ਇਹ ਤਾਂ ਸੱਚ ਹੈ ਕਿ ਸਾਨੂੰ ਸਿਰਫ਼ ਸਮਝਦਾਰ ਬਣਨ ਲਈ ਹੀ ਨਹੀਂ, ਸਗੋਂ ਸਮਝਦਾਰ ਬਣੇ ਰਹਿਣ ਲਈ ਵੀ ਮਿਹਨਤ ਕਰਨ ਦੀ ਲੋੜ ਹੈ। ਸਾਨੂੰ ਆਪਣੇ ਆਪ ʼਤੇ ਹੱਦੋਂ ਵੱਧ ਭਰੋਸਾ ਕਰਦਿਆਂ ਕਦੇ ਵੀ ਇਹ ਨਹੀਂ ਸੋਚਣਾ ਚਾਹੀਦਾ, ‘ਮੇਰਾ ਤਾਂ ਯਹੋਵਾਹ ਨਾਲ ਵਧੀਆ ਰਿਸ਼ਤਾ ਹੈ, ਮੈਨੂੰ ਹੋਰ ਮਿਹਨਤ ਕਰਨ ਦੀ ਕੀ ਲੋੜ ਹੈ।’ (1 ਕੁਰਿੰ. 10:12) ਇਸ ਦੀ ਬਜਾਇ, ਸਾਨੂੰ “ਆਪਣੇ ਆਪ ਨੂੰ ਪਰਖਦੇ” ਰਹਿਣ ਅਤੇ ਯਹੋਵਾਹ ਨਾਲ ਆਪਣਾ ਰਿਸ਼ਤਾ ਮਜ਼ਬੂਤ ਕਰਦੇ ਰਹਿਣ ਦੀ ਲੋੜ ਹੈ। ਪੌਲੁਸ ਰਸੂਲ ਨੇ ਕੁਲੁੱਸੀਆਂ ਦੇ ਮਸੀਹੀਆਂ ਨੂੰ ਚਿੱਠੀ ਲਿਖਦੇ ਵੇਲੇ ਦੁਬਾਰਾ ਇਸ ਗੱਲ ʼਤੇ ਜ਼ੋਰ ਦਿੱਤਾ ਕਿ ਸਾਨੂੰ ਸਮਝਦਾਰ ਬਣੇ ਰਹਿਣ ਦੀ ਲੋੜ ਹੈ। ਵੈਸੇ ਤਾਂ ਉੱਥੇ ਦੇ ਭੈਣ-ਭਰਾ ਸਮਝਦਾਰ ਸਨ। ਫਿਰ ਵੀ ਪੌਲੁਸ ਨੇ ਉਨ੍ਹਾਂ ਨੂੰ ਖ਼ਬਰਦਾਰ ਕੀਤਾ ਕਿ ਉਹ ਕਿਤੇ ਦੁਨੀਆਂ ਦੀ ਸੋਚ ਨਾ ਅਪਣਾ ਲੈਣ। (ਕੁਲੁ. 2:6-10) ਇਪਫ੍ਰਾਸ ਕੁਲੁੱਸੀਆਂ ਦੇ ਭੈਣਾਂ-ਭਰਾਵਾਂ ਨੂੰ ਚੰਗੀ ਤਰ੍ਹਾਂ ਜਾਣਦਾ ਸੀ ਤੇ ਉਨ੍ਹਾਂ ਦਾ ਬਹੁਤ ਫ਼ਿਕਰ ਕਰਦਾ ਸੀ। ਉਸ ਨੇ ਵੀ ਲਗਾਤਾਰ ਪ੍ਰਾਰਥਨਾ ਕੀਤੀ ਕਿ ਉਹ ‘ਮਜ਼ਬੂਤ ਖੜ੍ਹੇ ਰਹਿਣ’ ਯਾਨੀ ਸਮਝਦਾਰ ਬਣੇ ਰਹਿਣ। (ਕੁਲੁ. 4:12) ਪੌਲੁਸ ਅਤੇ ਇਪਫ੍ਰਾਸ ਤੋਂ ਅਸੀਂ ਕੀ ਸਿੱਖ ਸਕਦੇ ਹਾਂ? ਇਹੀ ਕਿ ਜੇ ਅਸੀਂ ਸਮਝਦਾਰ ਬਣੇ ਰਹਿਣਾ ਚਾਹੁੰਦੇ ਹਾਂ, ਤਾਂ ਸਾਨੂੰ ਪਰਮੇਸ਼ੁਰ ਤੋਂ ਮਦਦ ਲੈਣ ਦੀ ਲੋੜ ਹੈ। ਪਰ ਇਸ ਦੇ ਨਾਲ-ਨਾਲ ਸਾਨੂੰ ਖ਼ੁਦ ਵੀ ਮਿਹਨਤ ਕਰਨ ਦੀ ਲੋੜ ਹੈ। ਪੌਲੁਸ ਤੇ ਇਪਫ੍ਰਾਸ ਵੀ ਇਹ ਗੱਲ ਜਾਣਦੇ ਸਨ। ਇਸ ਲਈ ਉਹ ਚਾਹੁੰਦੇ ਸਨ ਕਿ ਕੁਲੁੱਸੀਆਂ ਦੇ ਭੈਣ-ਭਰਾ ਮੁਸ਼ਕਲਾਂ ਦੇ ਬਾਵਜੂਦ ਵੀ ਸਮਝਦਾਰ ਬਣੇ ਰਹਿਣ ਲਈ ਮਿਹਨਤ ਕਰਨ। w24.04 6 ਪੈਰੇ 16-17

ਯਹੋਵਾਹ ਦਾ ਡਰ ਰੱਖਣ ਦਾ ਮਤਲਬ ਹੈ ਕਿ ਸਾਨੂੰ ਉਸ ਨਾਲ ਇੰਨਾ ਪਿਆਰ ਹੈ ਕਿ ਅਸੀਂ ਇੱਦਾਂ ਦਾ ਕੋਈ ਕੰਮ ਨਹੀਂ ਕਰਦੇ ਜਿਸ ਤੋਂ ਉਸ ਨੂੰ ਦੁੱਖ ਹੋਵੇ। ਅਸੀਂ ਇਹ ਜਾਣਨ ਦੀ ਕੋਸ਼ਿਸ਼ ਕਰਦੇ ਹਾਂ ਕਿ ਯਹੋਵਾਹ ਦੀਆਂ ਨਜ਼ਰਾਂ ਵਿਚ ਕੀ ਸਹੀ ਹੈ ਤੇ ਕੀ ਗ਼ਲਤ, ਕੀ ਸੱਚ ਹੈ ਤੇ ਕੀ ਝੂਠ ਤਾਂਕਿ ਅਸੀਂ ਉਸ ਦੀ ਮਨਜ਼ੂਰੀ ਪਾ ਸਕੀਏ। (ਕਹਾ. 2:3-6; ਇਬ. 5:14) ਜੇ ਅਸੀਂ ਯਹੋਵਾਹ ਤੋਂ ਜ਼ਿਆਦਾ ਇਨਸਾਨਾਂ ਦਾ ਡਰ ਰੱਖਣ ਲੱਗ ਪਈਏ, ਤਾਂ ਅਸੀਂ ਸੱਚਾਈ ਦੇ ਰਾਹ ਤੋਂ ਦੂਰ ਜਾ ਸਕਦੇ ਹਾਂ। ਧਿਆਨ ਦਿਓ ਕਿ ਇਜ਼ਰਾਈਲੀਆਂ ਦੇ ਉਨ੍ਹਾਂ 12 ਮੁਖੀਆਂ ਨਾਲ ਕੀ ਹੋਇਆ ਜੋ ਵਾਅਦਾ ਕੀਤੇ ਹੋਏ ਦੇਸ਼ ਵਿਚ ਜਾਸੂਸੀ ਕਰਨ ਗਏ ਸਨ। ਉਨ੍ਹਾਂ ਵਿੱਚੋਂ 10 ਜਾਸੂਸ ਕਨਾਨੀਆਂ ਤੋਂ ਇੰਨਾ ਡਰ ਗਏ ਕਿ ਯਹੋਵਾਹ ਲਈ ਉਨ੍ਹਾਂ ਦਾ ਪਿਆਰ ਘੱਟ ਗਿਆ। ਉਨ੍ਹਾਂ ਨੇ ਬਾਕੀ ਇਜ਼ਰਾਈਲੀਆਂ ਨੂੰ ਕਿਹਾ: “ਅਸੀਂ ਉਨ੍ਹਾਂ ਨਾਲ ਲੜ ਨਹੀਂ ਸਕਦੇ ਕਿਉਂਕਿ ਉਹ ਸਾਡੇ ਨਾਲੋਂ ਤਾਕਤਵਰ ਹਨ।” (ਗਿਣ. 13:27-31) ਇਹ ਤਾਂ ਸੱਚ ਸੀ ਕਿ ਕਨਾਨੀ ਤਾਕਤਵਰ ਸਨ। ਪਰ ਇਹ ਗੱਲ ਝੂਠ ਸੀ ਕਿ ਇਜ਼ਰਾਈਲੀ ਉਨ੍ਹਾਂ ਨੂੰ ਹਰਾ ਨਹੀਂ ਸਕਦੇ ਸਨ। 10 ਜਾਸੂਸ ਇਹ ਗੱਲ ਭੁੱਲ ਗਏ ਸਨ ਕਿ ਯਹੋਵਾਹ ਇਜ਼ਰਾਈਲੀਆਂ ਦੇ ਨਾਲ ਸੀ। w24.07 9 ਪੈਰੇ 5-6

