نتن‌ایل دی مثال توں پتہ چلدا اے کہ صاف دل ہونا کِنّاں اہم اے۔ جدوں فِلپّس اپنے دوست نتن‌ایل نُوں پہلی وار یسوع نُوں ملوان لیایا تے اِک بڑی زبردست گل ہوئی۔ بھانویں کہ یسوع نتن‌ایل نُوں پہلاں کدی نئیں مِلیا سی پر فیر وی اوہنے نتن‌ایل بارے کہیا:‏ ”‏ویکھو!‏ اِک سچا اِسرائیلی جدے چ کھوٹ نئیں اے۔“‏ ‎(‏یوحنا 1:‏47)‎‏ یسوع نے ویکھیا کہ نتن‌ایل دی صاف دلی کجھ زیادہ ای خاص سی۔ بھانویں کہ نتن‌ایل وی ساڈے وانگوں عیب‌دار سی پر اوہدے چ ذرا جیہا وی پاکھنڈ نئیں سی سگوں اوہ ہر معاملے چ ایمان‌دار سی۔ یسوع مسیح نے ایس گل لئی اوہدی تعریف کیتی۔ زبور 15 چ یہوواہ نُوں خوش کرن بارے جیہڑیاں گلاں دَسیاں گئیاں نیں، اوہناں وچوں زیادہ‌تر دا تعلق ایس گل نال اے کہ اَسی دُوجیاں نال کیویں پیش آنے آں۔ زبور 15:‏3 چ دَسیا گیا اے کہ یہوواہ دے خیمے چ آن والا مہمان اپنی زبان توں جھوٹھیاں گلاں نئیں پھیلاندا، اوہ اپنے گوانڈھی نال کجھ بُرا نئیں کردا تے اپنے دوستاں نُوں بدنام نئیں کردا۔ جے اَسی ایہو جہیاں گلاں کراں گے تے اَسی دُوجیاں دا دل دُکھاواں گے۔ ‎(‏یعقوب 1:‏26)‎‏۔ م24.‏06 ص.‏ 10 پ.‏ 7، 9؛ ص.‏ 11 پ.‏ 10

جے تُسی مُنادی لئی چنگی تیاری کرو گے تے تواڈے لئی دُوجیاں نال گل کرنا اسان ہوئے گا۔ یسوع نے اپنے شاگرداں نُوں مُنادی چ گھلن توں پہلاں اوہناں نُوں تیار کیتا۔ ‎(‏لُوقا 10:‏1-‏11)‎‏ یسوع دِیاں ہدیتاں تے عمل کرن دی وجہ توں شاگرداں نُوں ایہہ کم کر کے بڑی خوشی مِلی۔ اَسی مُنادی لئی تیاری کیویں کر سکنے آں؟ اَسی پہلاں توں سوچ سکنے آں کہ اَسی پاک کلام دِیاں سچائیاں لوکاں نُوں اپنے لفظاں چ کیویں سمجھانواں گے۔ ایہہ وی چنگا ہوئے گا کہ اَسی دو یاں تِن ایہو جہیاں گلاں بارے سوچئے جیہڑیاں اکثر ساڈے علاقے دے لوک پچھدے نیں۔ نالے ایہہ وی سوچئے کہ اَسی ایہناں دا جواب کیویں دَواں گے۔ فیر جدوں اَسی لوکاں نُوں ملنے آں تے اَسی کوشش کرسکنے آں کہ اَسی پُر سکون رہیے، مسکرائیے تے دوستاں وانگوں گل کرئیے۔ م24.‏04 ص.‏ 15، 16 پ.‏ 6، 7

مُنادی کرن دی سب توں وڈی وجہ ایہہ وے کہ اَسی یہوواہ تے اوہدے ناں نال پیار کرنے آں۔ ایس پیار دی وجہ توں اَسی مُنادی دے ذریعے اوہدی وڈیائی کرنے آں۔ اَسی پورے دل نال ایس گل نُوں مننے آں کہ یہوواہ ایہہ حق رکھدا اے کہ اوہدے وفادار بندے اوہنوں عظمت، عزت تے اپنی طاقت دین۔ جدوں اَسی لوکاں نُوں ایہہ صاف صاف دَسنے آں کہ ساریاں چیزاں یہوواہ نے بنائیاں نیں تے اَسی اوہدی وجہ توں ای زندہ واں تے اِنج اَسی یہوواہ نُوں عظمت تے عزت دے رہے ہنے آں۔ تے جدوں اَسی اپنے حالاتاں مطابق پوری وا لا کے مُنادی چ وقت، توانائی تے پیسہ لانے آں تے اِنج اَسی یہوواہ نُوں اپنی طاقت دے رہے ہنے آں۔ ‎(‏متی 6:‏33؛ لُوقا 13:‏24؛ کُلسّیوں 3:‏23)‎‏ سادہ لفظاں چ کہیے تے اَسی اپنے خدا نال اینی محبت کرنے آں کہ سانوں اوہدے بارے لوکاں نُوں دَسنا بڑا چنگا لگدا اے۔ نالے اَسی لوکاں نُوں ایہہ وی دَسنا چاہنے آں کہ اوہدا ناں کیہہ اے تے اوہ کیہو جیہا خدا اے۔ م24.‏05 ص.‏ 17 پ.‏ 11