No say sakey ya nankasalanan et aga ondengel anggano aminpiga lan tinulongan na saray elder ya magbabawi, sikatoy ekalen ed kongregasyon. (2 Ara. 17:12-15) Nanengneng ed saray gagawaen to ya agton talaga labay ya unoren so ganggan nen Jehova. (Deu. 30:19, 20) Kanian iyanunsio ed kongregasyon ya sikatoy aliwa lan Tasi nen Jehova. Antoy gagala na satan? Aliwan pian pabaingan imay nankasalanan. Iyanunsio itan pian natumbok na saray agagi so ganggan na Biblia ya ‘tundaan da lay miulop’ ed satan ya too tan ‘ag-ira anggan midungo’ ed sikato. (1 Cor. 5:9-11) Walay balibalin rason nen Jehova no akin ya ingganggan to ’tan. Oniay insulat nen apostol Pablo: “Say daiset a lebadura et palebagen toy interon masa.” (1 Cor. 5:6) No ag-ekalen ed kongregasyon so sakey ya agmagbabawin nankasalanan, naimpluensyaan to ray agagi tan ompan isipen da ni ingen ya ayos labat anggano agda unoren iray ganggan nen Jehova.—Pro. 13:20; 1 Cor. 15:33. w24.08 27 ¶3-4

Agtayo sarag ya ipasa ed arum so biskeg tayo, pero sarag tayon usaren so biskeg tayo pian ontulong. Singa bilang, sarag tayon itindaanan o ilinisan na abung iray maedad o mansasakit ya agagi. Tan maabig no ontulong tayod panaglinis tan panagmintina na Kingdom Hall. Tandaan tayo met ya napabiskeg tayoy arum diad saray ibabaga tayod sikara. Kasin walay nanonotan mon agi ya kakkaukolan toy panamaseseg? Odino kasin naimanom ya naeermenan so sakey ya agi tan kakkaukolan toy ligliwa? Diad ontan iran situasyon, maabig no sika lay unonan onasingger tan ipaliknam ed sikato ya imamalasakit mo. Ompan kaukolan toy komendasyon. Sarag mo met ya pasyaren ed abung da, tawagan, ikdan mo na card, pawitan mo na e-mail, i-text, o i-chat mo. Agka mapagpaga ed no antoy ibagam. Anggano simpli labat so ibagam, basta nalikna to ya nanlapud pusom. Malay mo, ompan atan so kakkaukolan to ’tan ya agi pian makapanmatoor, agnaekalan na ilalo, tan nasarag toy ontutumbok iran agew.—Pro. 12:25; Efe. 4:29. w24.09 28 ¶8-10

No sakey ka lan ministeryal a lingkor, nayarin pankikimeyan mo met la iray kualipikasyon parad sakey ya elder. Kasin labay moy onkualipika parad satan ya “maabig a kimey”? Anto ray gagawaen na saray elder? Idadaulo day panagpulong, makulikuli ran man-shepherding, tan manbangat. Papasesegen da met iray agagi diad saray ibabaga tan gagawaen da. Kampega lan tinawag na Biblia irayan makukulin elder ya “regalo a lalaki.” (Efe. 4:8) Panon a magmaliw ya elder so sakey ya brother? Say kualipikasyon parad saray elder et aliwan singa diad pan-aplay na trabaho. Kaslakan, naala kad trabaho basta walad sika iray skill ya aanapen na sakey ya kompanya. Duma balet no labay moy magmaliw ya elder. Aliwan magenap may basta marunong kan manpulong tan manbangat. Kaukolan mon pankimeyan iray kualipikasyon parad saray elder ya nabasad 1 Timoteo 3:1-7 tan Tito 1:5-9. w24.11 20 ¶1-3