ਕੀ ਅਸੀਂ ਯਕੀਨ ਰੱਖ ਸਕਦੇ ਹਾਂ ਕਿ ਯਹੋਵਾਹ ਜਦੋਂ ਵੀ ਨਿਆਂ ਕਰਦਾ ਹੈ, ਉਹ ਸਹੀ ਹੁੰਦਾ ਹੈ? ਬਿਲਕੁਲ। ਅਬਰਾਹਾਮ ਵੀ ਇਹ ਗੱਲ ਚੰਗੀ ਤਰ੍ਹਾਂ ਸਮਝ ਗਿਆ ਸੀ ਕਿ “ਸਾਰੀ ਦੁਨੀਆਂ ਦਾ ਨਿਆਂਕਾਰ” ਯਹੋਵਾਹ ਪਰਮੇਸ਼ੁਰ ਦਇਆਵਾਨ ਹੈ, ਸਭ ਤੋਂ ਜ਼ਿਆਦਾ ਬੁੱਧੀਮਾਨ ਹੈ ਅਤੇ ਹਮੇਸ਼ਾ ਉਹੀ ਕਰਦਾ ਹੈ, ਜੋ ਸਹੀ ਹੁੰਦਾ ਹੈ। ਉਸ ਨੇ ਆਪਣੇ ਪੁੱਤਰ ਨੂੰ ਸਿਖਲਾਈ ਦਿੱਤੀ ਹੈ ਅਤੇ ਨਿਆਂ ਕਰਨ ਦੀ ਸਾਰੀ ਜ਼ਿੰਮੇਵਾਰੀ ਉਸ ਨੂੰ ਸੌਂਪੀ ਹੈ। (ਯੂਹੰ. 5:22) ਉਹ ਦੋਵੇਂ ਇਨਸਾਨਾਂ ਦੇ ਦਿਲ ਪੜ੍ਹ ਸਕਦੇ ਹਨ ਅਤੇ ਜਾਣ ਸਕਦੇ ਹਨ ਕਿ ਹਰ ਇਨਸਾਨ ਅੰਦਰੋਂ ਕਿਹੋ ਜਿਹਾ ਹੈ। (ਮੱਤੀ 9:4) ਇਸ ਲਈ ਉਹ ਹਮੇਸ਼ਾ ‘ਸਹੀ ਨਿਆਂ ਕਰਨਗੇ।’ ਆਓ ਆਪਾਂ ਪੂਰਾ ਭਰੋਸਾ ਰੱਖੀਏ ਕਿ ਯਹੋਵਾਹ ਸਾਰਾ ਕੁਝ ਜਾਣਦਾ ਹੈ। ਨਾਲੇ ਯਾਦ ਰੱਖੀਏ ਕਿ ਅਸੀਂ ਕਿਸੇ ਦਾ ਨਿਆਂ ਨਹੀਂ ਕਰ ਸਕਦੇ, ਸਗੋਂ ਯਹੋਵਾਹ ਹੀ ਕਰ ਸਕਦਾ ਹੈ। (ਯਸਾ. 55:8, 9) ਅਸੀਂ ਯਕੀਨ ਰੱਖ ਸਕਦੇ ਹਾਂ ਕਿ ਯਹੋਵਾਹ ਅਤੇ ਯਿਸੂ ਇਕਦਮ ਸਹੀ ਨਿਆਂ ਕਰਨਗੇ। ਸਾਡਾ ਰਾਜਾ ਯਿਸੂ ਮਸੀਹ ਹੂ-ਬਹੂ ਆਪਣੇ ਪਿਤਾ ਵਰਗਾ ਹੈ। ਇਸ ਕਰਕੇ ਉਹ ਸਹੀ ਨਿਆਂ ਕਰਨ ਦੇ ਨਾਲ-ਨਾਲ ਦਇਆ ਵੀ ਕਰੇਗਾ।​—ਯਸਾ. 11:3, 4. w24.05 7 ਪੈਰੇ 18-19