Makapantiwala tayo ya no si Jehova so mangukom, lanang ya duga so desisyon to. Singa si Abraham, atalosan tayo ya si Jehova—say “Ukom na interon dalin”—et perpekto, sankarunongan, tan anggapoy makapipara ed panangasi to. Impasal toy Jesus parad satan ya responsabilidad tan “inmatalek to lad Anak [to] so amin a pangukom.” (Juan 5:22) Parehon nabasa nen Jehova tan Jesus no antoy walad puso na kada too. (Mat. 9:4) Kanian no mangukom ira, makapantiwala tayo ya duga so desisyon da! Lanang tayo sirin ya mantiwala ed si Jehova. Birbiren tayo ya anggapoy karapatan tayon mangukom. Si Jehova so makanepegan ya manggawa ed satan. (Isa. 55:8, 9) Kanian ipalima tayo lan amin ed si Jehova tan ed si Jesus, say Ari tayo ya patas met tan makasi ya singa si Ama to.—Isa. 11:3, 4. w24.05 7 ¶18-19

Say patunay ya talagan importante so ‘mansalitay katuaan manlapud puso’ et amay salaysay ed Biblia nen impakabat nen Felipe si Natanael ed si Jesus. (Sal. 15:2) Diad saman labat akabat nen Jesus si Natanael, pero oniay imbaga nen Jesus: “Nengneng yo, sakey a tuan Israelita, ya agmamapalikdo.” (Juan 1:47) Pambiliban nen Jesus so nikadkaduman inkamatua nen Natanael. Siempre, aliwa met ya perpekto si Natanael, pero anggapon balot so nanengneng ed sikato ya pankunkunwari. Pandinayewan nen Jesus itan ya ugali to! Nanengneng ed Salmo 15 ya importante ed si Jehova no panon so pantrato tayod arum. Nabasad Salmo 15:3 ya say sangkaili nen Jehova et “agto uusarey dila to pian deralan so arum, agmanggagaway mauges ed kapara ton too, tan agto dederalan [o “iiyan ed kababaingan,” paimanod leksab] so kakaaro to.” No agtayo kontrolen so dila tayo tan deralan tayoy arum, nasakitan ira.—Sant. 1:26. w24.06 10 ¶7, 9; 11 ¶10

No manparaan kan maong antis kan manpulong, mas walay kompiyansam ya mitongtong ed saray totoo. Imparaan ya maong nen Jesus iray disipulo to antis to ran ibaki ya manpulong. (Luc. 10:1-11) Inyaplika da iramay imbangat nen Jesus ed sikara, kanian dakel so agawaan da tan malikeliket ira. Panon tayon manparaan antis tayon manpulong? Isip mon maong no antoy ibagam tan no panon mo itan ya ibaga diad dilin salitam. Isip mo met iray mabetbet ya reaksion na saray totoo ed teritorya yo, tan iplanom la no antoy iyebat mo no ontan so reaksion na katongtong mo. Tan no mitongtong ka, relaks ka labat, imisan mo ra, tan magmaliw kan makaaro. w24.04 16 ¶6-7