Ibabaga na Biblia ya “nibulos” tayo la lapud abayaran la so dondon. Oniay imbaga nen apostol Pedro: “Amta yo a nibulos kayo [literal, “dinondon kayo”] ed andi-kakanaan a paraan na kabibilay yo a tinawir yo ed inmuunan atateng yo, aliwan diad panamegley na saray bengatlan naderal, a singa say pilak odino balitok. Imbes, nibulos kayo diad panamegley na mablin dala, a singa say dala na kordero ya andiay pakabalawan tan malinis, say dala nen Kristo.” (1 Ped. 1:18, 19; paimanod leksab) Amin ya too et aripen na kasalanan tan patey. Pero lapud dondon bagat nen Jesus, sarag tayo lay makalukpos o makablos ed satan. (Roma 5:21) Say mabmablin dala nen Jesus so imbayar pian nibulos tayo. Talagan misatsalamat tayod sikato tan ed si Aman Jehova! w25.02 5 ¶15-16

Panon tayon nabantayan o naguardiaan so sarili tayo ed saray tukso? Makaaral tayod samay agawa ed kalangweran ya laki ya abitlad Proverbio kapitulo 7. Base ed bersikulo 22, sayan laki et basta to labat tinumbok so sakey ya imoral ya bii ya anggad akagawa ray seksual ya imoralidad. Singa mapmaples labat itan ya agawa, tan singa agto met ginagalay manggaway imoral. Pero no nengnengen tayo ray akaunan bersikulo, wala ray makapuy ya desisyon na sayan laki kanian akagawa laingey kasalanan. Anto iratan? Unona, nen mansirunget la, “sikatoy dinmalan ed karsadan asingger ed abung na [samay imoral ya bii].” Tan sikatoy nanakar a paarap ditan. (Pro. 7:8, 9) Insan nen anengneng to may bii, mapatpatnag ya agto pinaliisan, ta pinmayag ya sikatoy angoban na samay bii. Madengedengel met nen imbaga na samay bii ya sikatoy mangiyapay na saray bagat ya pandurungoan. Seguro, labay ya papawayen na sayan bii ya sikatoy maka-Dios. (Pro. 7:13, 14, 21) Diad tua, amta to pa may laki ya aliwa lay aarapen to. No diad gapo ni labat komon et pinmaliis la, aga komon atukso tan ag-akagaway kasalanan. w24.07 16 ¶8-9; 19 ¶19

Agbalot konsintien nen Jehova iray manggagawa na seryoson kasalanan. Ompan isipen na arum ya lapud makasi si Jehova, paulyanan to labat ya mansiansia ed kongregasyon so sakey ya nankasalanan ya agto pagbabawiay ginawa to. Tua ya makasi si Jehova, pero tandaan tayo ya aliwan konsintidor, tan agton balot iyabeba so estandarte to. (Jud. 4) No paulyanan to labat ya mansiansiad kongregasyon so agmagbabawin nankasalanan, kaskasian laingen iray matoor ya lingkor to ta seguradon naimpluensyaan ira. (Pro. 13:20; 1 Cor. 15:33) Pero tandaan tayo met ya aglabay nen Jehova ya walay siopaman ya naderal. Labay ton iliktar iray totoo anggad posible. Ipapaseguro to ya kasian to iramay talagan pagbabawian day kasalanan da tan pansasagpotan dan apigeren so relasyon dad sikato. (Eze. 33:11; 2 Ped. 3:9) Kanian nen nagbabawi imay laki ya tagad Corinto tan intunda to lay mauges ya gagawaen to, inusar nen Jehova si apostol Pablo pian ipaliwawa ed saray agagi ya kaukolan dan perdonaen tan awaten lamet ed kongregasyon. w24.08 17 ¶7; 18-19 ¶14-15