Kakkaukolan na saray disipulo nen Jesus so panamaseseg. Akin ey? Dakel so insakripisyo ra pian natumbok day Jesus. Say arum ed sikara et tinaynan day abung, pamilya, tan negosyo ra. (Mat. 19:27) Say arum ni ingen ed sikara et agla labay ya piulopan na saray kapara dan Judio nen nagmaliw iran disipulo nen Jesus. (Juan 9:22) Mabulos iran nansakripisyo ta manisia iran si Jesus so insipan ya Mesias. (Mat. 16:16) Kanian nen inatey si Jesus, pakalikna ra et singa asayang so amin ya sagpot da tan aminpinsan ya naandi so ilalo ra. Natatalosan nen Jesus no akin ya maer-ermen iray disipulo to. Agto inisip ya makapuy so espiritualidad da. Amta to ya normal labat ya ontan so nalikna ra ta inateyan iray kaaro. Kanian diad unonan agew ni labat na inkioli to, pinaseseg to lan tampol iray kakaaro to. Singa bilang, nen onaakis si Maria Magdalena diman ed angiponponan ed si Jesus, nampanengneng si Jesus ed sikato. (Juan 20:11, 16) Nampanengneng met si Jesus ed samay duaran disipulo ya nanakar paonlad Emaus. Tan nampanengneng met ed si apostol Pedro. w24.10 13 ¶5-6

Atateng, ibangat yoy anak yo no panon ton nipaliwawa ed arum ya walay Amalsa. Makatulong no saniba yon aralen so serye na saray artikulo ed jw.org ya “Tepet na Saray Kabataan—Walay Nanggawa o Ebolusyon Labat?” Pampilim so anak mo no dinan ed saray eksplinasyon ditan so labay ton usaren pian nipaliwawa tod arum ya walay Amalsa. Ibagam ya simpli labat so pan-explain to pian mainomay dan natalosan. Singa bilang, ompan ibaga na kaklase to: “Agak manisia ed Dios ta agko nin balot anengneng.” Nayarin oniay iyebat to: “Imadyin mo pa ya manaakar ka ed lugar ya puros kakiewan tan singa anggapoy nanengneng mon too ya manaayam diman. Pero nagunoyan, akanengneng kay bahay-kubo. Kasin isipen mo ya basta labat linmesa imay bahay-kubo diman ya anggapoy nampaalagey? Di ba andi? No say simplin bahay-kubo et walay nanggawa, di wala met sirin so nanggawa ed marakdakep ya universe!” w24.12 18 ¶16

Amin tayo et kaukolan tayoy panangigiya pian makapandesisyon tayoy duga. Dakel ya bilin so niiter na saray elder tan saray maespiritual ya agagi. Anggano maedad la ra, agtayo komon iisipen ya karaanan la tan aliwa lan mausar iray bilin da. Diad tua, labay ingen nen Jehova ya makaaral tayo ed sikara. Lapud kabayag da lan manbibilay, mas dakel lay eksperiensya da tan mas malawak lay panagnonot tan pakatalos da. Manlapu la nensaman, uusaren la nen Jehova iray matoor ya maedad lan lingkor to pian pasesegen tan igiya iray totoo to. Singa bilang, inusar to ra di Moises, David, tan apostol Juan. Nambilay ira ed nanduruman panaon tan aliwan parepareho so situasyon da. Nen asingger lan manampot so bilay da, wala ray importantin imbaga da ed saray mas ugugaw. Imbangat dan talo no akin ya importante so iyunor ed Dios. Kanian amin tayo, balanglan ugaw o matatken, makaaral tayo ed saray bilin da.—Roma 15:4; 2 Tim. 3:16. w24.11 8 ¶1-2