetin e do, David repent with all im heart. (Ps. 51:3, 4, 17) Another king wey sin against Jehovah na King Hezekiah. (2 Chron. 32:25) But just like David, Hezekiah repent with all im heart. (2 Chron. 32:26) For the end, how Jehovah see Hezekiah? Jehovah see-am as good king wey “continue to do wetin correct for [Im] eye.” (2 Ki. 18:3) Wetin we learn? If we make mistake, we need to repent with all our heart and do our best make e no happen again. What if we receive correction from elders for something wey we feel say e no really serious? Make this one no make us feel say Jehovah no love us again or say the elders no like us. Even when the kings wey Bible talk say them be good kings do bad thing, Jehovah correct them. (Heb. 12:6) So when them correct you, make you (1) carry body down and accept the correction, (2) stop to de do the things wey make them correct you, and (3) continue to worship Jehovah with all your heart. If you really repent, Jehovah go forgive you.—2 Cor. 7:9, 11. w24.07 21 ¶8; 22 ¶9, 11